Inaciu Galán y González (Xixón, 1986) Doctor pola Universidá d’Uviéu cola tesis “La llingua asturiana nel Franquismu”, que foi calificada con Sobresaliente cum laude y propuesta a Premiu Estraordinariu de Doctoráu, Máster en Sociedá de la Información y el Conocimientu na Universitat Oberta de Catalunya (UOC), Graduáu en Periodismu pola Universidá a Distancia de Madrid (UDIMA), Diplomáu en Turismu y Especialista Universitariu en Xestión Cultural y Especialista Universitariu n’Asturies. Espaciu, patrimoniu, hestoria, cultura, pola Universidá d’Uviéu. Ta formáu como profesor na especialidá d’asturianu col Máster de Formación del Profesoráu. Pol so llabor a favor del asturianu foi reconocíu col Premiu Urogallo 2012 del Centru Asturianu de Madrid. En 2022 l’Academia de la Llingua Asturiana nomólu miembru de númberu de la institución.
Periodismu
El so trabayu nos medios entama yá en 2003, na emisora Onda Peñes, onde hasta 2005 dirixe y presenta’l magacine ‘Xuventú d’anguaño’ y el programa d’entrevistes ‘Asina foi… el Surdimientu’. Nesos mesmos años presenta dellos espacios divulgativos na canal de televisión llocal de Xixón (TLG), como “La clas d’asturianu” y collabora con medios como Asturies.com.
En 2005 recibió’l Premiu “Enriqueta González Rubín” de Periodismu, otorgáu pol Gobiernu d’Asturies pol so llabor na radio. Dos años más tarde, en 2007, entama a presentar ún de los primeros espacios n’asturianu de la televisión pública asturiana (TPA), el programa ‘Al aldu: Xente de casa’, que tuvo cinco años n’antena, hasta febreru de 2012. Dende entós diba tar xuníu a la RTPA con diferentes formatos. Tamién dende 2007, presentó dellos espacios na cadena SER y foi redactor del diariu dixital Asturnews. Amás tien fechos guiones pa programes de la RTPA, como ‘Nomes d’Asturies’, ‘La Risión’ o tornes de guiones pal programa de documentales ‘Mirasturies, l’Asturies recién’.
En 2010 punxo en marcha’l Departamentu de Comunicación y Prensa de les marques internacionales de moda pa muyer, Mamatayoe y Comounaregadera. Tuvo al frente hasta 2016, anque sigue collaborando como asesor esternu na comunicación.
En 2010 recibió’l Premiu Moscones en Xixón de Periodismu, pol so artículu “Grau, el mercadón de la cultura”.
Dende 2013 a 2015 collaboró con una sección selmanal d’opinión nel programa mañaniegu ‘La radio es mía’, conducíu por Pachi Poncela y Sonia Avellaneda na RPA y con medios escritos como El Comercio o Vërtigu, con artículos y reportaxes esporádicos. Amás espubliza columnes d’opinión en La Voz de Asturias y n’otros medios como El Cuaderno, La Nueva España, El Comercio, etc.
Ente 2013 y 2014 presentó’l programa ‘Territoriu Sidreru’, na TPA, onde percorrió Asturies conociendo llagares, chigres, eventos… y entrevistando a espertos nel campu de la sidra. Collabora dacuando nel programa de la RPA, ‘Noche tras noche’ y de forma habitual cola canal de televisión y radio na rede Alderiques, con entrevistes y reportaxes de radio y televisión, como presentador y coordinador de conteníos.
En 2017 cofundó CuatroGotes Producciones, empresa dedicada al audiovisual, la comunicación, el márketing, la edición y la xestión cultural y d’eventos. Ente los proyectos que ta dirixendo nesti nuevu camín ta la plataforma de televisión per internet PlayPresta, Premiu GAVA a la Meyor Inovacción Tecnolóxica nel sector audiovisual en 2019, y la dirección d’audiovisuales, com los documentales “Escribiendo’l camín. 30 años de Xuntes d’Escritores Asturianos” o “Elles, muyeres na lliteratura asturiana”, con trés capítulos emitíos en 2020 en TPA. Xunto a esta productora torna a TPA en 2018 con un programa dedicáu a la Sidra d’Asturies en prime time, Mundu Sidreru, como director y presentador, nesti momentu lleva trés temporaes grabaes.
Ye tamién director de la revista de turismu, ociu y cultura VIAXAST Ver Asturies y de la plataforma de noticies lliteraries y culturales Formientu.com.
En 2021 estrenó xunto a Arantxa Margolles el magacín radiofónicu Sentir Asturies, na RPA. En 2022 estrenó’l programa Asturies 81:21, la hora de l’autonomía, un espaciu d’entrevistes a les figures más relevantes na configuración y la construcción de l’Asturies autonómica, coincidiendo col cuarenta aniversariu del Estatutu.
Ye miembru del Colexu Profesional de Periodistes d’Asturies dende la so fundación, asina como de l’Asociacón de la Prensa d’Uviéu.
Escéniques
En 2004 impulsó dende Xareos! Xestión Cultural, y xunto a Benxa Pérez, la modernización del monólogu asturianu, entamando eventos rellacionaos con esti xéneru y espublizando en 2008 la primer Antoloxía de monólogu modernu “¡Pa echar unes rises!, con testos propios y d’otros autores, que preparó y prologó pa Ediciones Trabe. En 2011 asoleyó un nuevu volume tituláu “Más monólogos… ¡Pa echar unes rises!”, con testos de nuevos autores.
Como monologuista actuó n’espacios escénicos per tol país, incluyendo’l Teatru Campoamor d’Uviéu, dientro de la Muestra de Folclor Ciudá d’Uviéu, y tamién en delles ocasiones pa los emigrantes asturianos en llugares como Bruseles. Amás, collaboró como actor en dellos proyectos audiovisuales, como’l primer llargumetraxe n’asturianu de la hestoria, “Bernabé”, dirixíu por Pablo Casanueva, y onde fai un pequeñu papel.
Nesti ámbitu tien impulsaes y dirixíes iniciatives escéniques como visites guiaes teatralizaes sobre Gaspar y Xosefa Xovellanos en Xixón, o la Nueche d’ánimes de Llanera.
Trabayó xunto a Sergio Buelga na redacción del informe pa la declaración como BIC del Teatru Popular Asturianu.
Lliteratura
Como articulista, escritor y traductor tien collaborao en publicaciones como El Gomeru, AGE, Lletres Asturianes, Reciella Malory, Lliteratura, La Ratonera, L’asturianista, Fusión Asturias, La Nueva Quintana, La Migaya, Formientu, El Espinete, N’ast. Cartafueyos d’ensayu, Ítaca…
Amás, na Selmana de les Lletres Asturianes del añu 2006 foi seleicionáu na antoloxía ‘L’álbum de Talía’, editada pola Xunta Xeneral del Principáu d’Asturies pa la llectura de testos teatrales polos diputaos, participando otra vegada en 2011, na antoloxía de testos de la mina dedicada nesi casu a Mánfer de la Llera. En 2015 apaez nes antoloxíes ‘Mina de palabras’ y ‘Instant.es’, asoleyaes pola Asociación d’Escritores d’Asturies.
Como lliteratu tien algamao dellos premios: El prestixosu premiu Fernán Coronas de poesía en 2016, segundu premiu nel II Concursu ‘Minimorium’ de rellatu hipercurtiu por ‘La viesca n’ochobre’ de La Voz de Asturias, Mención Especial nel III Premiu de Poesía de Primavera de Piloña pol poemariu ‘Los Xarrones de l’Alcordanza’, primer premiu nel I Concursu de rellatu curtiu ‘Muyer y participación’ pol rellatu ‘Suañar en tiempu de guerra’ y Premiu ‘Pepe Campo’ de monólogu cinco vegaes, en 2006 pol testu ‘Los asturianos al volante…’ (escritu a comuña con Isaac de l’Arada), en 2008 por ‘Les vacaciones’, en 2010 por ‘La mio fía cásase’, en 2013 por ‘Yá llegó la Navidá’ y en 2016 por ‘Les coses de la política nueva’. Amás foi cuartu premiu nel ‘Ier Certame de Rellatu Curtiu La Caleya’, otorgáu pol Conceyu d’Astorga (Lleón), pol cuentu ‘El ruíu que facíen les piedrines’, premiu ‘Atrévete’ de la Fundación Asturias de la UXT en 2010 pol rellatu ‘Salir a la escuridá’, el I Concursu de Microrrellatos y Poesía Carmen Ruíz-Tilve Arias pol poema ‘Regatu’ o’l primer premiu nel VIII Concursu de microrrellatos “L’horru del Carbayedo” por ‘8:43’ y segundu en 2016 por ‘L’enemigu’. [Consultar llistáu de premios lliterarios y periodísticos]
Tien feches y espublizaes en delles revistes tornes al asturianu d’obres en gallegu, castellán, catalán, inglés, portugués o francés, ente otres llingües. Ente les que destaca la obra pa la reciella de Madonna, “The English Roses”.
En 2012 estrenóse nel campu de la lliteratura infantil col llibru “Nel, el coríu que nun sabía nalar”, asoleyáu pola editorial AsturtOOns con ilustraciones d’Enrique Carballeira. En 2020 ganó con Vero Suari’l Premiu de Lliteratura Infantil y Xuvenil “María Josefa Canellada” por “La curuxa Catuxa”. En 2016 asoleyó’l so primer poemariu ‘Tierra podre’ con Ediciones Camelot, al que siguieron en 2018 ‘Patria en pallabres en menores’ con BaxAmar Editores y ‘Nes ruines de la nueche y les hores’ con Trabe, y el llibru de rellatos ‘Cartes nel horru (y delles hestories más)’ en 2019, con Cuatro Gotes Ediciones.
Ye miembru de l’Asociación d’Escritores d’Asturies dende 2016, siendo’l so ayalgueru dende 2020 a 2023.
Xestión cultural
Nos últimos años collaboró na creación y xestión de numberosos eventos y actividaes culturales, ente los que destaquen los Certámenes de Monólogu Modernu n’Asturianu (Xixón, 2005 a 2007), la Diada per la Llengua, cultura i tradicions dels pobles de Mallorca i Principat d’Astúries (Santa Margalida, Mallorca, 2005), l’Arribada, vagamar lliteraria (Xixón, 2006 a 2008), el Ier Congresu de Cultura Xaponesa: “Asturies y Xapón, Fusión de Cultures” (Uviéu, 2009) el Congresu de Cultura Asturiana Mozo (Uviéu, 2013), el Festival Arcu Atlánticu de Xixón o’l Congresu Internacional de Llingua Asturiana en Madrid (2022).
Nel tiempu del confinamientu pol Covid-19, dirixó xunto a Diego Solís, el #FormientuEnCasaFest, un festival de más de 60 díes duración, fechu dende casa por artistes de tolos ámbitos de la cultura asturiana, que superó los 100.000 espectadores y tuvo una gran repercusión.
Dende Cuatro Gotes Producciones dirixe dende 2023 el festival TrasieguFest, centráu na cultura sidrera asturiana y la creación contemporánea.
Enseñu
Tituláu pola Universidá d’Uviéu como profesor d’asturianu pa secundaria, bachilleratu y FP, trabaya davezu como maestru de cursos de llingua asturiana p’adultos, faciendo esti llabor na Universidá Popular de Xixón, en cursos de l’Academia de la Llingua Asturiana, Iniciativa pol Asturianu y el CUPA, amás de n’otros pa funcionarios de dellos conceyos asturianos. Dende 2013 participa como profesor en cursos de xestión cultural de la Universidá Asturiana de Branu (UABRA), entidá de la Universidá d’Uviéu y l’Academia de la Llingua Asturiana. Dende 2015 dirixe’l programa de cursos d’Iniciativa pol Asturianu. En 2016 entamó’l so llabor na docencia oficial nel IES númberu 5 d’Avilés pasando darréu per otros centro en Xixón y La Pola Siero. Nel Real Institutu Xovellanos entamó les primeres Xornaes de Llingua Asturiana del centru.
Nel tiempu la cuarentena foi’l profesor d’asturianu nel espaciu EducasturTV, en TPA, grabando dende casa más de 20 programes con clases d’asturianu pa siguir dende casa. En 2023 estrenó l’espaciu “¿Cómo ye, ho?“, un espaciu de dilvugación del asturianu nes redes sociales, amás d’una plataforma con materiales de deprendimientu.
Diccionarios
Nel añu 2006 espublizó’l primer diccionariu del asturianu con una llingua estranxera, el Diccionariu básicu asturianu-inglés / inglés-asturianu// Introductory Asturian-English / English-Asturian Dictionary (Con entamu d’Ana Cano, presidenta de l’Academia de la Llingua Asturiana y Decana de la facultá de Filoloxía de la Universidá d’Uviéu).
En 2012 y pal Centru de Terminoloxía Asturianu, TermAst, organismu de l’Academia de la Llingua Asturiana encargáu de la normativización de la terminoloxía técnica n’asturianu, preparó una Terminoloxía de Turismu con alredor de 900 términos d’esti sector espresaos y definíos n’asturianu.
Revista Formientu
En 2006 funda la revista revista lliteraria Formientu, editada pola Asociación Xareos! Xestión Cultural col enfotu de dar a conocer a les voces más nueves de la lliteratura asturiana. Embaxo la so dirección y a los llargo de diez años asoleyáronse quince númberos, pasando pela revista cuasi un cientu de los autores mozos asturianos, lleoneses, mirandeses… qu’usen la llingua asturiana nes sos composiciones. Dirixe la revista hasta 2017, cuando cede’l téstigu a Diego Solís y Claudia Elena Menéndez, nel camín de caltener la mocedá y l’anovación continua na revista. Sigue implicáu como editor dende Cuatro Gotes Ediciones.
Investigación
Como investigador algamó en 2007 los premios de l’Academia de la Llingua Asturiana ‘Concursu de recoyida de material toponímico’ (con Marta Lozano Carbajal) pol trabayu sobre’l so pueblu familiar “Toponimia de La Collá (Siero)” becáu pol Conceyu de Siero y qu’asoleyó l’ALLA dientro de la so coleición “Toponimia” y un accesit nel ‘Concursu de recoyida de material lliterario escrito Federico Fierro G.-Botas’ pola edición de ‘Nieve en el puerto’ d’Eladio Verde. En 2008, recibe dos accésit del mesmu premiu polos trabayos titulaos ‘Cosiquines de pocu más o menos d’Antonio Pérez González’ y ‘Poesíes asturianes en Nostalgia de Francisco de la Vega’, y en 2009, repite con ‘Amuesa de publicidá en llingua asturiana’. En 2010 algama otru accesit nel ‘Concursu de recoyida de material lliterario escrito Federico Fierro G.-Botas’ por ‘Yo quixera cantate y otros poemes llangreanos (1921-1976)’, volviendo a algamalu en 2014 por ‘Coples d’Antroxu y otros testos n’asturianu con Xixón de fondu (1898-1928)’.
Amás, tien espublizaos artículos d’ensayu en delles revistes y participa davezu de congresos del campu de les humanidaes con comunicaciones y conferencies, sobre lliteratura, toponimia, comunicación, etc. Dio conferencies en congresos nes universidaes de Barcelona, Uviéu, Aveiro, Porto, Varsovia o Oxford, amás de n’otros espacios.
En 2020 defendó la so tesis doctoral “La llingua asturiana nel franquismu”, que foi calificada con Sobresaliente cum laude y propuesta a Premiu Estraordinariu de Doctoráu. En 2021 Ediciones Trabe editó la so tesis na colección Batura, embaxo’l títulu ¡Volved las manos al bable! La llingua asturiana nel franquismu.
En 2023 fíxose col I Premiu Yolanda Huergo d’investigación n’asturianu pol estudiu sobre la lliteratura asturiana fecha por muyers “Los cuartos propios de la lliteratura asturiana. Una conversación colectiva”.
En 2023 punxo en marcha l’Archivu de la Represión Llingüística del Asturianu [ARLAS], que recueye testimoniu audiovisual de persones que carecieron situaciones de discriminación llingüística pol usu del asturianu.
Activismu
En 2011 impulsa la fundación de la ONG Iniciativa pol Asturianu, convirtiéndose nel Ier Congresu de la organización, en febreru de 2012, nel so primer presidente hasta 2019, cuando’l periodista Iván Llera tomó’l relevu. Dientro de la entidá coordinó yá cuatro ediciones del Seminariu “Oficialidá: el camín constitucional de futuru pal asturianu”. Na actualidá sigue venceyáu a la entidá como Responsable de Rellaciones Institucionales ya Internacionales. Dende 2015 ye miembru de la organización internacional ALCEM (Association pour las langues et cultures européens menacées) asina como del Conseyu Asesor de Normalización Llingüística del Conceyu de Xixón, en representación d’Iniciativa pol Asturianu, hasta 2019.
Participa, amás, del activismu cultural, fundando y presidiendo ente 2006 y 2012 el Conceyu Universitariu pol Asturianu (CUPA), como secretariu del Atenéu Cultural Xuan María Acebal y como collaborador d’otres organizaciones como Periodistes pol Asturianu, Internautes pol Asturianu, La brisa del Xapón, Xareos! o l’Associaçon de la Lhéngua i Cultura Mirandesa.
La so actividá reinvidicativa llevólu a convertise en miembru estudiantil del Claustru de la Universidá d’Uviéu, el máximu órganu de representación universitariu, convirtiéndose dempués en miembru de la Comisión de Normalización Llingüística de la Universidá d’Uviéu, impulsada pol CUPA nel tiempu del Rector Gotor. Amás tien participao en campañes pol asturianu y denunciao dellos casos de marxinación sufríos por usar el so idioma.
Tien participao en foros internacionales de la ONU y otros organismos internacionales pa esplicar la situación del asturianu dende distintos puntos de vista.
Foi ún de los fundadores y hasta la so dimisión en 2008, primer presidente de l’Asociación Cultural l’Arribada, qu’organizaba cada añu un alcuentru lliterariu en Xixón.
Academia de la Llingua Asturiana
Miembru de númberu de l’Academia de la Llingua Asturiana (ALLA) dende 2022, venía collaborando cola institución dende munchos enantes, mesmo con publicaciones, que como profesor de la Universidá Asturiana de Branu, na que s’estrenó como Secretariu en 2023. Ye tamién l’académicu responsable de la Biblioteca de la institución y forma parte del equipu de la Xunta de Pedagoxía, amás d’otres xeres.