Esti xueves 7, a les nueva la mañana, Inaciu Galán, periodista que prepara la so tesis sobre la situación del asturianu nel Franquismu, va facer una introducción al tema dientro de los actos del XVI Congresu Internacional de Xóvenes Investigadores d’Hestoriografía y Hestoria de la Llingua Española que se celebra dende’l miércoles en La Llaboral de Xixón.
Nel paraninfu de La Llaboral, embaxo’l títulu “Una güeyada a los discursos llingüísticos na Asturies del Franquismu” y dientro del ciclu de comunicaciones dedicaes a la sociollingüística nel Congresu, Galán va facer la única de les comunicaciones que va presentase n’asturianu nesti eventu internacional qu’axunta en Xixón a investigadores mozos de dellos países.
A lo llargo de la comunicación, d’una media hora de duración, ta previsto que s’amuesen delles idees alredor de la situación que vivió la llingua asturiana na so convivencia col castellán nes distintes etapes del Franquismu. Dende les prohibiciones que vivieron toles llingües distintes del castellán, y cómo esto influyó a la llingua asturiana, hasta les discusiones internes ente partidarios y detractores del asturianu del propiu réxime franquista.
Inaciu Galán y González (Xixón, 1986) Máster en Sociedá de la Información y el Conocimientu na Universitat Oberta de Catalunya (UOC), Graduáu en Periodismu pola Universidá a Distancia de Madrid (UDIMA), Diplomáu en Turismu y Especialista en Xestión Cultural pola Universidá d’Uviéu. Ta formáu como profesor na especialidá d’asturianu col Máster de Formación del Profesoráu. Anguaño prepara la so tesis doctoral sobre la situación de la llingua asturiana nel Franquismu. Ye periodista de profesión, pero la investigación siempres-y prestó pola vida, autor de dellos libros, ente los que destaca’l primer diccionariu asturianu-inglés/inglés-asturianu, investigó y publicó artículos alredor de la llingua asturiana nel campu de la hestoria, la lliteratura, la toponimia o los medios de comunicación. Participó en numberosos congresos y xornaes alrededor de les llingües minorizaes d’Europa, n’universidaes como la de Barcelona, Aveiro o Oxford.