Mio güelu Arturo, de La Collá (Siero) mandóme estos díes un rellatu escritu por él n’asturianu. Nun hai cosa que más me pueda prestar. El so asturianu ye perfechu y el testu namás tien unes poques igües ortográfiques pela mio parte. La hestoria entretenida, un daqué picante y averada a les tradiciones del país. Aguardo que vos preste.
La plantá de la h.oguera
Primeros de xunu d’un añu cualquiera en La Nueva Llanes. Sentaos nun tacón de carbayu na carbayera de xunto a la bolera tán Severo el de La Raposa, mozu yá llibre de quintes y un poco tayudu, y Colombina La Roxona, moza rescamplada y fachendosa de les que nun s’arrugen con pamplines.
-¿Pa qué taben falando contigo esos cuatro mozos del barriu d’abaxo?- diz la Colombina a Severo.
-Pos verás, quieren que como mozu mas vieyu de La Nueva, organice la plantá de la h.oguera d’esti añu.
-¡¡Coñu!! -contesta Colombina- ¿Y cuánto tardáis en facelo?
-Pos… -contesta’l mozu- un día pa buscar l’ucalitu apropiáu (afortunadamente dende qu’hai ucalitos, estos son los más apropiaos, pola llargura y lo derechos que son, ansina nun se corten árboles de más valor ecolóxicu), cortalu, descañalu y descortezalu, y otru día pa facer el pozu, la zanxa, la petera pa llevantalu y plantar la h.ogera. ¡¡Ah, amás tenemos que tomar unes caxes de sidra n’El Cerrucu!!
-¡¡Mui guapo!! -contesta la moza- ¿Y cuándo contáis facer el trabayu?
-Pos el sábadu y el domingu que vien.
-¿El sábadu nun quedasti de sallame les fabes y el maíz de la llosa de xunto a casa, que dixisti taba perdida de boliche, y qué ye que’l domingu nun vas llevame al baille de Casa Nula, que vien a tocar la curdión Arturo’l del Mazucu y van poner la gramola.
-Nun te precupes “palombina” que faigo’l trabayu otru día.
-Y, amás -sigue la moza- tu sabes el peligru que tien el plantar la h.oguera. ¿Nun t’alcuerdes lo que paso fai trés años cuando cayó’l palu y casi mata a Pachu’l de Cabianes. ¿Sabes qué te digo?, ¡qué tu nun me dexes viuda enantes de tiempu, tas diciéndome que vamos casamos p’agostu cuando terminemos la herba, l’otru día dices que ná, agostu hai que coyer el maíz. Non, yá lo sé… y dempues les ablanes, más tarde les castañes… ¿Sabes qué? –díxo-y garrándo-y la brageta y restorciendo un pocoñín (La Palombina tresformóse en ferre)- ¡Qué la h.ogera nun la plantes, y si quies plantar esi palucu será cuando yo te diga, onde yo te diga y como yo te diga, ¿quédate claro?
Y garrándo-y la manuca (y por supuestu soltándo-y lo otro) marcharon pali pali pal horru de xunto a casa onde tienen un camastru con un xergón de fueya de maíz, que si tuviera panoyes nun momentu taba desgranáu.
A partir d’esi día Severo nun volvió a falar de plantar la h.oguera y la fecha de boda quedó yá fixa como un fiensu nel calendariu.
Nestor Arturo González
Esto ocurrioséme una nueche de gripe na que nun pudi dormir. Dedicáu al mio nietu y los sos collacios d’internet.
¿Por qué non escribir “f.oguera”?