Güei inclusive Google celebra esti aniversariu, mientres n’Asturies escaecemos los 175 años del primer llibru n’asturianu o los 200 de la nacencia de Xuan María Acebal, quiciabes la figura más asemeyada a la de Rosalía nel ámbitu de la lliteratura asturiana.

Dende Iniciativa pol Asturianu vamos celebrar esti sábadu viniente dellos actos pa intentar que nun s’escaezan estes feches hestóriques, que les nueses alministraciones inoren dafechu.

Y por fin, los poemes de Rosalía de Castro:

María García al violonchelu y Marcos Álvarez a la guitarra van ser quien pongan música a los testos escoyíos qu’integren la publicación de les Xustes Lliteraries que se presenta. Un recital dirixíu por Ana Belén Rodríguez nel que van ser les voces de los mesmos autores quien espresen énte’l públicu les idees y sentimientos inherentes a les sos creaciones lliteraries.

L’accesu ye llibre y gratuitu hasta completar aforu.

El Conceyu de Cangas y l’Academia de la Llingua Asturiana (ALLA) entamaron una edición especial del Día de les Lletres Asturianes en Cangas. El teatru Toreno foi l’escenariu d’esta celebración. Ana Cano, recordó que’l Día de les Lletres Asturianes celébrase’l primer vienres del mes de mayu y que “nun puede sacase del Teatru Campoamor d’Uviéu”. Sicasí, anguaño a propuesta del Conceyu de Cangas el Día de les Lletres tuvo llugar esta celebración previa.

[youtube http://www.youtube.com/watch?v=JpJzfqGw4VE&w=560&h=315]

Echo tanto de menos dormir contigo

Abrazame a ti

Y sentite respirar en metá de la nueche

Tocate a palpu

Y afayar formes nueves nel to cuerpu

Pegame a ti

Y notar el calor del to cuerpu candial

Raspiate los pies

Y notalos fríos nun respingu prestosu

Esconsonar a les tantes

Y abrazanos y besanos adormecíos

Llevantame pela mañana

Y faceme’l dormíu pa que m’espiertes

Agora la cama yá nun güel a ti

Y duermo atristayáu na to xaceda

INACIU GALÁN Y GONZÁLEZ

Onde nun tuvi

Otónima facendra ta bati

mirendra plácanta

secera buego arriendi

-¿Qué quier dicir?

Ye l’aire que pasa fresco

y purifica l’alma escura

del señor de les tierres d’arribona

que lleva l’orbayu al valle,

la ñeve a los cordales, acullá,

onde los homes nun pisamos la tierra virxe.

-¿Ónde va l’alma?

Visita regueros percorriendo

con fuercia la piedra caliza

furando ensin priesa y al final

dexando ver lo que piensa la tierra.

INACIU GALÁN Y GONZÁLEZ

Foya

Salía na llista

y anque fueran xuntos a escuela

anque al otru lu convidare a una botella apocayá,

acabó na foya col restu los enemigos

aquellos colos qu’ayeri ríen en chigre

y a los que güei dexaron sangrando na cuneta

por nun sé qué cafiante sinrazón.

INACIU GALÁN Y GONZÁLEZ

Güei, vienres 7 d’avientu a les ocho la tarde, estrénase nel Auditoriu Teodoro Cuesta de Mieres del Camín la versión n’asturianu de La Lluna de Nela, una obra de Pedro Durán que va representase agora n’asturianu con una torna mía.

La obra, de la compañía profesional Ambigú Media Broadcast, tien por actores a Leticia Díaz de la Mata y Pedro Durán, embaxo la direición de producción de María Eugenia Muñiz.

El diseñu de lluces y téunicu en xira ye Alberto Ortiz Sanmartín, la escoyeta musical ye de Katia Aboli y el diseñu y confección de vestuariu d’Azucena Rico. Los materiales n’escena tán al cargu de David Cueña y el diseñu gráficu de David Zabaleta.

Aguardo que vos preste y espero que’l testu nun sufriera muncho nes mios manes.

Esti númberu cuatro inclúi poemes de Xuan Porta, Lauren García, Marta Mori, Xurde Fernández, Cristina Menéndez Martín, David Fernández, Roberto González-Quevedo, Xicu Monteserín, Manuel Asur, Ricardo Saavedra Fernández-Combarro, Marisa López Diz, Irma González-Quevedo Pedrayes, Inaciu Galán y González, Xe M. Sánchez, Mª José Fraga Suárez, Helena Trexu Fombella, Abel Aparicio González, Berto García, Ángeles González Fuentes, Carmen Uría Araujo, Pachu Menéndez, Ánxel Álvarez Llano, Mª Esther García López y Santi Fano, qu’ilustra amás esti volume.

Na estaya de prosa espublízase “El silenciu”, de Berto Cobreros, “Cuentos pequeñinos” de Vicente García Oliva, “La bona intención” y “Una onza de chicolate”, de Xosé Bolado, “Chicolate”, de Xurde Fernández, “Fuzzy logic”, de Xe M. Sánchez, “Cuidáu cola tragancia”, de Xulio Arbesú, “Col meyor vistíu”, de Cristina Menéndez Martín, “Pyrus communis”, d’Inaciu Galán y González, “A moza d’Agapito”, d’Aurora García Rivas, “El falante”, “La lletra” y “La llingua tarazada”, d’Ánxel Nava, “Milagros”, de Marisa López Diz, “Acuicultura” d’Helena Trexu, “Les llarasques de felechu”, de Xosé Ramón Lozano Cuervo, “Diariu”, de Carlos Rubiera Tuya y “La ferrería”, de Lluis Muñiz Antuña.

No que cinca a les tornes, Héctor Xil torna un testu en prosa de Jonathan Swift y Xaviel Vilareyo a José Luis Garci. Esti autor asoleya tamién un testu de teatru que pieslla esti númberu, baxo’l títulu “La igua”.

Aguardo que vos preste.

[youtube http://www.youtube.com/watch?v=QN1jFOleW2w]

Permitíme participar con un testu col que gané’l Premiu Pepe Campo de monólogu en 2010 “La mio fía cásase”, amás del entamu del llibru. Anímovos a pasar un ratín echando unes rises con él.

Esti sábadu 31 a les 12:15 la TPA va emitir una entrevista dientro del programa Pieces na que-y cuento a Vanesa Gutiérrez dalgunos detalles del llibru y falamos del estáu del monólogu asturianu anguaño. Podéis ver la TPA en direuto nesti enllaz.

La nota editorial diz lo siguiente:

En 2008 espublizamos nesta mesma colección la primer parte de ¡Pa echar unes rises! Antoloxía de monólogu modernu, onde presentamos al públicu llector lo más nuevo del monólogu asturianu. Agora, unos pocos años dempués, el monólogu modernu ye un xéneru con una llarga esperiencia, a lo qu’ayudaron iniciatives como’l Premiu Pepe Campo de monólogos, los circuitos d’actuaciones nos teatros y chigres del país y la presencia nos medios.

Nesti volume nuevu va atopase’l llector con un xéneru afitáu, con autores con muncha personalidá a los que podríemos estremar d’otros namás con lleer un par de los sos monólogos. Ye esta una antoloxía na qu’apaecen monologuistes de toa triba. Unos especializaos nel xéneru, como Carlos Alba (que presenta testos de trés de los sos personaxes), otros escritores avezaos d’otros xéneros, como Sixto Cortina o José Luis Piquero, que decidieron metese per caminos nuevos nel so llabor de lliteratos, y en dalgunos casos actores que dieron el pasu a la xera lliteraria, como Lluis Antón González, Sara García o Silvino Torre. Completen esti volume Alberto Suárez, Azucena Álvarez, Montserrat Garnacho, Carlos Briansó y Inaciu Galán.

Páxina de Trabe: Mercar el llibru

L’Academia de la Llingua Asturiana espublizó apocayá’l númberu 28 de “Lliteratura. Revista Lliteraria Asturiana”. Nel númberu asoleyen un monólogu de mio “La mio fía cásase”, premiáu col Pepe Campo de monólogu de la Sociedá d’Humanitarios de Morea en 2010.

Na publicación, dirixida por Xosé Bolado, cuerre la parte narrativa d’esti númberu al cargu de José Luis Rendueles, col rellatu «Lentu». Roblen la estaya de poesía Lauren García («Asturies Madrid», «San Fermín» y «San Emiliano»), Héctor Pérez Iglesias («El ríu rinchó como la exa») y Lurdes Álvarez («Ehí vas», «Versión d’un día», «De mano en mano agua» y «Éxodu»). Siguen darréu una entrevista de Mª Paz Fonticiella a Montserrat Garnacho; un ensayu de Vicente García Oliva («Lliteratura versus política o l’últimu intentu fallíu») y traducciones d’Antón García («Diecinueve poetes norteamericanos del sieglu XX») y Toli Morilla adautando a Bob Dylan («Otru café más», «Sara», «Llamando a les puertes del cielu», «La finca de Mari» y «L’home qu’hai en mi»). La revista zárrase cola crítica de Luz Pichel títulada «A propósitu d’Arroz, agua y maíz de Berta Piñán» y el mio testu.

El llibru coordináronlu Rafael Rodríguez Valdés y Luis Casteleiro y repartióse de baldre nes llibreríes asturianes nel Día del Llibru n’Asturianu. Ente los collaboradores tán tamién Ignaciu Llope, Roberto González-Quevedo, Xuan Xosé Sánchez Vicente, Lluis Xabel Álvarez, Amelia Valcarcel y asina hasta 25.

Mánfer, nel bandu perdedor

Inaciu Galán y González

Conocí a Mánfer nel añu caberu de la so vida, pero llegué a tenelu en muncha estima. Enantes de conocelu en persona, almirábalu pola so trayectoria de compromisu cola llingua asturiana, dempués quíxilu tamién como amigu, porque Mánfer facíase querer, pola so simpatía y humildá. Pese al reconocimientu que tol mundu-y facía sentir como clásicu vivu de les Lletres Asturianes que yera, nunca nun se dexó llevar polos afalagos y seguía siendo una persona cercana, que conectaba mui bien colos más mozos del movimientu asturianista, albidro que pola so vitalidá.

La llegada de los años del Surdimientu supunxo pa Mánfer, entrar dafechu nun movimientu de defensa del asturianu pol que trabayó abondo y nel que tuvo activu, y esto ye lliteral, hasta los últimos díes. Mánfer, xunto a Llorienzu Novo Mier y otros pocos, foi ponte ente los vieyos ‘escritores en bable’ y les nueves xeneraciones del Surdimientu y namás por esi saber adaptase y evolucionar colos tiempos, namás por convertise en ponte ente xeneraciones, la so figura tendría que tenese mui en cuenta, pero hai muncho más.

El so llabor periodísticu ye tamién mui destacable, participó nos primeros programes de radio n’asturianu, emitíos na emisora EAJ 34 Radio Gijón, y entamaos por Conceyu Bable dende 1975. Amás, dirixó la sección decana del asturianu nos periódicos: ‘Alitar Asturies’ d’El Comercio dende 1978 hasta los años noventa. Por ello ye tamién unu de los pioneros del periodismu n’asturianu actual.

Sobre la so vida pudi falar con él cuando lu entrevisté, xunto al so fíu Ramón, el 18 d’ochobre de 2004, en Lluanco. Tuvi l’honor y la triste casualidá de ser la última persona n’entrevistalu y diose la doble casualidá de que foi Mánfer la primer persona entrevistada n’aquel programa. Foi n’Onda Peñes, n’aquel proyectu llamáu Asina foi… el Surdimientu, y paezme que ye una bona oportunidá pa recordar munches de les coses que Mánfer dixo aquel día, na so entrevista última.

Mánfer ñació en Les Cuestes, Ciañu y como él mesmu recordaba na entrevista «ellí tol mundu falaba asturianu, los probes y los más ricos», polo que dicía «escribir n’asturianu foi dalgo natural». Mánfer vivió los tiempos nos que la nuesa llingua pasaba los peores momentos «l’asturianu yera una cosa que taben quitando, nes escueles quitábase-y a los neños de falala y nes biblioteques nun había nengún llibru n’asturianu, quitando dalgún llibrín de monólogos», ye por ello que nunca nun pensó que la vida lu llevaría a lo qu’él llamaba «lluches de talu altor pola llingua», como la reclamación de normalizala, oficializala etc.

Porque Mánfer yera escritor n’asturianu, pero sobremanera yera un militante de la llucha pola llingua asturiana y siguía siendo, pese a la so edá, mui combativu. Aquel día, nel que lu entrevisté, nun foi menos y al pregunta-y pol futuru del idioma entamó’l discursu pidiendo al Gobiernu Asturianu que nun fuere tán «antiasturianu», que nun tuvieren «tán a la escontra de tolo asturiano».

Na Navidá cabera de la so vida, la de 2004, intercambiamos felicitaciones navidiegues. Guardo la de so con munchu ciñu. Nun imaxinaba que meses dempués díbemos a perdelu pa siempres.

Pocos díes enantes de la so muerte falé con él. Taba nel hospital, pero nun perdiere l’ánimu. Falaba de proyectos de futuru, del so llibru próximu, facía bromes… y llegó-y el final. Namás sabelo recordé con rabia les sos pallabres, les últimes que dixo nel mio progama, «nun me prestaría morrer ensin ver la oficialidá de la llingua asturiana». Tantos años de llucha y Mánfer morría con esi oxetivu ensin concluyir, pero eso sí, dexándonos el camín menos pindiu, l’oxetivu más cerca.

Ta bien claro que dempués de más de mediu sieglu puxando pol asturianu, polo menos dende la publicación en 1953 de “Cuentos en verso asturiano”, la herencia de Mánfer ye la d’una llingua con más prestixu social y la d’una lliteratura cada vegada de meyor calidá.

Tres la so muerte, nel programa Asina foi… el Surdimientu celebramos el primer homenaxe a la figura del escritor de Ciañu, pero tamién al amigu que yera. Foi un día complicáu, en metá de la emoción teníemos de coordinar munches entraes telefóniques con amigos y familiares de Mánfer, los medios yeran escasos y eso dificultó les coses (la emisora nun podía permitise conexones con teléfonos móviles, por exemplu), pero les coses fueron saliendo y pudimos facer l’homenaxe que sentía que-y debíemos a Mánfer. Participaron el so fíu Ramón d’Andrés, Xuan Xosé Sánchez Vicente, Helena Trexu, Vicente García Oliva, Toli Morilla, Carlos Rubiera… unos pocos de los munchos a los que-yos prestaría homenaxear a Mánfer.

Viendo los sos años últimos, dedicáu al llabor lliterariu, periodísticu, pue paecer una vida acomodada. Pero nun foi asina pa nada. La so vida nun foi fácil, Mánfer siempres tuvo nel bandu perdedor. Yá na Guerra y na llarga posguerra, pasando penuries estra pola so militancia republicana, dempués como mineru con silicosis, como xubiláu en plena reconversión, como falante d’una llingua en peligru, como ciudadanu ensin los sos drechos reconocíos por ello.

Agora tolos asturianos dedicámos-y la Selmana de les Lletres Asturianes con almiración y ciñu, anque ensin dulda’l meyor homenaxe que se-y podía facer ye’l de ver la so llingua nuna situación digna y a los sos falantes con drechos plenos, ye dicir, falando una llingua col estatus d’oficialidá afitáu.