DISCURSU ENTREGA DIPLOMES
III CURSU D’ASTURIANU EN XIXÓN
CUPA / ALLA / INICIATIVA POL ASTURIANU
XIXÓN, 5 DE FEBRERU DE 2013
Inaciu Galán y González
Perestimáu académicu, alumnes, alumnos, amigos y amigues:
Tamos equí aconceyaos pa facer entrega de los diplomes acreitativos a los trenta alumnos que participaron nesta tercer edición del Cursu d’Asturianu en Xixón, del Conceyu Universitariu pol Asturianu, l’Academia de la Llingua Asturiana y esti añu, per primer vegada, tamién, d’Iniciativa pol Asturianu.
Presta ver qu’una vegada más sigue habiendo demanda, la xente quier deprender la so llingua. Trés ediciones en poco más de dos años y más d’ochenta alumnos yá pasaron per estes aules. Y esto, en metá de la mala situación que vive la nuesa sociedá.
Cada martes y xueves vengo contentu, a esti llugar a atopame con vós, un grupu maraviyosu que punxo toles ganes y tol trabayu nel cursu. Como profesor del mesmu nun puedo tar más satisfechu, les hores quedaron curties pa tol interés que poníen los alumnos en deprender, pero les clases vagaron pa que güei marchéis con un bon nivel d’asturianu, como dalgunu yá demostró na Prueba de Conocencia Básica de la lingua asturiana.
A lo llargo del cursu estudiamos gramática, vocabulariu, escuchamos cantares, vimos audiovisuales n’asturianu, conocimos daqué de la nuesa lliteratura y exercitamos l’usu del asturianu de forma oral. 36 hores qu’aguardo vos fueren granibles y aprovechaes, anque habrá que siguir trabayando pola recuperación del vuesu idioma cada día. Yo mesmu, con vosotros, deprendo cada día nel cursu, aquella pallabra qu’usa la güela d’unu, aquella otra que sinto pela cai…
Pero alumnos, tengo males noticies. Acabáis de deprender una llingua con problemes. Agora sois falantes alfabetizaos d’una llingua en peligru y va tocavos poner un granín d’arena pa qu’espoxigue y nun muerra. La bona noticia ye que toos, caún nel so ámbitu pue facer coses pol asturianu. Falando colos amigos, tresmitiéndolu a los fíos, a los ñetos, mercando llibros n’asturianu o productos etiquetaos na nuesa llingua, lleendo o sintiendo medios de comunicación n’asturianu, usándolu nel trabayu, na empresa, na asociación de vecinos, esixendo a les alministraciones que la usen en cumplimientu de la Llei… Pue paecer una mala noticia, pero tamién ye romántico pensar que podemos lluchar pola nuesa cultura y facer muncho.
Porque tolos asturianos somos responsables del futuru de la nuesa llingua y esti constrúise cada día, y pasu ente pasu, col nuesu esfuerciu y sobre manera, col usu continuu y en tolos ámbitos.
Prestaríame tener un comentariu especial pa persones que nesti cursu vienen de fuera y a los qu’acoyemos n’Asturies colos brazos abiertos. Apuntándovos a esti cursu tais dando un exemplu a munchos asturianos. Gracies por sumar cola vuesa presencia y el vuesu esfuerciu, un falante más a la nuesa llingua milenaria y enfermuca.
Tamién, un momentu pa falar de los alumnos que mos siguen a distancia, hestories llamatives como les d’un mozu suizu-chilenu con nenguna rellación con Asturies, que sintió un canar na nuesa llingua y al qu’entós-y prestó deprendela. Otros, son fíos y nietos d’emigrantes asturianos queriendo recuperar la so llingua, y dalgunos, nuevos emigraos, que nun tienen que marchar a buscar trabayu, pero que nun quieren escaecer al so país y a la so llingua.
A toos y toes, quiero davos les gracies por faceme tan fácil y tan prestosu’l trabayu nestos meses y davos la norabona pol aprovechamientu que ficitis del cursu. Espero qu’esti seya namás l’entamu, y que podamos llevar alantre un nivel II del cursu y munches ediciones más d’esti yá tradicional cursu d’asturianu en xixón.
Dende la organización, dar les gracies al Conseyu de Mocedá de Xixón y al so personal pola bona atención, equí nesta casa. Pero sobre too damos les gracies al académicu Xosé Antón González Riaño por tar equí güei, y a l’Academia de la Llingua Asturiana, en xeneral, por tener la iniciativa y cuntar con nós pa da-y continuidá a estos cursos conxuntos en Xixón, pesie a la so mala situación económica. Y sobre manera pol so trabayu nel afitamientu de la llingua asturiana y na defensa del idioma propiu de los asturianos.
Munches gracies.