Categoría: Participación n’eventos

  • Pallabres de pieslle de la Universidá Asturiana de Branu

    l Campu (Casu), 11 d’agostu del 2023

    Alcalde, coordinador de la UABRA, profesoráu, personal de l’Academia, alumnes y alumnos:

    Encárguenme’l presidente de l’Academia y la directora de la UABRA que ponga’l ramu güei, a falta del pieslle oficial y la entrega de diplomes del viniente 12 de setiembre, a esta edición 2023 de la Universidá Asturiana de Branu.

    Va yá cuarenta años l’Academia de la Llingua Asturiana entamó en La Puela (Ayande) y n’Uviéu, la primer edición de los sos cursos, entós centraos dafechu na formación del profesoráu d’asturianu. Empicipiaba a aprucir entós l’actual sistema d’escolarización. Esti añu, cuatro décades dempués, y darréu de trés años, unu de suspensión y dos de virtualización poles circunstancies, la UABRA recupera la presencialidá. 

    Los cursos pasaron estos años per munchos llugares d’Asturies y l’acoyida foi siempres perbona. Nun podemos dicir menos d’esti conceyu Casu, onde mesmo l’alcalde y el so equipu, como les instalaciones hoteleres y hosteleres y el pueblu xeneral fixeron que mos sintiéramos, non como en casa, sinón entá meyor, afayaos dafechu ente estos montes maraviyosos qu’arrodien El Campu. Ye por ello que nun podemos despidinos güei de Casu ensin da-y l’agradecimientu más fonderu a tol equipu de gobiernu y el funcionariáu del Conceyu, pa los que vos pido un aplausu.

    Llegar a un conceyu nuevu, con instalaciones nueves pa nós, siempres ye un retu. Tanto la dirección de la UABRA como’l personal de l’Academia fiximos tolo posible pa que los cursos y la vuesa estancia se desendolcaren coles meyores circunstancies posibles. Vamos tomar nota de toles suxerencies, qu’agradecemos, pa siguir meyorando en futures ediciones. Quiero tener tamién un fondu agradecimientu pal personal de l’Academia, que supo adaptase a les circunstancies y da-y solución a les dificultaes que surden davezu nunos cursos con tantes persones implicaes. Pa ellos pídovos tamién un aplasu. 

    É tamén importante acordarse dos compañeiros da UABRA na Caridá, a outra sede dos cursos, unde a Academia forma al profesorao d’eonaviego. Séi que podemos falar tamén d’un éxito y d’un alumnao, como aquí en Casu, que pon todo el esforzo pra aprender y llevar as nosas llinguas as aulas, as empresas, as asociacióis, as familias… 

    A lo llargo d’estes dos selmanes celebremos cinco cursos n’El Campu, más el cursu celebráu n’A Caridá. Pa poder echar a andar estos cursos ye imprescindible cuntar col alumnáu, pero tamíen diba ser imposible facelo ensin los más de trenta profesores que sacrificaron parte de les sos vaciones p’arriquecer el programa docente d’esa UABRA. Llegaos y llegaes dende l’ámibtu universitariu, pero tamién del profesional y del activismu cultural, pudimos cuntar con un equipu de profesoráu d’un nivel ablucante. L’Academia de la Llingua Asturiana nun tien más qu’agradecimientu pa ellos y elles. La UABRA y l’Academia son la vuesa casa y tenéis siempres les puertes abiertes. Deamos un aplausu al profesoráu.

    Va cuasi venti años que vengo a estos cursos y esti ye’l primeru como secretariu. Anque tuvi dellos de profesor, la mayoría tuvi como vós tais equí güei, d’alumnu. Sé lo bien que se pasa, pero tamién el duru trabayu que tuvistis qu’enfrentar como alumnáu. Quiero felicitavos pol trabayu fechu, pol compromisu col idioma y col país que supón venir a la UABRA en plenu mes d’agostu pa saber más de lo nueso, pa siguir afondando na conocencia del idioma y de la cultura d’Asturies. Güei rematastis un pasu más y toca siguir saliendo a les cais y a los caminos a llevar esa conocencia, valtar prexuicios que, anque cada vuelta menos, siguen presentes na sociedá asturiana.

    Nes actividaes complementaries d’esti añu, unu de los pegoyos de los que ye la UABRA, pudimos averanos a conocer el Parque Natural de redes, los xéneros nuevos de la lliteratura asturiana, la realidá sociollingüística d’Asturies y la tradición oral del conceyu de Casu, pa los que nos prestó abondo tener con nós a delles de les muyeres que meyor caltienen la nuesa llingua nesti conceyu. Foi tamién bien prestoso poder cuntar cola música de La Garulla, Lakadarma y la Nueche en danza, que dalgunos y dalgunes siguieron hasta convertila n’alborecer en danza. Esta ye tamién, la parte del espardimientu y l’amistá, otra de les bones tradiciones de la UABRA. 

    Quiero rematar dando les gracies a toos y toes, por faceme bien fácil esti primer añu como secretariu de la UABRA y convidavos yá a venos d’equí nun añu na viniente edición. Nun dexéis de siguir falando asturianu acaldía, trabayando pol idioma dende onde podáis y ensin dase, porque esta llingua tien futuru siempres que sigamos dándo-ylu nós.

    Munches gracies. ¡Puxa la UABRA! ¡Puxa Casu! ¡Puxa Asturies!

    Inaciu Galán

    Secretariu de la Universidá Asturiana de Branu (UABRA)

  • Presentación en Mieres de ¡Volved las manos al bable! La llingua asturiana nel franquismu

    El xueves vamos presentar ¡Volved las manos al bable! La llingua asturiana nel franquis, en Mieres. Falaremos de dalgunes persones de Mieres que salen pel trabayu, como Julián Burgos o Luis Aurelio Álvarez.

  • Preséntase’l llibru “Entaína a escribir” n’Uviéu

    Esti domingu, 20 de febreru, a les 12.00 hores, va presentase nel Muséu Arqueolóxicu d’Asturies (Uviéu) el llibru Entaína a escribir, qu’axunta los testos premiaos nes seis ediciones d’esti concursu de microrrellatos improvisaos pa la xente mozo.

    Con ilustraciones d’Alberto Pieruz, el llibru incluye 18 microrrellatos de los que son autores Raquel Fernández Menéndez, Inaciu Galán, Ánxela Gómez d’Ávila, Claudia Gutiérrez Lueje, Alma Hidalgo Lucena, Gonzalo Llamedo Pandiella, Pelayo Martínez Olay, Xurde Menéndez Caravia y Solinca Turbón.

    La obra ya una coedición del Gobiernu del Principáu d’Asturies y la editorial Impronta. La presentación lliteraria va tar al cargu de Dolfo Camilo Díaz, y van participar nel actu los directores xenerales de Mocedá, Clara Sierra, y Política Llingüística, Antón García.

    Entrada llibre hasta enllenar l’aforu.

  • Charra nel IES Cangas del Narcea

    ⏰ Esti xueves 17 de febreru voi compartir un ratín col alumnáu del IES Cangas del Narcea pa falar de la hestoria de la llingua asturiana aprovechando pa celebrar el Día Internacional de la Llingua Materna.

  • «Uviéu abierto» acueye la presentación de «La curuxa Catuxa», d’Inaciu Galán y Vero Suari

    El ciclu Uviéu Abierto, entamáu pola Conseyería de Cultura, Política Llingüística y Turismu pa da-y espaciu a  una serie d’actos culturales alredor de la llingua y la cultura asturiana, va acoyer esti xueves 10 de febreru, a les 17:30 hores, na Biblioteca Ramón Pérez de Ayala d’Uviéu, la presentación de La curuxa Catuxa, d’Inaciu Galán y Vero Suari, XIII Premiu María Josefa Canellada de Lliteratura Infantil y Xuvenil.

    L’actu ta empobináu a neños y neñes y ye d’asistencia llibre. Va cuntar cola presencia de los autores, asina como del actor Pedro Durán, como presentador del actu. El llibru edítalu la Conseyería con Impronta Ediciones y tien detrás un proyectu más ampliu col que los autores quieren normalizar l’usu del asturianu al traviés de la figura de Catuxa.

    Autores

    Vero Suari (Xixón, 1983) Diplomada en xestión d’empreses turístiques. Vien trabayando nel ámbitu de la información turística y cultural y como guía d’esposiciones y en ciclos como Xixón Tours. Ye collaboradora de la revista Viaxast y de la plataforma VerAsturies.com

    Inaciu Galán (Xixón, 1986) Doctor pola Universidá d’Uviéu cola investigación «La llingua asturiana nel Franquismu», ye escritor, periodista y xestor cultural. Pol so llabor a favor del asturianu foi reconocíu col Premiu Urogallo, al que se suma a una llarga riesta de premios lliterarios, ente los que destaquen el Premiu Fernán-Coronas de poesía o l’Enriqueta González Rubín de periodismu.

    Autor del primer diccionariu billingüe asturianu-inglés/inglés-asturianu, asoleyó tamién un llibru pa la reciella «Nel, el coríu que nun sabía nalar», trés poemarios «Tierra podre» (Camelot, 2016), «Patria en pallabres menores» (BaxAmar, 2018) y «Nes ruines de la nueche y les hores» (Trabe, 2018); y un volume cola so narrativa «Cartes nel horru (y delles hestories más)» (Cuatro Gotes Ediciones, 2019), presentáu dende casa neste selmanes.

    El so llabor nel ámbitu lliterariu llevólu a fundar y dirixir a lo llargo de más d’una década la revista Formientu, dedicada a autores mozos. En 2018 fundó Cuatro Gotes Producciones, dende la que llevó alantre proyectos como la plataforma de youtubers n’asturianu PlayPresta, que foi premiu Gava 2019 a la meyor anovación tecnolóxica nel campu audiovisual, o’l programa Mundu Sidreru (TPA), ente otros.

    Raquel Lagartos ye la ilustradora que-y pon cara a la curuxa.

    Ye ilustradora y autora de cómic. Titulada n’Ilustración pola Escuela d’Arte d’Uviéu y
    llicenciada en Matemátiques, trabayó en proyectos cola Factoría Cultural d’Avilés, la editorial
    Anaya o’l Ministeriu de Cultura. Participó n’esposiciones individuales y colectives, y los sos trabayos fueron espuestos en llugares como’l Festival de Cine de Sitges, la Cité Internationale de la Bande Dessinée o la Biblioteca Nacional. En 2018 formó parte del grupu de ilustradoras escoyíes para la residencia artística de Angulema, Francia, dientro del proyectu européu de cooperación internacional Womrts.

    Xunto con Julio César Iglesias, Raquel publicó dos noveles gráfiques, Mary Shelley: La
    muerte del monstruo y La hierba del estío, pola que foi finalista na categoría de Meyor dibuxante nacional nos Premios de la Crítica de Cómic de 2018. En 2019 y 2020 foi finalista del Concursu Internacional d’Álbum Ilustráu Biblioteca Insular de Gran Canaria en collaboración cola Editorial A Buen Paso.

  • Actu na Llibrería Clarión de Carballo (Galiza)

    Esti sábadu 4 de setiembre voi participar nun actu del ciclu entamáu pol Ministeriu de Cultura en llibreríes del tol estáu pa xenerar diálogu ente escritores nes distintes llingües d’España. L’actu va consistir nun alcuentru tituláu “Conversa transfronteriza”, cola poeta y narradora en gallegu, Emma Pedreira, en Clarión Libraría de Carballo (A Coruña).

    Nel actu, Emma Pedreira y yo vamos falar de lliteratura gallega y asturiana, procesos creativos y la de la nuesa obra. Dambos tenemos en común el compromisu col usu de les nueses llingües propies, el gallegu y l’asturianu, respectivamente, asina como escribir tanto poesía como narrativa.

    L’actu va entamar a les 20 hores d’esti sábadu 4 de setiembre y l’asistencia requier acutar plaza enantes nel corréu librariaclarion@hotmail.co

    == Nota biográfica de los autores ==

    Emma Pedreria (A Coruña, 1978) Ye llicenciada en Filoloxía Hispánica, ye poeta y narradora enmarcada na Xeneración del 90. Formó parte de la Plataforma de Crítica Feminista A Sega ente 2016 y 2019. En 2018 collaboró na revista Ligeia. En 2018 ganó’l Premiu de la Crítica de narrativa gallega pol so llibru Bibliópatas y fobólogos y tamién el Premiu Xerais de novela, por Besta do seu sangue, obra que según el xuráu ye xuna «propuesta tresgresora caracterizada pola so multiplicidá de voces, el so esencialismu narrativu y por esibir diversos rexistros».

    En 2019 ganó’l Premiu Jules Verne de lliteratura infantil con Os corpos invisibles. Esti llibru foi consideráu como’l meyor llibru xuvenil del añu pola revista electrónica Fervenzas Literarias y ganó el premiu al meyor trabayu xuvenil nos Premios da Gala do Llibro Galego, 2020. La so obra recibió munchos otros premios como l’Eusebio Lorenzo Baleirón de 1999 por Grimorio.El conxuntu de la so estensa obra ta compuesta d’ensayos, llibros de poesíes y narrativa.

    Inaciu Galán (Xixón, 1986) Doctor pola Universidá d’Uviéu cola investigación «La llingua asturiana nel Franquismu», a poques d’editase en formatu llibru, ye escritor, periodista y xestor cultural. Pol so llabor a favor del asturianu foi reconocíu col Premiu Urogallo, al que se suma a una llarga riestra de premios lliterarios, ente los que destaquen el Premiu Fernán-Coronas de poesía, l’Enriqueta González Rubín de periodismu y el María Xosefa Canellada de Lliteratura Infantil y Xuvenil, xunto con Vero Suari, por «La curuxa Catuxa» en 2020.

    Autor del primer diccionariu billingüe asturianu-inglés/inglés-asturianu, asoleyó tamién un llibru pa la reciella «Nel, el coríu que nun sabía nalar», trés poemarios «Tierra podre» (2016), «Patria en pallabres menores» (2018) y «Nes ruines de la nueche y les hores» (2018); y un volume cola so narrativa «Cartes nel horru (y delles hestories más)» (Cuatro Gotes Ediciones, 2020). Ta implicáu en numberoses iniciatives en defensa y promoción de la llingua asturiana, como la ONG Iniciativa pol Asturianu, de la que foi fundador y presidente, o la plataforma de youtubers n’asturianu PlayPresta, ente otres.

  • Participación nel II Seminariu internacional de Sociollingüística na Universidá d’Alacant

    «El procesu d’estandarización del asturianu: De les propuestes de Xovellanos a l’Academia de la Llingua Asturiana»

    Yá podéis inscribivos: https://normaestandar.wixsite.com/socioling2021

  • Presentación «Poética de muyeres 2014» nel Valey de Piedrasblancas

    presentación poética muyeres 2014_valey castrillón

  • Videu: Presentación de l’antoloxía «Poética de muyeres 2014»

  • Pallabres na presentación de l’antoloxía «Poética de Muyeres 2014»

    Apúrrovos equí les pallabres que dixi nel actu de presentación de «Poética de Muyeres 2014», amás de delles semeyes del actu.

    Semeyes del actu. Caxa Rural, Paséu La Infancia, Xixón. 26 de payares de 2014

    Mui bones a toes y a toos:

    Güei tamos equí pa presentar Poética de Muyeres 2014, una antoloxía mui especial que celebra dos aniversarios, como dempués vos esplicará la so responsable con más detenimientu, el centésimu aniversariu del entamu de la 1er Guerra Mundial y los diez años del llibru d’esta mesma autora Antoloxía de muyeres poetes asturianes: sieglu XX.

    Entós foi un interesante exerciciu pa conocer lo que taben dando de si les voces femenines y güei, una década dempués, esta nueva publicación ye un perbón termómetru pa ver cómo evolucionó la lliteratura escrita por muyeres n’asturianu y en gallego-asturianu.

    (más…)