Onde vos cuento la mio vida
El xueves vamos presentar ¡Volved las manos al bable! La llingua asturiana nel franquis, en Mieres. Falaremos de dalgunes persones de Mieres que salen pel trabayu, como Julián Burgos o Luis Aurelio Álvarez.
Esti miércoles 27 a les 18:15 hores, presentación en Madrid de ¡Volved las manos al bable! La llingua aturiana nel franquismu col llingüista Juan Carlos Moreno Cabrera y l’autor, Inaciu Galán, na Facultá de Filosofía y Lletres de la Universidad Autónoma de Madrid.
[ACADEMIA DE LA LLINGUA ASTURIANA] El pasáu xueves, 7 d’abril, l’Academia de la Llingua Asturiana (ALLA) propunxo, mediante votación en Xunta Estraordinaria, que D. Inaciu Galán y González, como miembru numberariu, y que D. Lisardo Lombardía Yenes, como miembru honoríficu, algamen la condición d’académicos.
Inaciu Galán y González (Xixón, 1986), doctor pola Universidá d’Uviéu con una tesis sobre la llingua asturiana nel franquismu, ye, amás de profesor d’asturianu en secundaria, un periodista con gran dedicación a la divulgación cultural y llingüística, con cuasi 20 años de trayeutoria en tou tipu de medios de comunicación, nos que desendolcó munchos papeles, dende la redaición y la presentación a la direición. La so formación académica inclúi amás una diplomatura en turismu y un máster en xestión cultural, ámbitos dende los que tamién tien producío material d’investigación y normalización de calter llingüísticu. La so obra lliteraria, como autor y traductor, toca estremaos xéneros y camina al par de la so obra académica, bayurosa y espardida en monografíes, volúmenes coleutivos y n’artículos de revistes científiques.
Lisardo Lombardía Yenes (Llaviana, 1955), médicu de formación y primer oficiu, desenvuelve, dende fai cuatro décades, una de les carreres más importantes nel ámbitu de la xestión cultural asturiana, llevando la dignificación de la llingua como norte. Ye cofundador del coleutivu etnográficu Belenos que, ente otres munches aiciones, edita la prestixosa revista Asturies, memoria encesa d’un país. Al traviés del sellu Fonoastur dio abellugu discográficu a dalgunes de les carreres musicales más relevantes de la escena folc asturiana. Primero como delegáu d’Asturies y depués como direutor, el so papel nel Festival Intercélticu de Lorient completa una figura que recibe les máximes distinciones: medaya de plata del Principáu d’Asturies en 2015 y “Chevalier de l’Ordre des Arts et des Lettres” de la República Francesa en 2021.
L’ALLA dará acoyida a los nuevos Académicos el vienres 6 de mayu, dientro del actu solemne del 43 Día de les Lletres Asturianes.
La Real Academia Española nun tuvo una muyer ente los sos académicos hasta 1978, l’Institut d’Estudis Catalans nel 1966, na Real Academia Galega nun la tuvo hasta’l 1945, anque de forma efectiva nel 1986, Euskaltzaindia nel 1983 y l’Academia francesa nel 1980.
Pero estes 3 muyeres tuvieron na primer Academia de la llingua asturiana en 1919. Cuéntolo, xunto a otres anuncies nel artículu «Novedaes sobre la Real Academia Asturiana de Artes y Letras de 1919», en Lletres Asturianes, que puedes lleer equí.
Esta hestoria de la presencia de la muyer na Academia Asturiana sigue mui presente cuando se consigue recuperar la institución tres les dictadures, en 1980.
El Conseyu Rexonal d’Asturies, muérganu preautonómicu, aprueba la puesta en marcha de l’Academia de la Llingua Asturiana y noma a 6 miembros, con paridá (de xuru que nun buscada, pero asina foi), trés homes y trés muyeres.
El 25 de mayu del 2001, y hasta 2017, vamos tener a la primer muyer presidenta d’una academia d’una llingua, a lo menos nel estáu español, probablemente n’Europa, Ana María González Cano. El 31 de xunetu d’esi mesmu añu sumaríase n’otra academia Ascensió Figueres, primer presidenta de l’Acadèmia Valencia de la Llengua.
Dempués de dellos meses de trabayu, yá vos puedo cuntar que d’equí n’ocho díes, estrenamos programa en RPA. Un espaciu nel que vamos facer balance del periodu d’autonomía d’#Asturies, que fixo yá cuarenta años, ente 1981 y 2021.
Asturies 81:21, la hora de l’autonomía ye un programa radiofónicu presentáu pol periodista Inaciu Galán y pensáu pa conocenos meyor como pueblu y facer balance del periodu d’autonomía asturiana de yá cuarenta años, ente 1981 y 2021. Un percorríu en forma d’entrevistes y pieces documentales pel nacimientu y la hestoria de l’autonomía asturiana, colos sos protagonistes y los momentos clave que tresformaron Asturies, falando de los cambios producíos, l’asunción de competencies nueves, la puesta en marcha de servicios, el papel de los diferentes presidentes, les crisis económiques y polítiques, etc. Una hora selmanal pa reflexonar y mirar hacia’l futuru d’Asturies.
Esti domingu, 20 de febreru, a les 12.00 hores, va presentase nel Muséu Arqueolóxicu d’Asturies (Uviéu) el llibru Entaína a escribir, qu’axunta los testos premiaos nes seis ediciones d’esti concursu de microrrellatos improvisaos pa la xente mozo.
Con ilustraciones d’Alberto Pieruz, el llibru incluye 18 microrrellatos de los que son autores Raquel Fernández Menéndez, Inaciu Galán, Ánxela Gómez d’Ávila, Claudia Gutiérrez Lueje, Alma Hidalgo Lucena, Gonzalo Llamedo Pandiella, Pelayo Martínez Olay, Xurde Menéndez Caravia y Solinca Turbón.
La obra ya una coedición del Gobiernu del Principáu d’Asturies y la editorial Impronta. La presentación lliteraria va tar al cargu de Dolfo Camilo Díaz, y van participar nel actu los directores xenerales de Mocedá, Clara Sierra, y Política Llingüística, Antón García.
Entrada llibre hasta enllenar l’aforu.
⏰ Esti xueves 17 de febreru voi compartir un ratín col alumnáu del IES Cangas del Narcea pa falar de la hestoria de la llingua asturiana aprovechando pa celebrar el Día Internacional de la Llingua Materna.
El ciclu Uviéu Abierto, entamáu pola Conseyería de Cultura, Política Llingüística y Turismu pa da-y espaciu a una serie d’actos culturales alredor de la llingua y la cultura asturiana, va acoyer esti xueves 10 de febreru, a les 17:30 hores, na Biblioteca Ramón Pérez de Ayala d’Uviéu, la presentación de La curuxa Catuxa, d’Inaciu Galán y Vero Suari, XIII Premiu María Josefa Canellada de Lliteratura Infantil y Xuvenil.
L’actu ta empobináu a neños y neñes y ye d’asistencia llibre. Va cuntar cola presencia de los autores, asina como del actor Pedro Durán, como presentador del actu. El llibru edítalu la Conseyería con Impronta Ediciones y tien detrás un proyectu más ampliu col que los autores quieren normalizar l’usu del asturianu al traviés de la figura de Catuxa.
Autores
Vero Suari (Xixón, 1983) Diplomada en xestión d’empreses turístiques. Vien trabayando nel ámbitu de la información turística y cultural y como guía d’esposiciones y en ciclos como Xixón Tours. Ye collaboradora de la revista Viaxast y de la plataforma VerAsturies.com
Inaciu Galán (Xixón, 1986) Doctor pola Universidá d’Uviéu cola investigación «La llingua asturiana nel Franquismu», ye escritor, periodista y xestor cultural. Pol so llabor a favor del asturianu foi reconocíu col Premiu Urogallo, al que se suma a una llarga riesta de premios lliterarios, ente los que destaquen el Premiu Fernán-Coronas de poesía o l’Enriqueta González Rubín de periodismu.
Autor del primer diccionariu billingüe asturianu-inglés/inglés-asturianu, asoleyó tamién un llibru pa la reciella «Nel, el coríu que nun sabía nalar», trés poemarios «Tierra podre» (Camelot, 2016), «Patria en pallabres menores» (BaxAmar, 2018) y «Nes ruines de la nueche y les hores» (Trabe, 2018); y un volume cola so narrativa «Cartes nel horru (y delles hestories más)» (Cuatro Gotes Ediciones, 2019), presentáu dende casa neste selmanes.
El so llabor nel ámbitu lliterariu llevólu a fundar y dirixir a lo llargo de más d’una década la revista Formientu, dedicada a autores mozos. En 2018 fundó Cuatro Gotes Producciones, dende la que llevó alantre proyectos como la plataforma de youtubers n’asturianu PlayPresta, que foi premiu Gava 2019 a la meyor anovación tecnolóxica nel campu audiovisual, o’l programa Mundu Sidreru (TPA), ente otros.
Raquel Lagartos ye la ilustradora que-y pon cara a la curuxa.
Ye ilustradora y autora de cómic. Titulada n’Ilustración pola Escuela d’Arte d’Uviéu y
llicenciada en Matemátiques, trabayó en proyectos cola Factoría Cultural d’Avilés, la editorial
Anaya o’l Ministeriu de Cultura. Participó n’esposiciones individuales y colectives, y los sos trabayos fueron espuestos en llugares como’l Festival de Cine de Sitges, la Cité Internationale de la Bande Dessinée o la Biblioteca Nacional. En 2018 formó parte del grupu de ilustradoras escoyíes para la residencia artística de Angulema, Francia, dientro del proyectu européu de cooperación internacional Womrts.
Xunto con Julio César Iglesias, Raquel publicó dos noveles gráfiques, Mary Shelley: La
muerte del monstruo y La hierba del estío, pola que foi finalista na categoría de Meyor dibuxante nacional nos Premios de la Crítica de Cómic de 2018. En 2019 y 2020 foi finalista del Concursu Internacional d’Álbum Ilustráu Biblioteca Insular de Gran Canaria en collaboración cola Editorial A Buen Paso.
Inaciu Galán / Saluda d’Adrián Barbón
ISBN: 978-84-18286-70-4
La llingua asturiana nel franquismu foi’l trabayu col qu’Inaciu Galán se doctoró pola Universidá d’Uviéu. Nél l’autor preséntanos los discursos y les práctiques que, coles contradicciones y llimitaciones correspondientes, desenvolvíen autoridaes y instituciones del réxime respecto del idioma asturianu, a lo qu’amiesta tamién un análisis –con bien de testimonios– de les actuaciones represives na escuela mesmo que de les polémiques mediátiques que teníen como oxetu bien certificar la muerte de la llingua autóctona bien apostar por iniciatives qu’ayudaran a revitalizar l’usu del asturianu. Dientro d’eses iniciatives destaca’l llabor d’asociaciones como Amigos del Bable o Conceyu Bable, que tamién son oxetu d’estudiu nesta obra.
Inaciu Galán (Xixón, 1986) ye doctor pola Universidá d’Uviéu, máster en Sociedá de la Información y el Conocimientu na UOC, grau en Periodismu pola UDIMA, profesor d’Enseñanza Secundaria, vocal de Rellaciones Institucionales d’Iniciativa pol Asturianu y director de Cuatro Gotes Producciones. Ente les sos contribuciones venceyaes col periodu estudiáu destaquen artículos como «D’Amigos del Bable a Conceyu Bable: reivindicación llingüística nel tardofranquismu», «Averamientu a la figura del escritor Antón Forascepi (1869-1947)», «Delles aportaciones pa una hestoria de la publicidá n’asturianu», «Mánfer, nel bandu perdedor» o «Nueves aportaciones sobre la figura del Padre Galo».
Esti sábadu 4 de setiembre voi participar nun actu del ciclu entamáu pol Ministeriu de Cultura en llibreríes del tol estáu pa xenerar diálogu ente escritores nes distintes llingües d’España. L’actu va consistir nun alcuentru tituláu “Conversa transfronteriza”, cola poeta y narradora en gallegu, Emma Pedreira, en Clarión Libraría de Carballo (A Coruña).
Nel actu, Emma Pedreira y yo vamos falar de lliteratura gallega y asturiana, procesos creativos y la de la nuesa obra. Dambos tenemos en común el compromisu col usu de les nueses llingües propies, el gallegu y l’asturianu, respectivamente, asina como escribir tanto poesía como narrativa.
L’actu va entamar a les 20 hores d’esti sábadu 4 de setiembre y l’asistencia requier acutar plaza enantes nel corréu librariaclarion@hotmail.co
== Nota biográfica de los autores ==
Emma Pedreria (A Coruña, 1978) Ye llicenciada en Filoloxía Hispánica, ye poeta y narradora enmarcada na Xeneración del 90. Formó parte de la Plataforma de Crítica Feminista A Sega ente 2016 y 2019. En 2018 collaboró na revista Ligeia. En 2018 ganó’l Premiu de la Crítica de narrativa gallega pol so llibru Bibliópatas y fobólogos y tamién el Premiu Xerais de novela, por Besta do seu sangue, obra que según el xuráu ye xuna «propuesta tresgresora caracterizada pola so multiplicidá de voces, el so esencialismu narrativu y por esibir diversos rexistros».
En 2019 ganó’l Premiu Jules Verne de lliteratura infantil con Os corpos invisibles. Esti llibru foi consideráu como’l meyor llibru xuvenil del añu pola revista electrónica Fervenzas Literarias y ganó el premiu al meyor trabayu xuvenil nos Premios da Gala do Llibro Galego, 2020. La so obra recibió munchos otros premios como l’Eusebio Lorenzo Baleirón de 1999 por Grimorio.El conxuntu de la so estensa obra ta compuesta d’ensayos, llibros de poesíes y narrativa.
Inaciu Galán (Xixón, 1986) Doctor pola Universidá d’Uviéu cola investigación «La llingua asturiana nel Franquismu», a poques d’editase en formatu llibru, ye escritor, periodista y xestor cultural. Pol so llabor a favor del asturianu foi reconocíu col Premiu Urogallo, al que se suma a una llarga riestra de premios lliterarios, ente los que destaquen el Premiu Fernán-Coronas de poesía, l’Enriqueta González Rubín de periodismu y el María Xosefa Canellada de Lliteratura Infantil y Xuvenil, xunto con Vero Suari, por «La curuxa Catuxa» en 2020.
Autor del primer diccionariu billingüe asturianu-inglés/inglés-asturianu, asoleyó tamién un llibru pa la reciella «Nel, el coríu que nun sabía nalar», trés poemarios «Tierra podre» (2016), «Patria en pallabres menores» (2018) y «Nes ruines de la nueche y les hores» (2018); y un volume cola so narrativa «Cartes nel horru (y delles hestories más)» (Cuatro Gotes Ediciones, 2020). Ta implicáu en numberoses iniciatives en defensa y promoción de la llingua asturiana, como la ONG Iniciativa pol Asturianu, de la que foi fundador y presidente, o la plataforma de youtubers n’asturianu PlayPresta, ente otres.
