Programes de televisión y radio

Como periodista vengo trabayando en radio y televisión con espacios de tou tipu, siempres n’asturianu. Recueye equí un catálogu con accesu a dalgunos conteníos.

PROGRAMES DE TELEVISIÓN

PROGRAMES DE RADIO

MUNDU SIDRERU (TPA)

Mundu Sidreru ye un programa presentáu por Inaciu Galán que percuerre toles facetes de la Sidra d’Asturies, visitando llagares, chigres, eventos y falando coles persones que más saben d’ello. Un percorríu pela cultura sidrera enllenu de descubrimientos, retos y convidaos mui especiales, siempres apostando pola garantía de la DOP Sidra d’Asturies.

LES CLASES D’ASTURIANU N’EDUCASTURTV (TPA)

Como profesor de Llingua Asturiana y Lliteratura na ESO y en Bachilleratu, mientres duró’l confinamientu pol andanciu de coronavirus punxi clases d’asturianu nel espaciu EDUCASTURTV, na TPA, dende casa. Foi la mio aportación desinteresada nun momentu difícil pa tol mundu. Sigue siendo útil pa deprender asturianu.

TERRITORIU SIDRERU (TPA)

Territoriu Sidreru foi un programa dedicáu al mundu de la sidra, nel que, baxo la presentación d’Inaciu Galán, danse a conocer llagares, chigres, eventos sidreros y otres iniciatives alredor del mundu d’esta bébida y la cultura que la arrodia, imprescindible pa entender Asturies.

AL ALDU: XENTE DE CASA (TPA)

Al aldu foi un espaciu televisivu qu’estrenó la programación n’asturianu na TPA. La estaya “Xente de casa” recoyía noticies más chocantes del mundu.

LES CLASES D’ASTURIANU (TLG)

L’espaciu, que s’emitió na yá desapaecida televisión llocal de Xixón, taba dedicáu a dar conocer y enseñar l’asturianu a los espectadores, al traviés d’una clas que ponía Inaciu Galán cola presentadora d’El café de la tarde como escolina.

SENTIR ASTURIES (RPA)

Presentáu por Arantxa Margolles ya Inaciu Galán, xunto a un gran equipu, ye un magacín que nun escaez lo mozo nin quita relevancia a la esperiencia, col asturianu como idioma vehicular y plantegáu non solo n’Asturies, sinón pa falar de tolo qu’esmolez ya importa al oyente: l’actualidá, la cultura, la ciencia y l’ociu; l’alderique políticu y social, con un tonu mui desenfadáu.

ESPACIOS EN SER XIXÓN

A lo llargo de delles temporaes presenté espacios como Falando d’Asturies, Les bones noticies o Xixón de cerca dientro del magacín de la tarde de SER Xixón.

ASINA FOI… EL SURDIMIENTU (ONDA PEÑES)

Asina foi… el Surdimientu foi un espaciu emitíu n’Onda Peñes pa celebrar los 40 años de la fundación de Conceyu Bable y percorrer la hestoria del movimientu cultural y lliterariu del Surdimientu.

XUVENTÚ D’ANGUAÑO (ONDA PEÑES)

Foi un magacín mozu presentáu por Inaciu Galán y Maruxa Ceñera n’Onda Peñes. Incluyía secciones d’actualidá, cultura asturiana, noticies de sociedá y radioteatru.

Dexar un comentariu

La to cuenta de corréu nun va espublizase.