Comunicar n’asturianu
Como periodista vengo trabayando en radio y televisión con espacios de tou tipu, siempres n’asturianu. Recueyo equí un catálogu con accesu a dalgunos conteníos.
Televisión
Programas divulgativos, culturales y d’entretenimientu emitíos na TPA y na televisión local.
TPA
Mundu Sidreru
Mundu Sidreru ye un programa presentáu por Inaciu Galán que percuerre toles facetes de la Sidra d’Asturies, visitando llagares, chigres, eventos y falando coles persones que más saben d’ello. Un percorríu pela cultura sidrera enllenu de descubrimientos, retos y convidaos mui especiales, siempres apostando pola garantía de la DOP Sidra d’Asturies.
TPA
Les clases d’asturianu n’EducasturTV
Como profesor de Llingua Asturiana y Lliteratura na ESO y en Bachilleratu, mientres duró’l confinamientu pol andanciu de coronavirus punxi clases d’asturianu nel espaciu EducasturTV, na TPA, dende casa. Foi la mio aportación desinteresada nun momentu difícil pa tol mundu. Sigue siendo útil pa deprender asturianu.
TPA
Territoriu Sidreru
Territoriu Sidreru foi un programa dedicáu al mundu de la sidra, nel que, baxo la presentación d’Inaciu Galán, danse a conocer llagares, chigres, eventos sidreros y otres iniciatives alredor del mundu d’esta bébida y la cultura que la arrodia, imprescindible pa entender Asturies.
2007–12
Al aldu: Xente de casa
Programa de la TPA presentáu por Inaciu Galán dende abril de 2007, cuando ñació como una sección del programa «Con dos de azucar» de la mesma canal autonómica. Darréu dixebróse emitiéndose como un programa independiente hasta l’añu 2012.
Nel programa dábense a conocer noticies llamatives y orixinales del mundu enteru y n’asturianu.
Dientro del espaciu Al aldu emitíense otros espacios temáticos, unu cada día de la selmana llaboral, presentaos por Milio’l del Nido, Carlos Suari y Mercedes Menéndez.
TLG
Les clases d’asturianu
L’espaciu, que s’emitió na yá desapaecida televisión llocal de Xixón, taba dedicáu a dar conocer y enseñar l’asturianu a los espectadores, al traviés d’una clas que ponía Inaciu Galán cola presentadora d’El café de la tarde como escolina.
Radio
Magacinos, pieces documentales y espacios d’actualidá emitíos na RPA, SER Xixón y Onda Peñes.
RPA
Asturies 81:21, la hora de l’autonomía
Asturies 81:21, la hora de l’autonomía ye un programa radiofónicu presentáu pol periodista Inaciu Galán y pensáu pa conocenos meyor como pueblu y facer balance del periodu d’autonomía asturiana de yá cuarenta años, ente 1981 y 2021.
Un percorríu en forma d’entrevistes y pieces documentales pel nacimientu y la hestoria de l’autonomía asturiana, colos sos protagonistes y los momentos clave que tresformaron Asturies, falando de los cambios producíos, l’asunción de competencies nueves, la puesta en marcha de servicios, el papel de los diferentes presidentes, les crisis económiques y polítiques, etc.
RPA
Sentir Asturies
Presentáu por Arantxa Margolles ya Inaciu Galán, xunto a un gran equipu, ye un magacín que nun escaez lo mozo nin quita relevancia a la esperiencia, col asturianu como idioma vehicular y plantegáu non solo n’Asturies, sinón pa falar de tolo qu’esmolez ya importa al oyente: l’actualidá, la cultura, la ciencia y l’ociu; l’alderique políticu y social, con un tonu mui desenfadáu.
SER
Espacios en SER Xixón
A lo llargo de delles temporaes presenté espacios como Falando d’Asturies, Les bones noticies o Xixón de cerca dientro del magacín de la tarde de SER Xixón.
OP
Asina foi… el Surdimientu
Asina foi… el Surdimientu foi un espaciu emitíu n’Onda Peñes pa celebrar los 40 años de la fundación de Conceyu Bable y percorrer la hestoria del movimientu cultural y lliterariu del Surdimientu.
OP
Xuventú d’anguaño
Foi un magacín mozu presentáu por Inaciu Galán y Maruxa Ceñera n’Onda Peñes. Incluyía secciones d’actualidá, cultura asturiana, noticies de sociedá y radioteatru.