l Campu (Casu), 11 d’agostu del 2023
Alcalde, coordinador de la UABRA, profesoráu, personal de l’Academia, alumnes y alumnos:
Encárguenme’l presidente de l’Academia y la directora de la UABRA que ponga’l ramu güei, a falta del pieslle oficial y la entrega de diplomes del viniente 12 de setiembre, a esta edición 2023 de la Universidá Asturiana de Branu.
Va yá cuarenta años l’Academia de la Llingua Asturiana entamó en La Puela (Ayande) y n’Uviéu, la primer edición de los sos cursos, entós centraos dafechu na formación del profesoráu d’asturianu. Empicipiaba a aprucir entós l’actual sistema d’escolarización. Esti añu, cuatro décades dempués, y darréu de trés años, unu de suspensión y dos de virtualización poles circunstancies, la UABRA recupera la presencialidá.
Los cursos pasaron estos años per munchos llugares d’Asturies y l’acoyida foi siempres perbona. Nun podemos dicir menos d’esti conceyu Casu, onde mesmo l’alcalde y el so equipu, como les instalaciones hoteleres y hosteleres y el pueblu xeneral fixeron que mos sintiéramos, non como en casa, sinón entá meyor, afayaos dafechu ente estos montes maraviyosos qu’arrodien El Campu. Ye por ello que nun podemos despidinos güei de Casu ensin da-y l’agradecimientu más fonderu a tol equipu de gobiernu y el funcionariáu del Conceyu, pa los que vos pido un aplausu.
Llegar a un conceyu nuevu, con instalaciones nueves pa nós, siempres ye un retu. Tanto la dirección de la UABRA como’l personal de l’Academia fiximos tolo posible pa que los cursos y la vuesa estancia se desendolcaren coles meyores circunstancies posibles. Vamos tomar nota de toles suxerencies, qu’agradecemos, pa siguir meyorando en futures ediciones. Quiero tener tamién un fondu agradecimientu pal personal de l’Academia, que supo adaptase a les circunstancies y da-y solución a les dificultaes que surden davezu nunos cursos con tantes persones implicaes. Pa ellos pídovos tamién un aplasu.
É tamén importante acordarse dos compañeiros da UABRA na Caridá, a outra sede dos cursos, unde a Academia forma al profesorao d’eonaviego. Séi que podemos falar tamén d’un éxito y d’un alumnao, como aquí en Casu, que pon todo el esforzo pra aprender y llevar as nosas llinguas as aulas, as empresas, as asociacióis, as familias…
A lo llargo d’estes dos selmanes celebremos cinco cursos n’El Campu, más el cursu celebráu n’A Caridá. Pa poder echar a andar estos cursos ye imprescindible cuntar col alumnáu, pero tamíen diba ser imposible facelo ensin los más de trenta profesores que sacrificaron parte de les sos vaciones p’arriquecer el programa docente d’esa UABRA. Llegaos y llegaes dende l’ámibtu universitariu, pero tamién del profesional y del activismu cultural, pudimos cuntar con un equipu de profesoráu d’un nivel ablucante. L’Academia de la Llingua Asturiana nun tien más qu’agradecimientu pa ellos y elles. La UABRA y l’Academia son la vuesa casa y tenéis siempres les puertes abiertes. Deamos un aplausu al profesoráu.
Va cuasi venti años que vengo a estos cursos y esti ye’l primeru como secretariu. Anque tuvi dellos de profesor, la mayoría tuvi como vós tais equí güei, d’alumnu. Sé lo bien que se pasa, pero tamién el duru trabayu que tuvistis qu’enfrentar como alumnáu. Quiero felicitavos pol trabayu fechu, pol compromisu col idioma y col país que supón venir a la UABRA en plenu mes d’agostu pa saber más de lo nueso, pa siguir afondando na conocencia del idioma y de la cultura d’Asturies. Güei rematastis un pasu más y toca siguir saliendo a les cais y a los caminos a llevar esa conocencia, valtar prexuicios que, anque cada vuelta menos, siguen presentes na sociedá asturiana.
Nes actividaes complementaries d’esti añu, unu de los pegoyos de los que ye la UABRA, pudimos averanos a conocer el Parque Natural de redes, los xéneros nuevos de la lliteratura asturiana, la realidá sociollingüística d’Asturies y la tradición oral del conceyu de Casu, pa los que nos prestó abondo tener con nós a delles de les muyeres que meyor caltienen la nuesa llingua nesti conceyu. Foi tamién bien prestoso poder cuntar cola música de La Garulla, Lakadarma y la Nueche en danza, que dalgunos y dalgunes siguieron hasta convertila n’alborecer en danza. Esta ye tamién, la parte del espardimientu y l’amistá, otra de les bones tradiciones de la UABRA.
Quiero rematar dando les gracies a toos y toes, por faceme bien fácil esti primer añu como secretariu de la UABRA y convidavos yá a venos d’equí nun añu na viniente edición. Nun dexéis de siguir falando asturianu acaldía, trabayando pol idioma dende onde podáis y ensin dase, porque esta llingua tien futuru siempres que sigamos dándo-ylu nós.
Munches gracies. ¡Puxa la UABRA! ¡Puxa Casu! ¡Puxa Asturies!
Inaciu Galán
Secretariu de la Universidá Asturiana de Branu (UABRA)
