PRESENTACIÓN A LA CONFERENCIA DE JAVIER CUBERO
«Rexonalismu, federalismu y asturianismu, 1876-1936»
Club de Prensa de La Nueva España, Xixón
30 de xunu de 2011
Inaciu Galán y González
Mui bones tardes a toos y a toes:
Esta tarde vamos poder sentir falar sobre una cuestión poco tratada, munches vegaes hasta maltratada, la hestoria del rexonalismu, federalismu y asturianismu enantes de la Guerra Civil, na Asturies d’enantes de 1936. La bibliografía sobre esta cuestión, y anque medró abondo nos años últimos, tovía ye bien curtia.
Y ye que cuando falamos n’Asturies de nacionalismu, perdonái si axunto estes tendencies dientro d’una mesma ideoloxía que podríemos denomar asina, “nacionalismu”, cuando falamos d’ello, paez que teamos falando de dalgo nuevo, ñacío como muncho nos años setenta del sieglu venti. Pero Asturies tien una llarga tradición de políticos, de movimientos y de partíos que pueden perfectamente encuadrase dientro d’esta ideoloxía (anque creo que’l conferenciante va matizar esta opinión). Lo que pasa que la hestoria, yá se sabe, escríbenla los vencedores, y nella nun hai espaciu pa los ésitos del enemigu.
Nesi sen Javier vien dando lluz colos sos estudios, investigaciones siempres mui divulgatives, mui clares, a la nuesa hestoria, al pasáu del nacionalismu asturianu, entendíu de la forma más amplia posible. Fízolo nel so primer llibru Del romanticismo al rexonalismu: escritores carlistes na lliteratura asturiana, onde per primer vegada filvanó una hestoria de los escritores carlites más importantes de la lliteratura asturiana. Quedaba nidio nesi estudiu que nun yeren simples folcloristes reproduciendo la llingua del pueblu, sinón que detrás había una ideoloxía de calter nacionalista.
Paezme que güei vamos saber más de too esto, del republicanismu federal, del carlismu, del rexonalismu, el cuadonguismu… La hestoria, en definitiva de los qu’amaron esti país, de distintes formes, y quixeron buscar soluciones polítiques propies pa un llugar del mundu, que como toos, tien los sos propios problemes y les sos propies fortaleces.
Javier Cubero fai un trabayu hestóricu seriu. Los que lu conocemos sabemos que pasa munches hores dedicáu a la llectura, a la investigación, siempres sollerte a les novedaes de la hestoriografía. Nun se puede negar que Javier tien una ideoloxía, pero nos sos trabayos nun fai propaganda, o sí, pero de la meyor manera posible na que yo creo que pue facese, demostrando con fechos, diendo a les fontes hestóriques más fidelignes y amosándonos la hestoria tal como foi.
Esta mañana Javier cuntaba nel periódicu que n’Asturies va abrise una nueva etapa, o yá ta abierta, porque va gobernar, o eso paez, un partíu asturianu, ¿podemos definilu como nacionalista? Ta por ver, pero cito les pallabres de Javier sobre’l partíu de Cascos “supo aprovechar un discursu rexonalista pal qu’hai un públicu receptivu”. Ta por ver cómo se desenrrolla’l futuru, pero ta claro que los asturianos, d’una manera o d’otra, a lo llargo de la hestoria, vienen amosando’l so amor por esti país, de distintes formes, nesi sentimientu qu’ampliamente definimos como nacionalismu o asturianismu, y qu’a vegaes ye incluso inconsciente, pero ta ehí, nel corazón y na tiesta de los asturianos.
Javier va aportanos muncho datos güei sobre esi pasáu, sobre cómo evolucionó esi sentimientu, que se plasma nunes idees polítiques determinaes en cada época y que son l’entamu, el referente de los que güei mos consideramos nacionalistes asturianos.
De Javier, que puedo contar. Ye un rapaz, yá un home, trabayador incansable por esti país. El so llabor nel campu cultural ye bien importante. Participó va años de l’actividá de la Xunta pola Defensa de la Llingua Asturiana, cuando entá yera una organización de referencia, y más tarde del Conceyu Universitariu pol Asturianu, forma parte de la Comisión de Normalización Llingüística de la Universidá d’Uviéu, como lo foi nel pasáu de les comisiones de Cultura y Gobiernu de la Facultá d’Hestoria, y nestos espacios universitarios ye onde más xeres compartí con él, lluchando pola meyora de la situación del asturianu na Universidá d’Uviéu.
Estos díes precisamente, tamos peleando, pudieron lleelo ayeri en La Nueva España, pa que les tesis puedan facese y presentase n’asturianu ensin problemes, pa qu’investigadores como Javier Cubero, que tienen al asturianu como la so llingua de trbayu, de vida, puedan cumplir la so voluntá. Esperemos que s’atope una solución pronto pa esti conflictu.
Pero’l llabor de Javier Cubero en defensa del asturianu ye tresversal, non solo pelea pol asturianu dende los colectivos directamente venceyaos a esta llucha. Ellí onde participa, en política, en sindicalismu, nel ámbitu cultural, Javier Cubero tien un compromisu vital firme pa cola so llingua, un idioma que-y costó trabayu deprender por mor del deficiente sistema educativu que carez Asturies y que convierte a la mayor parte los asturianos n’analfabetos nel so propiu idioma y en falantes de castellán con munches deficiencies ya interferencies del asturianu.
Dende va dellos años ye tamién presidente del Atenéu Cultural Xuan María Acebal y vien participando en congresos sobre hestoria dende la so etapa na Facultá, publicando artículos en revistes como “N’ast cartafueyos d’ensayu”, la revista d’hestoria “Erada” y otres publicaciones, con tamién dalguna incursión nel mundu lliterariu. Col so primer llibru, yá citáu, fízose col Premiu Fierro-Botas d’ensayu ya investigación qu’otorga’l Conceyu de Xixón. La so carrera promete y esta conferencia tamién. Pa min ye un honor ser “teloneru” d’esti actu protagonizáu por un amigu, pero tamién, por un intelixente y atentu estudiosu de la nuesa hestoria.
Pa rematar prestaríame dar les gracies a La Nueva España por abrir esti espaciu en Xixón pal alderique, pa la cultura… y a Luis Miguel Piñera, el so coordinador, por abrilu a conferencies tan interesantes como la que toi seguru vamos sentir agora na voz de Javier Cubero.
Munches gracies.