Espublizáu en Les Noticies, el 10 d’abril de 2005, cuntando la esperiencia del I Certame de Monólogu Modernu dende dientro y dende fuera.
—————————————————————–
Con sentíu
Dende dientro… LLUÍS ANTÓN GONZÁLEZ
Facía-y falta al movimientu cultural asturianista una terapia d’humor. Rise dicen que siempre ye sano. Rise d’un mesmu meyor. Michael Chéjov dicía que «cuando somos capaces de separar les nuestres reaciones egoístes inmediates de los sucesos y interacciones emocionales cotidianes estes manifiéstense con frecuencia baxo una lluz verdaderamente humorística. Cuantes más preparáu tea’l nuestru yo superior, más posibilidaes tendremos de dexar atrás les coses personales». Ye polo tanto importante nun perder, nestos momentos, el nuestru sentíu del humor. El pasáu día 3 de marzu xuntámonos dellos centenares de persones na sala Albéniz de Xixón pa rinos xuntos nuna nueva propuesta de revitalizar el monólogu asturianu. Col títulu «I Certame de Monólogu Modernu n’Asturianu» los entamaores, H.a Xareos, traten de modernizar un xéneru, que según ellos, taba arrequexáu nuna temática rural y na estética de «boina y cayáu» que nun resulta mui atrayente pa la mocedá d’angüaño.
Ye d’emponderar l’esfuezu, el riesgu y l’entusiasmu d’esta nueva xeneración asturianista, representada nesti casu, por Inaciu Galán y Benxa Pérez. Anque nun ye nuevo esti intentu de modernizar y revitalizar el monólogu asturianu, yá fixeron esfuerzos nesi sen, los autores Rubén Sánchez Vicente y Adolfo Camilo Díaz; la editorial Trabe, y el grupu teatru Nun Tris, ye la primer vez que se xunten nun mesmu escenariu propueses y obres d’autores tan variaos como Benxa Perez, Carlos Alba «Cellero», Chechu García y Adolfo Camilo Díaz. Cuatro monologuistes totalmente distintos, Toño Caamaño, Cellero, Benxa Pérez y yo mesmu, mostramos estilos que van dende la figura del monologuista más tradicional (anque con textos actuales) al que podríamos nomar como «nuevu club de la comedia asturianu». Rises, aplausos, y éxitu de públicu a pesar de que’l frío y la ñeve invitaben poco a salir de casa. L’espectáculu presentáu por un dinámicu y humorísticu Inaciu Galán, nel más puru estilu de club de la comedia, foi completáu pola actuación del grupu folk Tarañu y la llectura d’un manifiestu en defensa de llingua y cultura asturianes. Ye importante nun perder el nuestru sentíu del humor. Un humor asturianu, diferente al que puedan tener otros pueblos, que forma parte de les nuestres señes d’identidá.
Figures como Pandiella o Jerónimo Granda, qu’engancharon y enganchen col sentíu del humor del pueblu asturianu, son necesaries pa mantener una parte mui importante de la nuestra cultura. Tradicional, modernu o evolucionáu hai que revindicar la figura del monologuista, pa qu’esti país nun sía un ensín sentíu, renegando de lo nuestro, como unos provincianos, pensando que lo que vien de fuera ye meyor.
…y dende fuera
HENRIQUE G. FACURIELLA
La Sala Albéniz de Xixón acoyó’l xueves 3 de marzu’l I Certame de Monólogu Modernu n’Asturianu, entamáu por H.A Xareos. Los cinco monólogos echaos por cuatro actores foron el platu fuerte d’una nueche que remató cola actuación del grupu folk Tarañu. Según Inaciu Galán, ún de los organizadores y presentador del espectáculu, los oxetivos yeren, per un llau, «modernizar el monólogu p’averalu a los gustos de la sociedá d’anguaño» y, per otru, «dar un pasu más na normalización social de l’asturianu».
Sobre’l remocicamientu del monólogu pudo comprobase ellí mesmo que’l xéneru, ún de los de más aceptación popular n’Asturies, tien munchu futuru per delantre ente la sociedá del país. Pero esto será asina siempre que tea en contactu colos fechos qu’esmolecen a les persones de güei, que de xuru nun son los mesmos qu’hai cincuenta años. Toño Caamaño, Carlos Alba «Cellero», Lluis Antón González, Benxa Pérez y los guionistes Chechu García y Isaac de l’Arada supieron dar cola tuerca qu’había qu’apretar. Tampoco fueron los monólogos que s’echaron en Xixón un calcu de los de «El Club de la Comedia » pero n’asturianu. Cadún de los participantes meció a la so manera elementos tradicionales con temes y formes d’actualidá baxo los que se dexaben ver característiques propies del mou de rise de les coses n’Asturies. Nesti sen, el monólogu de Cellero foi un bon exemplu de cómo se puen xunir la tradición (vistíu de vieyu y sentáu nel banquetu) cola modernidá d’una forma qu’entendieron perfechamente tolos que lu escucharon. La so forma de facer chiste de l’alcoholismu a costa d’un programa de l’Alministración pa prevenilu o presentar la guerra d’Iraq como si fuere un xuegu ensin quita-y nada de la so crueldá supunxeron ún de los momentos de mayor risión na Sala Albéniz. Caamaño tamién amestó coses del monólogu tradicional (el versu y la rima), con temes tan d’agora como los impuestos a los ganaderos asturianos y les páxines de contactos de los periódicos con una puesta n’escena mui averada al teatru. Lluis Antón González, qu’interpretó un testu de Chechu García, contó dalgunes verdaes sobre los asturianos basaes nun humor mui de les cuenques. Pola so parte, Benxa Pérez, que s’estrenaba sobre l’escenariu, punxo en claro les dificultaes pa cortexar
de los mozos nesta época. Polo que fai a la normalización de l’asturianu, el que na sala fiestes tuviera públicu de toa mena, sobre manera muncha xente mozo nun averada a movimientos asturianistes, dio pa ver que la llingua asturiana nun ye un pilancu pa la comunicación siempre que s’use
con naturalidá y pa falar de coses qu’interesen a la sociedá del país.
Inaciu Galán.
Inaciu Galán y Lluis Antón González
