Estos díes atrás vía nel cine la película “Criadas y señoras”. Una emocionante y al mesmu tiempu allegre producción de Tate Taylor que se desenrrolla nel Mississippi de los años sesenta, cuando los drechos civiles de los negros entá yeren un suañu por cumplir. Nesta sociedá onde s’aboliere l’esclavismu pero los afroamericanos vivíen como ciudadanos de tercera división mui pocos lluchaben por camudar esta situación.
Pesie a criase nuna sociedá racista y sobre manera clasista, Skeeter, la única moza del pueblu que tien interés en facese una carrera profesional, recién llegada d’estudiar pa convertise en periodista, decide escribir hestories sobre cómo viven les muyeres negres que sirven en condiciones humildantes nes cases de los blancos. La moza incumple les lleis de dixebra de races del so estáu pa lluchar polo que considera xusto, de la forma na que meyor sabe facelo, y esto afala a les sirvientes negres a da-y la so collaboración nel llibru que prepara, anque saben que ponen en peligru la so propia vida.
Güei, más de mediu sieglu dempués del tiempu narráu pola película les minoríes raciales tienen sobre’l papel reconocíos tolos sos drechos, pero veo esmolecíu como’l racismu medra na nuesa sociedá. En tiempu de crisis ye vezu buscar culpables per tolos llaos y dalgunos aprovechen la situación pa xenerar odios irracionales na sociedá, col envís de convertise en más poderosos amedranando a la xente.
Nestes situaciones la sociedá necesita munchos mozos y moces como Skeeter, que nun tengan mieu a enfrentase a estos odios. Y nun ye necesario que toos escribamos un llibru como fai Skeeter na película, o que movilicemos a les mases como fizo Martin Luther King. Necesitamos xente que simplemente, nel so día a día, retruque cuando sienta a dalgún familiar, compañeru de trabayu o d’estudios dicir un comentariu racista. Xente que conteste con argumentos racionales a la irracional xenofobia. Pequeños héroes de cada día.
Y ye que l’odiu a les minoríes, a los distintos, puede afectanos a toos. Unos por ser homosexuales, otros pol so xéneru, otros por ser falantes d’una llingua minorizada, etc. Como los argumentos de los “odiadores” son irracionales, cualesquier causa, cualesquier escusa ye bona pa escluir a los demás. “Criadas y señoras” amuésanos que les coses puede que nun cambiaren tanto como podríemos pensar y sobremanera, qu’anque son pocos los que provoquen estes situaciones, el silenciu de munchos ye lo que permite que se caltengan nel tiempu les inxusticies