Espublizada n’El Comercio, el día 18 de setiembre de 2007
—————————————————————-
Cultura
Nuevos caminos pa les lletres
La producción de los autores mozos y los estudios rellacionaos col Principáu cunten agora con más formes d’espresión gracies a les publicaciones qu’apaecen nel panorama d’anguaño
PRESENTACIÓN. Humberto Gonzali, Xabel de Cea y Inaciu Galán col nuevu cartafueyu d’ensayu. / E.C.
‘FORMIENTU’
Portada: escoyóse una foto suxerente que ilustra’l tema eróticu escoyíu pa esti númberu tres de la publicación.
Temática: Los responsables de la publicación quieren amosar les posibilidaes creatives de la lliteratura erótica.
Autores: la revista asoleya trabayos d’autores mozos del Principáu que pueden tener un llugar d’alcuentru onde amosar la so narrativa. Trátase d’una nueva xeneración d’escritores comprometíos cola llingua asturiana.La producción d’ensayos y narrativa en llingua asturiana cunta con un nuevu escaparate cola presentación estos díes de la nueva publicación ‘n’ast, cartafueyos d’ensayu’. Trátase del primer númberu d’esta revista que sofita l’asociación cultural del mesmu nome y que ta dirixía por Xabel de Cea.
Al tiempu, llega tamién el tercer númberu de la revista ‘Formientu’ con un especial dedicáu a la lliteratura erótica, abierta a delles firmes d’autores mozos, qu’atopen asina nueves caleyes d’espresión pal so trabayu.
Nes páxines del cartafueyu d’ensayos van amosase toles tendencies del nacionalismu cultural y políticu asturianu col oxetivu de convertise nun referente del panorama del ensayu n’Asturies.
La publicación presentóse estos díes nel congresu lliterariu L’Arribada, y yá se pue mercar en dellos puntos de venta de la nuesa xeografía.
El direutor d’esta nueva publicación desplicó na presentación que «nesti primer númberu foi más complicáu atopar los diez autores qu’escribieron dellos artículos, yá que nun yéramos una publicación conocía; creyemos qu’agora va ser más fácil porque yá tenemos dalgo».
No que cinca a esti primer volume, de formatu apaisáu, el responsable de la edición dixo «tar contentu, anque hai munches coses que meyorar y iguar». A partir d’agora «tenemos que siguir trabayando y nello tamos, falando de los temes del númberu dos».
Dende l’asociación n’ast convídase a los autores interesaos pa que collaboren con artículos que s’espublizarán en futuros númberos, «los temes puen ser mui dixebraos, dende política a cultura, tradiciones, medios de comunicación, poesía…».
Esti primer númberu abre con un entamu y un artículu firmáu por Xosé Lluis García Arias, expresidente de l’Academia de la Llingua Asturiana y profesor de la Universidá d’Uviéu, col artículu ‘Una llectura de la hestoria’.
Coleutivu Calecer
Tamién podemos atopar l’artículu ‘Nacionalismu/autonomismu tres les elleiciones de mayu de 2007’, firmáu pol llider d’Andecha Astur, Marcos Abel Fernández; otru trabayu tituláu ‘La llingua asturiana na televisión: Reivindicación y presencia (1974-2007)’ del escritor Inaciu Galán y González. ‘Facismu social y esporpolle del neonazismu español’ ye’l tema del que falen dende’l Coleutivu Calecer y ‘Un repás peles teoríes del nacionalismu y delles observaciones crítiques’ l’asuntu propuestu pol profesor Xosé Carlos Loredo Narciandi.
El restu de les páxines complétense con artículos como ‘La identidá asturiana’, de Carlos X. Blanco; la ‘(Posible) Antoloxía de poesía patriótica’ del historiador Rafael Rodríguez Valdés; el trabayu ‘Lo tradicional como determinante de la cultura d’anguaño’ del académicu Roberto González-Quevedo; ‘La tradición y la modernidá na constitución de la música asturiana contemporánea’ del cabezaleru d’Unidá, Inaciu Llope y l’artículu sobre mitoloxía ‘La cervatina y la culiebra’ d’Alberto Álvarez Peña.
Otra de les novedaes que s’asoleyen estos díes ye ‘Formientu’, anque nesti casu trátase d’una publicación que llega yá al so tercer númberu, dedicáu a la lliteratura erótica.
Nueva xeneración
Con ‘Formientu’ falamos d’una revista abierta de forma especial a los escritores más mozos; quier ser un llugar d’alcuentru colos nuevos talentos y una forma d’esparder la so obra.
Nel primer númberu d’esta publicación, que salió a la cai fai un añu, atopamos dellos autores que queríen ser la carta de presentación d’una nueva xeneración de les lletres asturianes, que nagua por un impulsu como grupu xeneracional.
El númberu dos centróse na narrativa y espublizóse al tiempu que se celebraba la Selmana de les Lletres Asturianes.
Nesti tercer númberu atopamos trabayos lliterarios que van del erotismu más inocente al realismu más fuerte.
Los responsables de la publicación despliquen la so intención «d’amosar les posibilidaes creatives d’un tema poco trabayáu na lliteratura asturiana, sacantes dalgún autor especializáu nel tema y una antoloxía».
La revista, que nos prósimos meses abrirá tamién una páxina web, cunta colos testos d’escritores como Benxa Pérez, Elizabeth Felgueroso, Pablo X. Suárez, Sergio Gutiérrez, Verónica Canel, Inaciu Galán, Jorge Fernández García, Xaime Menéndez, Ricardo Candás y Héctor Pérez Iglesias.