Inaciu Galán
Mui bones, miembros de la Sociedá Humanitarios de Samartín, amigues y amigos:
Ye un honor volver a tar equí en Morea pa recoyer esti Premiu Pepe Campo. En primer llugar quiero dar les gracies al xuráu por decidise por esti testu. Pero nun quixera dexar de felicitar a la Sociedá por esta decimoquinta edición del premiu que coincide amás colos venti años de la puesta en marcha allá pel añu 1997 de la hestoria del premiu Pepe Campo. De mano como concursu de narrativa curtia y dempués como una de les poques iniciatives llevaes alantre pa poner en valir y da-y difusión al monologuismu, unu de los xéneros más cultivaos na lliteratura asturiana y col que tanto trabayó l’escritor al que se-y fai homenaxe con esti gallardón.
Estos quince años dieron pa ver un cierte espoxigue del monólogu asturianu, y sobre manera foi tiempu d’anovación nes formes y nos temes tocaos. Podemos ver pol llistáu de ganadores d’esti premiu, que siguimos cuntando con autores que trabayen el monólogu al xeitu tradicional, como Carlos Alba “Cellero” o José Manuel Reguero González “El Maestru”, pero tamién con otros escritores de monólogu qu’apuesten por formes nueves, como Benxa Pérez o José Alfonso González Castellanos. Paez qu’entá queden asignatures pendientes, como consiguir una mayor participación de muyeres nesti concursu.
El monólogu asturianu tien nesti premiu un focu de visibilidá y de prestixu, un encontu que ye d’agradecer y que mui poques entidaes y menos instituciones ponen a disposición de la continuidá d’esti xéneru lliterariu y escénicu que cultivaron con gran ésitu los nuesos clásicos: Teodoro Cuesta, Pachín de Melás, Anxelu, Fabricio, AGO, José León Delestal, Francisco Sarendeses, ente otros, y por supuestu Pepe Campo, al que me presta facer un pequeñu homenaxe lleendo una de les sos composiciones:
PROTESTA
Están llocos de contentos
en cá de Xuan el de Xustu,
pos acaba de ñacer
un neñu guapu y regustu.
Per la terdi, una vecina,
preguntó–y a Felisín
cuandu diba pa la escuela:
—¿Compraste un nuevu hermanín?
El rapacín siguió andando
col focicu too engrifáu,
pero al pocu da la vuelta
y responde engafentáu:
—Pa eso sí, sí qu’hai perres,
pero en cambiu ¡caso en tal!
pa comprame una pelota
dicen que nun hay un rial.
Promocionar el monólogu nun ye namás facer promoción de la lliteratura asturiana y de les artes escéniques más tradicionales, sinón que ye tamién collaborar nel llabor de dignificación y puesta en valir de la llingua asturiana. Tamos nun momentu hestóricu, nel que paez que’l reconocimientu normal que tienen dende va más de cuarenta años les llingües d’otros territorios, podría llegar pal asturianu. La oficialidá ye, y sedrá, una ferramienta necesaria pal futuru del idioma, pero ensin tolos asturianos y asturianes tirando pol idioma, y esto ye, usándolu y tresmitiéndolu a los fíes y fíes, nun va tener futuru. Asina que yá sabéis, que’l futuru d’esta llingua ta nes vueses manes.
Pues bien, ensin más, quiero davos les gracies a toles persones que tais equí güei acompañándomos nesta entrega y paso a da-y llectura al monólogu. Esti añu nun pudo venir Lluis Antón González, que me suel acompañar nestes xeres de dramatrización de los testos col so gran talentu, asina que disculpái por nun tar al altor con esta llectura que voi facer darréu.
Munches gracies.