Ayeri, miércoles 18 de mayu de 2011, dexónos mio güelu Poldo a piques de cumplir 88 años. Ñació nel pueblín marineru de Llastres (Colunga) en 1923 y tuvo siempres venceyáu a la mar pola so familia y el so trabayu, viendo nuna casa del Puertu d’El Musel, onde trabayaba’l so padre, y más tarde como trabayador de la Casa del Mar, onde se xubiló a finales de los años 80. Dende entós pasó munchos años cuidadando a mio güela Nedina, hasta la so muerte en 2005 dempués d’una llarga enfermedá. De magar esi momentu hasta ayeri tuvo la suerte de vivir unos últimos años con salú y allegría, pa dar paseos, tar al tantu de l’actualidás (llegaba a lleer 3 y 4 periódicos diarios), visitar Llastres (la so pasión) y compartir munchos díes colos sos fíos y ñetos.
Equí vos dexo una de les últimes semeyes que-y saqué col móvil, el 20 d’abril, cuando xintamos xuntos, él y yo solos, nun chigre de Mareo, en Xixón.
Esti xueves va facer el so últimu viaxe, el so cuerpu va pa Ciares pa compartir espaciu cola so querida Nedi, dempués d’una ceremonia na Ilesia de San Xosé de Xixón, a les 13 hores. Voi echalu muncho de menos.
Esta otra semeya préstame especialmente pol so amor por Asturies y pola so llingua, ye de 2010.
Siéntolo muncho, Inaciu, doite’l más fonderu pésame. Nun sabía del to orixe llastrín. El mio güelu paternu y mio padre, tamién son d’ellí, de Llastres (más bien de Lluces, un pueblín a un tiru piedra de Llastres), asina que yo tamién soi un poco llastrín. Lo dicho, siéntolo enforma por ti. Y pola llingua asturiana.