PONENCIA CONGRESU DE CULTURA ASTURIANA MOZO
Uviéu, 19 d’ochobre de 2013
Situación y perspectives de futuru de les organizaciones de reivindicación llingüística y dinamización cultural n’Asturies
Coordinada por Inaciu Galán y González
Mui bonos díes a toes y toos:
Tócame apurrivos güei una visión de la situación y perspectives de futuru de les organizaciones de reivindicación llingüística y dinamización cultural, un campu ampliu y nel que, ensin dulda, podría dedicase un congresu completu, polo que vos pido que tengáis en cuenta nes ausencies lo curtio del tiempu pa tratar cuestiones a embute.
Esta ponencia ye frutu del llabor de persones y entidaes que collaboraron cola so visión al rodiu d’esti ámbitu, facemos l’esfuerciu de dar una visión de conxuntu, polo que pueden apecer idees contradictories, o pol casu, que nun coinciden esactamente, yá qu’esta quier ser una visión lo más amplia posible d’esti sector, que ye abondo plural y diversu.
Sicasí, nun podemos, nun debemos, ocultar que munches organizaciones convidaes a participar nun dieron respuesta. Esto amuesa una situación actual de cierta apatía y desánimu nel ámbitu de la cultura asturiana. Tamos nesti Congres de Cultura Asturiana Mozo pa facer un diagnósticu real de la situación y buscar soluciones, y de nada val maquillar la realidá.
Asturies ye un país nel que tenemos una vieya y bayurosa tradición asociativa. Si bien el tiempu del franquismu supunxo una torga pal movimientu d’estes entidaes, tamién ye verdá que los años caberos del réxime, con ciertu aperturismu, fueron un momentu de cambiu importante, cola apaición de numberoses organizaciones polítiques y culturales, ente les que destaquen nel ámbitu de la cultura asturiana, Amigos del Bable en 1969 y Conceyu Bable en 1974, pol progresivu cambiu que supunxeron na forma d’entender la cultura asturiana y la nuesa llingua, d’elmentu folclóricu y adornu floral a llingua de comunicación y elementu identitariu. A estes diben siguir un bon piñu d’elles, n’Asturies y na emigración asturiana.
Yá en democracia, l’asociacionismu puxa con fuercia y les entidaes apaecen perdayuri hasta configurar una cadarma asociativa amplia na que les asociaciones xuveniles tienen un pesu bien importante, magar la realidá demográfica d’Asturies, con una población cada vegada más avieyao y una mocedá fuxendo d’una economía ensin posibilidaes y d’una sociedá desilusionante, na que los datos negativos y la falta d’una perspectiva de futuru, yá dende va décades, xenera na mocedá una frustración vital y desmovilización en munchos casos.
Anque la crisis ye permanente na Asturies de finales del sieglu XX y entamos del XXI, la importancia de la crisis actual nel ámbitu estatal nun fizo más que da-y mayor fondura a la situación negativa cola que convivimos dende cuantayá nesti país. Anguaño más del 50% de la xente mozo asturiano ta ensin trabayu. Esti fechu supón que la mocedá viva más esmolecío pola propia supervivencia que por otres cuestiones, dificultando la so participación n’actividaes, como l’asociativa, sobremanera nel ámbitu cultural. Amás, nun podemos escaecer la numberosa población xuvenil que dexa cada añu Asturies en busca de trabayu, non agora, sinón a lo llargo de los trenta años caberos. Esti ésodu de la mocedá asturiano, xunto a otros condicionantes, como la gran cantidá de xente en paro o prexubilao, ta configurando un país avieyao y pocu dinámicu qu’aguarda, molestu pero con resignación, una solución que nun llega y desanima cada vegada más.
La falta de promoción d’una cultura participativa nel sistema educativu, onde en munches ocasiones nun hai nenguna referencia a esti ámbitu, fai que la mocedá asturiano salga ensin conocencia d’esta realidá, torgando entá más la so participación nel movimientu asociativu. Esti fenómenu repítise tamién nel casu de la conocencia de la cultura y la llingua propies, que nel sistema educativu tien un espaciu ridículu y en munches ocasiones inesistente, pues son munchos los asturianos a los que se-yos impide nin tan siquier el mínimu contactu de pasar pela asignatura de llingua asturiana.
No que cinca al financiamientu de l’actividá del asociacionismu xuvenil, ye conocida la continua reducción de fondos pa les ayudes al asociacionismu, mesmo dende’l Gobiernu d’Asturies como dende los Conceyos, munches vegaes abellugaos na crisis como sida pa eliminar fondos y convenios de financiamientu de programes, que pola so cuantía l’alministración podría caltener ensin problemes, pero que decide eliminar, amosando les sos prioridaes.
Les entidaes privaes aporten tamién cada vegada menos fondos, nun contestu poco favoratible no económico. El resultáu ye que l’asociacionismu, y n’especial el xuvenil, con un menor nivel adquisitivu de los sos miembros por razones obvies, vive un momentu complicáu p’acceder a ingresos que financien les sos actividaes.
Les ayudes qu’entá conceden a organizaciones xuveniles lleguen a finales d’añu faciendo que seya imposible una planificación de les actividaes añales de la organización, asina como la configuración d’un calendariu equilibráu a lo llargo del añu. Esto mesmo asocede coles ayudes convocaes pa la promoción del asturianu, faciendo que los últimos meses del añu tengan una ufierta cultural descomanada, un afoguín tres otru, mientres hai meses que son un verdaderu ermu.
Les ayudes públiques tienen tamién un componente de control per parte de les aliministraciones que faen que les organizaciones, de forma consciente o inconsciente en munches ocasiones, entren nuna dinámica de cierta autocensura col envís de caltener les actividaes planificaes y financiaes con fondos públicos. L’exemplu que puedo davos, por ser el que meyor conozo, ye’l d’Iniciativa pol Asturianu. Nos cuasi dos años que lleva funcionando, nun solicitó nenguna sovención, y sigue apostando por financiase con fondos propios, vía cuotes de socios y venta de productos. Esta postura busca garantizar l’absoluta independecia económica ya ideolóxica, y sobre manera, poder organizase l’actividá añal ensin depender de los altibaxos de les ayudes públiques, ensin depender más que del trabayu porpiu.
Les entidaes más pequeñes son les que más carecen esta situación d’escasos recursos y mui n’especial l’asociacionismu del ámbitu rural, que nun tien recursos pa competir con otres organizaciones. Y ye que l’Asturies rural vive especialmente escaecida poles alministraciones. El despoblamientu xuvenil ye entá más fuerte nesti ámbitu y les dificultaes pal llabor asociativu multiplíquense nesti ámbitu que l’alministración lleva décades ensin protexer y con una continuada desantención y recorte de servicios que podríen ayudar al caltenimientu de la xente mozo nel territoriu, y, con otres midíes complementaries, a una mayor actividá asociativa na Asturies rural, onde per otra parte, la vitalidá de la nuesa cultura y llingua ye muncho meyor, y esto habría favorecer una mayor actividá nesti ámbitu.
Magar esta situación actual, el texíu asociativu venceyáu a la cultura y la llingua asturianes sigue creando actividá económica y por tanto trabayu. Amás, la inversión pública n’asociacionismu xuvenil vien xenerando una mayor conociencia social de la identidá y cultura propies, una mocedá más activo y comprometío.
L’usu del asturianu tien una importante implantación nes asociaciones xuveniles d’Asturies, pero entá queda munchu llabor por facer. Nesti sen dende l’alministración habría apostase, más que pola convocatoria d’ayudes específiques pa la promoción d’acitividaes n’asturianu, la inclusión del asturianu de forma tresversal nes condiciones p’acceder a estes ayudes, de forma que xunto a los oxetivos específicos de cada campaña o programa, la normalización del asturianu seya unu más. Prestaríam que siguira acompañándonos equí la Directora Xeneral de Política Llingüística, qu’inauguraba esta mañana’l Congresu, pero que nun pudo sentir nenguna de les ponencies del mesmu.
Les organizaciones de reivindicación llingüística viven un momentu de cambiu, darréu d’una etapa d’enorme actividá a la que siguieron delles decepciones polítiques de cambiu nel estatus de la llingua asturiana, como la frustrada reforma del Estatutu d’Autonomía, que paecía pa munchos, diba trayer l’estatus d’oficialidá pal idioma. Agora’l movimientu cunta con una mayor pluralidá, con más organizaciones sectoriales y xenerales. Esto pue suponer una mayor competencia, que nun tien porque ser negativa siempres que nun se produzan engarradielles estériles y nun se faigan esfuercios duplicaos ensin sentíu. La pluralidá ha entendese como una riqueza y una oportunidá de facer les coses de disitntes maneres, pero con oxetivos comunes.
Otra de les cuestiones qu’axunten más dificutaes pa les entidaes ye la difusión de les sos actividaes nos medios de comunicación. Les redes sociales son un sofitu importante que tán aprovechando perbién les organizaciones, pero nun se consigue llegar cola fuercia suficiente a los medios xeneralistes.
L’ámbitu virtual ye importante, y más nel campu de la mocedá, mui implicada na sociedá de la información, pero nun podemos escaecer la necesidá de tener presencia nel ámbitu de los medios tradicionales. N’Iniciativa pol Asturianu, sirva como exemplu, creamos l’espaciu Iniciativa pol Asturianu nes ondes, que s’emite en más de quince emisores a lo llargo de tol país, amás de difundise na rede. Una forma d’aprovechar la infraestructura esistente pa dar difusión a la nuesa llingua y cultura.
La fatal d’unes bones práctiques en comunicación ye en munches ocasiones la razón de que los medios nun dediquen más tiepu. Falta formación en comunicación nes organizaciones.
Asturies y el movimientu asociativu xuvenil nun tán nuna islla, compartimos cultura y llingua con otros territorios, como los territorios lleoneses y de Miranda dl Douro, en Portugal, onde en dalgunos casos la nuesa llingua y cultura comunes vive situaciones entá peores a la de nueso. La collaboración ente organizaciones a un llau y otru del Cordal ye mínima y nun tien una continuidá nel tiempu.
Nel ámbitu estatal y européu la conocencia de la realidá de la cultura asturiana ye escasa o nula. Asturies y la so cultura tienen una escasa proyección na mayor parte los casos, anque sí podríemos facer dalgunes esecpciones, como tamos viendo nesti Congresu. Esto ye, al nuesu xuiciu, frutu d’una falta de proyectu de país per parte de les alministraciones asturianes, que traten a Asturies como un territoriu ensin oxetivos de futuru nin aspiraciones de nengún tipu, venceyando la so propuesta cultural a la importanción d’otres cultures, tamién necesaria, pero escaeciendo dafechu la busca d’una política d’esportación de la nuesa cultura al mundu.
Nel ámbitu de les revistes culturales y lliteraries, la baxada nes ayudes ta faciendo que reducir el númberu de númberos al añu y faciendo que dalgunes publicaciones desapaezan. Les mayores dificultaes tán na distribución y na continuidá ya implicación de los collaboradores de les revistes.
Na actualidá vivimos un momentu difícil, que como vimos les organizaciones faen por superar de la meyor forma posible. Dende esti Congresu de Cultura Asturiana Mozo y darréu d’un fondu trabayu de reflexón, camentamos necesario que dende’l movimientu asociativu se trabaye empobinaos nes siguientes estratexes:
- Reinventase y adaptase a los nuevos escenarios socio-políticos, superando vieyos vicios y sabiendo conectar, tiñéndolos d’asturianismu, con distintos sectores de la sociedá civil realmente esistente, dende les instituciones privaes consolidaes hasta los movimientos sociales emerxentes. Esto evidentemente implica evitar toa tentación de recreación en burbuyes artificiales que siempres deriven en guetos marxinales al marxe del movimientu real de la sociedá asturiana.
- Afalar la presencia del asociacionismu cultural nos centros educativos. Llevando a les organizaciones culturales y llingüístiques a les escueles, pa xenerar una dinámica participativa na mocedá.
- Buscar nueves formes de financiamientu, con propuestes orixinales, que permitan autofinanciar les actividaes, asina como buscar fórmules pa reducir el porcentaxe de finacimientu dependiente d’ayudes públiques, na busca d’una mayor autosuficiencia y de garantizar la indepencia d’instancies gubernamentales.
- Trabayar en collaboración cola mocedá asturiano nel esterior, buscando caltener llazos afectivos y culturales, afalando’l deséu de torna al país y aprovechando les esperiencies de la xente mozo emigrao forzosamente.
- Axuntar esfuercios pa trabayar por una política d’ayudes distinta que permita planificar el funcionamientu de les organizaciones a lo llargo de tol añu.
- Afondar na busca de la participación de la mocedá de l’Asturies rural, asina como na busca d’una concienciación de la mocedá urbano asturiano de la realidá rural d’una parte de los asturianos. Afalar les actividaes d’intercambiu ente estes dos realidaes.
- Concienciar a la sociedá y a les alministraciones de la riqueza cultural y económica que supón l’asociacionismu, y mui n’especial, aquel dedicáu al fomentu de lo propio, como fenómenu vertebrador y xenerador d’autoestima colectivu.
- Nel ámbitu de les revistes, sedría interesante afalar una rede de distribución conxunta de les revistes culturales n’asturianu, asina como la busca d’una progresiva profesionalización que permita’l so caltenimientu con calidá nel llargu plazu.
- Afalar un cambiu nes polítiques llingüístiques qu’implique un usu más tresversal del asturianu nes actividaes del asociacionismu xuvenil. Financiar non tanto les ayudes directes al usu del asturianu n’actividaes, como l’usu normal del asturianu nes actividaes de les entidaes.
- Afalar la coordinación del movimientu asociativu, n’especial nel campu reivindicativu, pa evitar duplicidá nos llabores y xenerar un clima de collaboración que permita algamar oxetivos con menor esfuerciu.
- Axuntar esfuercios na creación de canales de comunicación y espacios nos medios de comunicación tradicionales, formando en cuestiones de comunicación nes organizaciones.
- Afalar la collaboración ente organizaciones asturianes y d’otros territorios con cultura y llingua común, a la gueta d’una conciención de la mocedá d’esta realidá conxunta, asina como buscando un mayor puxu de la cultura propia a un llau y otru del Cordal.
- Afalar les actividaes que lleven la cultura asturiana y la nuesa llingua al estáu, al ámbitu européu y al mundu. Trabayar na busca d’intercambios culturales qu’arriquezan el panorama asturianu y al mesmu tiempu sirvan de trampolín pa la difusión de la nuesa cultura.
Gracies poles sos aportaciones al Conseyu de Mocedá del Principáu d’Asturies (CMPA), Javier Cubero y l’asociación Faceira.