Na tarde d’esti martes 16 d’ochobre participé na presentación de los llibros ganadores de los Premios Lliterarios n’asturianu 2011, qu’otorga’l Gobiernu d’Asturies. En primer llugar préstame felicitar a Xandru Fernández, Paquita Suárez, Xosé Anxelu Gutiérrez, Lluis Portal ya Isaac del Rivero, que presentaron les sos obres nestos premios, los más importantes de la lliteratura asturiana, l’equivalente asturianu a los premios nacionales de lliteratura que se dan cada añu en Madrid.
Dempués de la presentación de les obres, abrióse un interesante diálogu ente’l públicu, onde m’afayaba yo, y los premiaos. ¿Cómo meyorar el prestixu de la lliteratura asturiana y de los nuesos lliteratos, la so repercursión, cómo facer medrar el númberu de llectores… y arriendes d’ello, cómo meyorar el futuru que-y espera al nuesu idioma?
Pues bien, nun pudi evitalo y decidí intervenir. La probitú del actu de presentación d’estes obres dexaba bien a les clares la nula voluntá de l’alministración asturiana de da-y prestixu a la nuesa lliteratura. Entrugué nesi momentu pola ausencia que me paeció más llamativa, ¿ónde pon el Gobiernu a estos premios cuando, siendo los premios más importantes de la lliteratura asturiana, nun vien a entregalos el Presidente d’Asturies?
Pero non solo eso, sinón que la propia Conseyera de Cultura, qu’anunciare la so presencia nel actu, apaeció media hora más tarde del entamu del mesmu, pela puerta d’atrás y dexando en manes d’un puestu de baxu perfil políticu, la Directora Xeneral de Política Llingüística, la presentación d’un actu d’estes característiques.
El qu’habría ser un actu solemne, que diere prestixu a los Premios, a la lliteratura y al idioma, queda nun actu probe y ensin representación d’importancia del Gobiernu d’Asturies, pero tampoco de nengún de los representantes políticos de la oposición, ¿nun va con ellos sofitar a la llingua y la lliteratura asturianes?. Ellos, como’l Gobiernu, representen a los ciudadanos.
Y a los que-yos paeza qu’esta presencia institucional nun valdría pa nada, habrá que recorda-yos, por poner un exemplu, como la simple llectura d’unos pocos versos de la poeta asturiana Berta Piñán per parte del Príncipe d’Asturies convirtió a l’autora nuna superventes de la nuesa pequeña lliteratura asturiana, dándola amás a conocer fuera d’Asturies.
Pero unu siempres ha ser autocríticu, y mirar pal patiu de butaques del salón d’actos de la Biblioteca d’Asturies, onde se celebraba l’actu, y ver a unes poques decenes de persones (onde caben más d’un cientu) dexa a les clares tamién qu’entá mos falta muncha cultura participativa a los asturianos y n’especial a los militantes de la nuesa llingua. La nuesa presencia nestos actos, el sofitu a estes iniciatives, ye imprescindible.
Dicir estes coses n’alto, habría ser lo normal, pero a la vista de la cantidá de felicitaciones que recibí en públicu y priváu dempués del actu, paezme que nun lo ye. Tenemos d’avezanos a dici-yos les coses a la cara a los nuesos representantes siempres que tengamos oportunidá. Les coses han de dicise con educación y respetu, les crítiques han ser constructives. Tenemos de ser un movimientu de reivindicación llingüística elegante, que dea la mano a la collaboración pa dar pasos alantre, pero dende llueu nun podemos ser un movimientu mudu cuando les coses nun se faen bien. Sobremanera cuando hai soluciones tan fáciles. Si la Conseyera de Cultura tien verdadera voluntá de cambiar la situación de la lliteratura asturiana y del nuesu idioma, yá sabe cómo dar dalgunos pasos de forma cenciella, y de baldre, pa que nun heba escuses d’esti tipu, tan de moda nesti tiempu de crisis económica.