El ciclu Uviéu Abierto, entamáu pola Conseyería de Cultura, Política Llingüística y Turismu pa da-y espaciu a  una serie d’actos culturales alredor de la llingua y la cultura asturiana, va acoyer esti xueves 10 de febreru, a les 17:30 hores, na Biblioteca Ramón Pérez de Ayala d’Uviéu, la presentación de La curuxa Catuxa, d’Inaciu Galán y Vero Suari, XIII Premiu María Josefa Canellada de Lliteratura Infantil y Xuvenil.

L’actu ta empobináu a neños y neñes y ye d’asistencia llibre. Va cuntar cola presencia de los autores, asina como del actor Pedro Durán, como presentador del actu. El llibru edítalu la Conseyería con Impronta Ediciones y tien detrás un proyectu más ampliu col que los autores quieren normalizar l’usu del asturianu al traviés de la figura de Catuxa.

Autores

Vero Suari (Xixón, 1983) Diplomada en xestión d’empreses turístiques. Vien trabayando nel ámbitu de la información turística y cultural y como guía d’esposiciones y en ciclos como Xixón Tours. Ye collaboradora de la revista Viaxast y de la plataforma VerAsturies.com

Inaciu Galán (Xixón, 1986) Doctor pola Universidá d’Uviéu cola investigación «La llingua asturiana nel Franquismu», ye escritor, periodista y xestor cultural. Pol so llabor a favor del asturianu foi reconocíu col Premiu Urogallo, al que se suma a una llarga riesta de premios lliterarios, ente los que destaquen el Premiu Fernán-Coronas de poesía o l’Enriqueta González Rubín de periodismu.

Autor del primer diccionariu billingüe asturianu-inglés/inglés-asturianu, asoleyó tamién un llibru pa la reciella «Nel, el coríu que nun sabía nalar», trés poemarios «Tierra podre» (Camelot, 2016), «Patria en pallabres menores» (BaxAmar, 2018) y «Nes ruines de la nueche y les hores» (Trabe, 2018); y un volume cola so narrativa «Cartes nel horru (y delles hestories más)» (Cuatro Gotes Ediciones, 2019), presentáu dende casa neste selmanes.

El so llabor nel ámbitu lliterariu llevólu a fundar y dirixir a lo llargo de más d’una década la revista Formientu, dedicada a autores mozos. En 2018 fundó Cuatro Gotes Producciones, dende la que llevó alantre proyectos como la plataforma de youtubers n’asturianu PlayPresta, que foi premiu Gava 2019 a la meyor anovación tecnolóxica nel campu audiovisual, o’l programa Mundu Sidreru (TPA), ente otros.

Raquel Lagartos ye la ilustradora que-y pon cara a la curuxa.

Ye ilustradora y autora de cómic. Titulada n’Ilustración pola Escuela d’Arte d’Uviéu y
llicenciada en Matemátiques, trabayó en proyectos cola Factoría Cultural d’Avilés, la editorial
Anaya o’l Ministeriu de Cultura. Participó n’esposiciones individuales y colectives, y los sos trabayos fueron espuestos en llugares como’l Festival de Cine de Sitges, la Cité Internationale de la Bande Dessinée o la Biblioteca Nacional. En 2018 formó parte del grupu de ilustradoras escoyíes para la residencia artística de Angulema, Francia, dientro del proyectu européu de cooperación internacional Womrts.

Xunto con Julio César Iglesias, Raquel publicó dos noveles gráfiques, Mary Shelley: La
muerte del monstruo y La hierba del estío, pola que foi finalista na categoría de Meyor dibuxante nacional nos Premios de la Crítica de Cómic de 2018. En 2019 y 2020 foi finalista del Concursu Internacional d’Álbum Ilustráu Biblioteca Insular de Gran Canaria en collaboración cola Editorial A Buen Paso.

Semeyes del actu. Caxa Rural, Paséu La Infancia, Xixón. 26 de payares de 2014

Mui bones a toes y a toos:

Güei tamos equí pa presentar Poética de Muyeres 2014, una antoloxía mui especial que celebra dos aniversarios, como dempués vos esplicará la so responsable con más detenimientu, el centésimu aniversariu del entamu de la 1er Guerra Mundial y los diez años del llibru d’esta mesma autora Antoloxía de muyeres poetes asturianes: sieglu XX.

Entós foi un interesante exerciciu pa conocer lo que taben dando de si les voces femenines y güei, una década dempués, esta nueva publicación ye un perbón termómetru pa ver cómo evolucionó la lliteratura escrita por muyeres n’asturianu y en gallego-asturianu.

Nestos diez años caberos, hai más escritores muyeres, más premiaes en concursos. Tovía ayeri anunciáse qu’Ángeles Carbajal ye la ganadora del Premiu Xuan María Acebal de poesía, que nos sos primeres dieciséis ediciones nun ganó nenguna muyer, y que dende 2010, lleva yá dos ganadores d’esti xéneru. La primera foi Marta Mori en 2010, col poemariu La mio voz.

Les muyeres fueron una constante a lo llargo de la hestoria de la lliteratura asturiana Xosefa Xovellanos yá nel sieglu XVIII, Enriqueta González Rubín, la primer novelista –muyer o home- de les nueses lletres, Florina Arias, María Xosefa Canellada –qu’abrió’l camín de la lliteratura infantil y marcó un fitu tamién na Filoloxía Asturiana, Ángeles López Cuesta –ñeta del poeta Teodoro Cuesta-, María Balbín, María Teresa González, Nené Losada… La llista ye llarga, anque ta mui lloñe de la bayurosa nómina d’esritores masculinos en llingua asturiana.

La lliteratura fecha por muyeres tuvo siempres los pilancos que tuvieron les muyeres en tolos ámbitos. La so obra tuvos siempres tapecida, foi poco estudiada, tuvo y ta en munchos casos entá inédita. Pero les coses van camudando. Güei preséntase esta antoloxía que tien como principal virtú da-y visibilidá a les xeneraciones lliteraries de muyeres escritores que conviven anguaño.

28 muyeres, 26 d’elles n’activu, dende los trece años hasta los ochenta. Pamidea nun toi tracamundiando muncho los datos al afirmar que ye probable que güei hai más escritores muyeres n’asturianu n’activo, que la suma de toles anteriores a los años setenta del sieglu XX.

La lliteratura asturiana normalízase tamién cola entrada de la muyer nes nueses lletres, col so protagonismu medrando cada añu. Poética de Muyeres 2014 afonda nesi procesu y failo con una amuesa amplia del xéneru nel que más pesu tienen les voces de muyer na nuesa lliteratura, la poesía. Nun tán toles muyeres qu’escriben, pero si una amuesa representantiva por xeneraciones, por estilos, por momentos de la so carrera lliteraria.

Entá queda muncho por caminar na normalización del asturianu, pero que les muyeres s’impliquen nesti procesu ye dende llueu una bona señal, un niciu d’un futuru meyor.

Como home, ye un honor pa min participar nesta presentación. Unu siente la responsabilidá de pertenecer al xéneru hestóricamente dominante, al xéneru que tanto malo fizo contra la muyer a lo llargo de los sieglos. Y unu ye consciente de la necesidá de camudar esa situación. Y faigo por intentalo en tolos ámbitos de la vida. Nel campu lliterariu y como director de la revista Formientu d’escritores mozos, vengo puxando porque la presencia de moces vaiga a más, animando a les escritores a siguir alantre, a mandar testos, a facer que la so obra asuma un mayor protagonismu. Y ta teniendo resultáu, el númberu d’esti añu, qu’esperamos asoleyar a lo llargo del mes que vien, va tener per primer vegada a tantes muyeres –o inclusive dalguna más qu’homes- nes sos páxines.

Güei equí tamién, préstame poner un granín d’arena na normalización de la presencia de la muyer nes Lletres Asturianes. Coincide esta presentación tamién col 175 aniversariu del asoleyamientu del primer llibru en llingua asturiana, que foi precisamente y como esti que se presenta güei, una antoloxía lliteraria, el perconocíu Poesías en dialecto asturiano de Xosé Caveda y Nava. Ye por ello tamién un momentu hestóricu. 175 años separten a estes dos ediciones. Naquella, namás una muyer taba ente los autores esbillaos. Güei cualesquier antoloxía lliteraria del asturianu, ensin ser monoxéneru como esta, sedría impensable ensin un bon piñu de muyeres poetes o narradores. Güei, alredor de dos sieglos dempués la muyer ye cuasi igual nesti ámbitu.

Nesto tuvieron que ver munches muyeres qu’a lo llargo de los caberos cuarenta años vienen lluchando por da-y espaciu a la muyer nes nueses lletres, muyeres como les antologaes nel llibru, Marta Mori, Esther Prieto, Mª Esther García y tantes otres.

Ente elles, ta la voz d’Helena Trexu, qu’amás d’escritora y cuentacuentos pa neños col Grupu Epona, fai’l llabor importante de crear obres como esta antoloxía, que dan a conocer la obra de les muyeres embaxo la so coordinación. Ye destacable tamién el curiáu diseñu de la obra, de manes de l’artista Violeta Mateu. El frutu, esti llibru del que güei vais poder sentir dellos poemes esbillaos y acompañaos pola música d’una de les autores presentes na obra, Naomi Suárez.

Helena Trexu, gracies por cuntar conmigo pa presentar esti llibru fechu por muyeres, pero empobináu a toles persones, y gracies por ufrir al públicu llector la posibilidá d’averase a la obra d’estes 28 escritores na nuesa llingua. Espero que dientro de diez años, o menos, podamos volver a venos nuna presentación como esta y cola obra de munches nueves y bones voces en llingua asturiana.

Munches gracies.

Entrevista nel programa Pieces de la TPA (Televisión Pública d’Asturies) falando de “Nel, el coríu que nun sabía nalar” y de la revista Formientu.

Auditoriu d’Uviéu, 23 de febreru de 2013. Inaciu Galán y González. Presidente d’Inciativa pol Asturianu

Socios y socies, amigos y amigues:

Vémonos equí un añu dempués de qu’esta Xunta Direutiva asumiera’l llabor de dirixir la organización entós recién ñacida. Doce meses nos que se trabayó con munches ganes y nos que cumplimos munchos de los oxetivos que mos plantegamos.

Sicasí, somos mui ambiciosos, y nun podemos cayer na autocomplacencia, tamos equí pa marcar les llínies del añu viniente, y pa meyorar aquelles coses que nun se ficieron bien del too, o que se ficieron mal. Hai muncho por facer, hai coses pendientes y proyectos nuevos. Esti ye’l meyor momentu pa exercer la crítica constructiva y collaborar a meyorar esta organización, que ye de vueso, como socios que sois de la mesma. Por favor, nun calléis, aprovechái esta Xunta Xeneral, el máximu órganu de la organización, pa facer ver lo que podría tar meyor o p’aportar nueves propuestes.

Tamién ye un bon momentu p’asumir responsabilidaes. Queremos tar presentes nos conceyos d’Asturies, y los nuesos socios tienen que lliderar esa presencia, creando grupos de trabayu en tolos que podamos, porque les instituciones llocales son quiciabes les entidaes que más pueden facer pola visibilidá del idioma, y tenemos que tar enriba d’ellos, pidiendo más, sollertes a los retrocesos.

Tenemos que siguir trabayando pa xenerar un clima social de sofitu a la llingua asturiana, en contactu con asociaciones, partíos, y en xeneral, tola sociedá civil, a pie de cai. Esti añu plantegamos como un importante oxetivu siguir medrando como organización, de forma interna, con un esfuerciu por facer munchos más socios  y más voluntarios pa tener más presencia na cai, y danos asina a conocer cada añu más.

La directiva nun pue ser l’únicu grupu de socios activos, y pasu ente pasu fuimos consiguiendo que más persones ayenes a ella, socios y non socios, collaboren cola organización. Vuelvo a insistir na necesidá d’implicavos, caún na midida de les sos posibilidaes, dedicando unes hores al día, a la selmana o al mes, pero poniendo un granín d’arena.

Préstame ver qu’un añu dempués, esta ye una organización cada día más completa, con más xente trabayando y con más reperscusión na sociedá asturiana. Pero’l trabayu pa salvar la llingua asturiana ye contrarreló. Tenemos un idioma que muerre, una clas política que nun pon soluciones y una sociedá entá poco concienciada. El llabor nun ye fácil, pero préstame pensar que consiguimos xenerar una ferramienta útil pa trabayar pol futuru del idioma.

Aprovechái esta Xunta Xeneral pa facela meyor, más fuerte y recordái al salir d’equí que tenemos que ser una fonte de concienciación na sociedá, cola familia, colos amigos, nel trabayu, creando conciencia a favor de la llingua asturiana, usándola con normalidá, mostrando lo positivo que ye tener un idioma y la responsabilidá que supón caltenelu pa les futures xeneraciones.

Munches gracies.

XIXÓN, 05/11/2012

El Conceyu Universitariu pol Asturianu (CUPA) tien abiertu’l plazu p’apuntase a la que yá ye la tercer edición de los Cursos d’Asturianu en Xixón, una esperiencia formativa qu’entama en collaboración cola Academia de la Llingua Asturiana y qu’esti añu va organizase de forma conxunta ente’l CUPA ya Iniciativa pol Asturianu. El plazu termina a finales d’esta selmana, el 10 de payares y yá tán apuntaos dellos alumnos de fuera d’Asturies, pa los que se va facilitar el siguimientu a distancia, gracies a les nueves tecnoloxíes. Ente los alumnos matriculaos, amás d’asturianos, xente de Méxicu, Uruguái, Suiza o Xapón.

El cursu, que se va facer na sede del Conseyu de la Mocedá de Xixón (Avda. Manuel Llaneza, 68), va entamar a partir de la segunda quincena del mes de payares (el martes 13 de payares), cuntando con 35 hores llectives.

El cursu va celebrase los martes y xueves, de 19 a 21 hores, parando pa les fiestes navidiegues y tornando en xineru. Ta empobináu a persones ensin conocimientos d’asturianu o con nivel baxu de conocencia ya inclúi, pa les persones que lu superen, un diploma de l’Academia de la Llingua Asturiana, entidá reconocida pola Conseyería d’Educación pa la formación del profesoráu.

El preciu de la inscripción ye de 50 euros, incluyendo los materiales necesarios pa llevar alantre’l cursu, como’l manual “Xeitu”, que va sirvir de guía pal cursu y qu’asoleyó l’Academia de la Llingua Asturiana, xunto a otros llibros.      

Les inscripciones pueden facese nel corréu lletrónicu conceyuasturianu@gmail.com o nel teléfonu 615 982 816, hasta’l 10 de payares.

Dende Iniciativa pol Asturianu y el CUPA animen a participar nesti cursu que va sirvir pa dar una conocencia básica y adaptada al nivel del alumnáu de la llingua asturiana, deprendiendo les normes ortográfiques, vocabulariu y otres cuestiones, con una clases amenes que van apoyase n’elementos audiovisuales, trabayando tamién cuestiones rellacionaes cola sociollingüística y la cultura d’Asturies.