Formientu presentó’l númberu 10 contabilizando más de 70 autores en 5 años

La Sociedá Cultural Xixonesa foi’l llugar escoyíu pa la presentación del númberu 10 de la revista lliteraria Formientu. L’escritor y hestoriador Javier Cubero de Vicente presentó l’actu, nel que’l director de Formientu, Inaciu Galán, faló de los cinco años de la revista, faciendo repás a l’activida de la mesma nos diez númberos que lleva espublizaos. Darréu lleeron los sos testos nesti númberu, Denis Soria, Blanca Fernández, Alejandra Sirvent, y el propiu Cubero. Amás, l’actu sirvió pa recaldar fondos pa l’asocación Iniciativa pol Asturianu cola venta de revistes.

Reprodúzovos la mio intervención nel actu.

Presentación de Formientu 10

16 d’abril de 2012 · Sociedá Cultural Xixonesa

Inaciu Galán y González

Mui bones tardes a toos y a toes:

En primer llugar prestaríame dar les gracies a la Sociedá Cultural Xixonesa pola so disposición pa organizar esta presentación de la revista Formientu. Y a Javier Cubero, incansable trabayador pola nuesa cultura, que foi quien xestionó la celebración d’esti actu.

Va yá más de cinco años que presentamos a menos d’un quilómetru d’esti llugar, el númberu 1 de Formientu. Entós el proyectu ñacía con munches ganes ya ilusión, pero con nenguna esperiencia pela nuesa parte. Col sofitu de Benxa Pérez, cofundador de la revista, entamamos el llabor de buscar autores mozos qu’escribieran n’asturianu, falando coles editoriales, con collacios, buscando ente les últimes publicaciones…

Naquel primer númberu de 2006 que titulamos “Les voces nueves de la lliteratura asturiana” apurrimos al públicu testos de 27 autores, el númberu con más pluralidá hasta’l momentu, quería ser una presentacion de la xeneración más nueva de les lletres asturianes. Col tiempu siguimos espublizando dos númberos al añu, con retrasos, con un númberu doble pel mediu, con dos especiales, unu dedicáu a la narrativa, con más de 140 páxines y otru dedicáu a la lliteratura erótica.

Dende entós venimos presentando la revista nos llugares más diversos. Cases de cultura, teatros, cafeteríes, eventos culturales, en tolos llugares nos que mos convidaron per Asturies y tamién fuera, porque esportar la nuesa lliteratura ye mui importante. Y güei equí dempués de más de cinco años venimos per primer vegada a la Sociedá Cultural Xixonesa con esti númberu 10 ente les manes y préstame especialmente poder presentalu nun llugar como esti, con una tradición tan importante detrás, con tanto trabayao pola cultura. Gracies por acoyenos güei y por interesavos por conocer el proyectu d’esta modesta revista que sigue’l so camín, pali que pali.

Llegar a los diez númberos d’una revista d’esti tipu ye cuasi un suañu y facelo en namás cinco años entá más. Acabamos de despidir a los collaboradores más “vieyos”, porque la revista entamó almitiendo testos d’autores ñacíos de 1975 n’adelantre, pero aquellos que va cinco años podíen encuadrase nel lema de la revista “lliteratura mui moza”, son agora yá menos mozos y munchos con una carrera lliteraria al llombu perimportante. La mayoría de los 27 autores d’aquel primer númberu tienen güei más d’un llibru nes llibreríes, y esto ye bona señal, la revista cumplió l’oxetivu de dar a conocer nueves voces, d’aportar el so granín d’arena na xeneración d’un futuru de calidá pa la nuesa lliteratura.

Formientu empobina una dómina nueva, con enerxíes anovaes y con sangre lliterario nuevo, almitiendo namás testos d’autores ñacíos de magar l’añu 1980. Primer consecuencia: la media d’edá vese rebaxada abondo nesti númberu diez, y apaecen delles voces nueves na revista, cola doble allegría que de qu’hai ente elles voces femenines, onde davezu nun tuvimos bayura. Siguimos amás cola presencia de crítica lliteraria nes nueses páxines, estrenada nel númberu postreru.

Como director nun puedo tar más satisfechu d’esti camín andáu y nel que cunté col sofitu de los autores y d’otros collaboradores que permitieron que la revista Formientu aportara hasta equí y amosara la obra d’hasta 70 autores nestos años. 70 autores nun país como Asturies, nuna lliteratura tan pequeñina como la de nueso, ye un númberu ablucante, y esperamos siguir superándolu, y que nos vinientes cinco años de Formientu, atropemos tovía más autores na revista.

La revista ta abierta a autores mozos de tol dominiu llingüísticu asturlleonés, y yá espublizaron testos autores de Lleón o Zamora, amás de dalgunos descendientes d’asturianos n’otros estaos d’Europa y América, que siguen calteniendo viva la llamar de la nuesa llingua al otru llau del Atlánticu.

Nesti númberu apaecen poemes de Cristina Menéndez Martín (Mieres, 1984), Frantxu Melero (Avilés, 1987), Inaciu Galán y González (Xixón, 1986), Abel Aparicio González (Lleón, 1980), Alejandra Sirvent (Pravia, 1980), Fonsu Suárez Román (Xixón, 1991), Javier Cubero de Vicente (Xixón, 1986), Vítor Suárez Piñero (Uviéu, 1986) y rellatos de Suárez Piñero y Blanca Fernández Quintana (Bimenes, 1994), amás d’una crítica lliteraria de Denis Soria Fernández (Xixón, 1989).

El viniente númberu vendrá enllenu de cambios, como una nueva dómina de la revista, qu’entá tamos diseñando, pero na qu’aguardamos acertar. La filosofía va siguir siendo la mesma, afalar la creatividá lliteraria ente la mocedá y da-y futuru a la nuesa lliteratura dando a conocer voces nueves, y al mesmu tiempu dándo-y espacios al nuesu idioma, al asturianu, pa que nel futuru podamos siguir contando con esta riqueza que supón tener una llingua propia, con tola so hestoria, con tol so futuru y posibilidaes de xenerar riqueza p’Asturies.

Nos últimos meses vengo trabayando xunto a otres munches persones nel proyectu d’Iniciativa pol Asturianu, una organización que trabaya por construyir un futuru meyor pa la llingua asturiana, y por eso les ventes de la revista, la cantidá íntregra pola que se vende cada Formientu va destinada güei a l’actividá d’esta organización. Una forma de poner un granín d’arena pal futuru del asturianu. Amás, nun puedo dexar pasar esta oportunidá pa convidavos a facevos socios de la organización. D’otra manera agradecevos la vuesa presencia nesti actu.

Agora ye’l momentu de que los autores mos dean muestra de los sos testos.

Munches gracies.

Espublizáu por

Máster en Sociedá de la Información y el Conocimientu na UOC, Grau en Periodismu pola UDIMA, Especialista n'asturianu nel Máster de Profesoráu, Diplomáu en Turismu y Especialista en Xestión Cultural pola Universidá d’Uviéu. Anguaño preparo la mio tesis doctoral. Tengo trabayao en medios como la Cadena Ser, Onda Peñes, Asturnews... Dende 2007 presento programes na TPA, como Xente de casa y el recién Territoriu Sidreru. Los llunes en Noche tras noche, falo na RPA. En 2012 escoyéronme pa presidir Iniciativa pol Asturianu, lo que compaxino cola direición de la revista Formientu, el trabayu como profesor en dellos cursos, xestor cultural, amás d'otres xeres profesionales, culturales y reivindicatives. Dende 2016 exerzo como profesor de llingua asturiana y lliteratura n'institutos.

Dexar un comentariu

La to cuenta de corréu nun va espublizase.