Sobre la situación del asturianu nes escueles

Darréu reproduzo l’artículu asoleyáu na versión en papel de La Nueva España nel que dende Iniciativa pol Asturianu contestatmos a una carta asoleyada nel mesmu periódicu, aclarando cuestiones alredor de la situación del asturianu nel enseñu. 

Una carta asoleyada estos díes en LA NUEVA ESPAÑA y titulada «El asturiano contra los asturianos» incluyía delles afirmaciones falses, y creemos que feches col únicu oxetivu de perxudicar la imaxe del nuesu idioma ente los asturianos. Nun podemos quedar ensin contestar a estes falsedaes. Amás, sírvenos d’escusa pa emitir una opinión sobre la situación del enseñu del asturianu nes escueles y nos institutos.

Na carta afirmábase qu’a los alumnos que nun estudien asturianu se-yos obliga a “nun facer nada”, cuando en realidá tienen hores d’estudiu. De toes formes, coincidimos en qu’esta situación ye absurda, tolos alumnos tendríen d’asistir a les clases d’asturianu, como toos asisten a matematiques o ciencies, independientemente de les sos creencies o gustos.

Afírmase tamién nel testu que los alumnos pueden dir a clases d’asturianu si quieren. La realidá ye bien distinta, son munchos los estudiantes a los que, de forma illegal, nun se-yos ufierta l’asignatura o a los que se-yos niega la creación de grupu nel so colexu o institutu. Los tribunales yá falaron y ficiéronlo a favor de los alumnos, anque les sentencies nun se cumplen, cola complicidá del Gobiernu. Amás, como’l propiu autor de la carta afirma, nos colexos concertaos (sacante unes poques escepciones), nun se dan clases d’asturianu, lo que va dafechu en contra de la normativa llegal actual. La inspección d’Educación tien que correxir esa situación, pues en tolos centros educativos ye obligao ufiertar l’asignatura a los alumnos, seyan concertaos o non.

Dende Iniciativa pol Asturianu creemos que l’asignatura d’asturianu nun puede siguir siendo optativa, pues la única forma de garantizar la llibertá d’elección ye tresmitiendo a los neños y neñes que pasen pel sistema educativu les dos llingües, castellán y asturianu, amás de les llingües estranxeres que se considere. Cuando se saben dambos idiomes, castellán y asturianu, puede decidise qué llingua se quier usar, ye entós cuando ye posible ser llibre pa escoyer. Amás, los estudios fechos n’escueles onde s’enseña l’asturianu, demuestren que’l conocimientu de les dos llingües ameyora los resultaos en toles asignatures, pues ye positivo pal desenrrollu cognitivu de los neños.

Cuando se sal del sistema educativu ensin saber usar correctamente una d’elles, nun se tien elección d’usu. Por eso ye necesario que se xeneralice’l deprendizaxe del asturianu en tolos niveles educativos y pa tolos alumnos, de la mesma forma na que toos tenemos de forma obligatoria clases de castellán, matemátiques o educación física.

La situación de los maestros y profesores d’asturianu ye tamién llamentable, y ye inesplicable que tando tolos partíos de la Xunta Xeneral d’alcuerdu con esti análisis entá nun se solucionare. Esta ha ser una de les prioridaes de la Conseyería d’Educación nos meses vinientees.

Amás, y a la vista de los resultaos positivos que n’otros territorios tienen los procesos d’inmersión llingüística nel procesu educativu, el próximu Gobiernu d’Asturies habría poner en marcha esperiencies pilotu pa enseñar otres asignatures usando l’asturianu como llingua vehicular, una forma d’enseñar l’idioma propiu qu’ayudaría a da-y normalidá y vitalidá al idioma que tamos seguros, nengún asturianu quier perder. Evitalo, nun s’engañen, pasa por una presencia más fuerte del idioma nel sistema educativu.

Inaciu Galán y González

Presidente d’Iniciativa pol Asturianu

www.iniciativapolasturianu.org

Artículu na páxina de LNE

Espublizáu por

Máster en Sociedá de la Información y el Conocimientu na UOC, Grau en Periodismu pola UDIMA, Especialista n'asturianu nel Máster de Profesoráu, Diplomáu en Turismu y Especialista en Xestión Cultural pola Universidá d’Uviéu. Anguaño preparo la mio tesis doctoral. Tengo trabayao en medios como la Cadena Ser, Onda Peñes, Asturnews... Dende 2007 presento programes na TPA, como Xente de casa y el recién Territoriu Sidreru. Los llunes en Noche tras noche, falo na RPA. En 2012 escoyéronme pa presidir Iniciativa pol Asturianu, lo que compaxino cola direición de la revista Formientu, el trabayu como profesor en dellos cursos, xestor cultural, amás d'otres xeres profesionales, culturales y reivindicatives. Dende 2016 exerzo como profesor de llingua asturiana y lliteratura n'institutos.

Dexar un comentariu

La to cuenta de corréu nun va espublizase.