El diariu El Comercio asoleyaba esti vienres 21 de febreru y coincidiendo col Día Internacional de la Llingua Materna, una carta abierta que como presidente d’Iniciativa pol Asturianu dirixí al Presidente d’Asturies, el socialista Javier Fernández.
Na carta faise un llamáu a Fernández, al so gobiernu y a la so formación, la FSA-PSOE, pa que camuden la so postura contraria a la oficialización del asturianu ya impulsen esti procesu hacia la normalidá de la llingua natal de munchos asturianos y asturianes.
Equí tenéis el testu completu…
Al Presidente d’Asturies (Nel Día Internacional de la Llingua Materna)
Estimáu Presidente:
Güei celébrase nel mundu enteru’l Día Internacional de la Llingua Materna, convocáu pola UNESCO dende l’añu 2000. Esti día quier xenerar la conciencia sobre la importancia que tienen toes y caúna de les llingües del mundu, ensin escepción.
La llingua materna, ye dicir, l’idioma que se deprende en casa, ye una riqueza familiar, pero tamién un elementu que mos vertebra como sociedá, que refuerza la convivencia, xenera autoestima y pon en valor la cultura, les tradiciones… Un elementu que nun ta reñíu col conocimientu d’otres llingües y otros llugares, sinón al revés, un elementu que mos permite abrinos al mundu sabiendo quién somos, que proyecta a una comunidá hacia’l futuru.
Asturies lleva cuasi cuarenta años viviendo una anomalía, una democracia que tien una importante deficiencia nel campu de les llibertaes ciudadanes. Vivimos con una llingua que nun ye oficial y con ello una parte de los sos ciudadanos nun tienen los mesmos derechos que’l restu. Esti fechu ye inalmisible y cada día más xente comparte la necesidá de que cambie esta situación, que yá denunciaron inclusive les instituciones europees en numberoses ocasiones.
Porque la llingua asturiana, y con ella, la cultura d’Asturies, ye una xoya que forma parte del patrimoniu de tola humanidá. Ye la nuesa aportación a la cultura universal. Y tamos na obligación de conservala y tresmitila a los futuros asturianos, como mos la tresmitieron a nós los nuesos güelos.
Sabemos que’l so gobiernu, y el so partíu, nun acaben de sumase a la mayoría de los asturianos y asturianes que, independientemente de que falen asturianu o non, entendemos que tolos ciudadanos, escueyan la llingua qu’escueyan pa espresase, tienen de tener los mesmos drechos frente a l’alministración.
El PSOE, el so partíu, tien un postura de defensa de les llingües ellí onde hai una llingua minorizada (como en Galicia, Baleares o Valencia, póngo-y dellos exemplos) pero la FSA-PSOE, y aínda teniendo a muchos ciudanos nes sos files qu’apoyen un futuru dignu pal asturianu, sigue ensin dase cuenta del erru que ta cometiendo al dexar que l’asturianu vaiga apagándose pasu ente pasu como llingua, llevándolu a la desapaición si nun cambia esta postura.
Nun ye l’únicu culpable, pero naide pue facer más qu’usté. Necesitamos que, como Presidente d’Asturies, llidere un cambiu nesta situación, que vea’l retu que tien delantre y la oportunidá de cambiar la situación del asturianu. Impulse la oficialización de la llingua asturiana, entregue a los ciudadanos la llibertá pa espresase na llingua que quieran y garantice con ello un futuru pal asturianu como llingua normal, como elementu vivu de la nuesa identidá asturiana. Nesti llabor cuntará cola simpatía y l’apoyu de los asturianos.
Y pidímos-ylo tamién, a sabiendes de qu’usté, tien tamién esi cariñu que tolos asturianos tenemos pola nuesa llingua, porque ye la llingua na que-y faló la so madre dende bien neñu, na que vivió nel so Mieres del Camín natal, na que compartió vivencies con collacios y familiares. Nun dexe desapaecer eses pallabres que tamién son suyes. Sr. Presidente, esti cambiu ta nes sos manes.
Inaciu Galán y González
Presidente d’Iniciativa pol Asturianu