• Inaciu Galán, Naomi Suárez ya Irma González-Quevedo van recibir esti sábadu’l premiu
El Conceyu d’Estorga y l’Asociación Cultural Faceira entreguen esti sábadu 1 de marzu los gallardones del so primer Certame Lliterariu Astúrica, un premiu de rellatu y poesía qu’organicen dende Lleón con intención d’aportar a tol dominiu llingüísticu asturlleonés, dende Asturies a Miranda del Douro. Ente los cinco ganadores d’esta primer edición, hai trés xóvenes asturianos, Inaciu Galán, Naomi Suárez ya Irma González-Quevedo.
Nel apartáu de prosa, la zamorana Mª José Zurrón fízose col primer premiu por “Llobu”, el segundu premiu lleva la firma del escritor y periodista xixonés, Inaciu Galán, col rellatu “Cartes nel horru”. El tercer premiu en rellatu va entregase esti sábadu a la profesora y música Naomi Suárez, de La Pola Siero, por “El conciertu”.
Na estaya de poesía quedó ermu’l primer premiu. En segundu llugar la obra “Al Reinu Maravellozu” de Thierry Alves, autor residente en Francia, pero orixinariu de Miranda del Douro, comarca de llingua asturlleonesa en Portugal. El tercer premiu foi pa Irma González-Quevedo, d’Uviéu, trabayadora del ámbitu sanitariu y escritora n’asturianu con fuertes venceyos cola comarca lleonesa del Altu Sil.
L’actu d’entrega va celebrase esti sábadu 1 de marzu a les 19 hores na sala Ergástula d’Estorga, onde va cuntase cola presencia de Mercedes González Rojo, conceyala de cultura; Fernando Álvarez Balbuena, Héctor García Gil y José Alfredo Hernández Rodriguez como miembros del xuráu, Ricardo Chao y Abel Aparicio como secretariu y vicepresidente de Faceira respectivamente, y una actuación final del grupu de folk lleonés Tarna.