Estes son les pallabres que Naomi Suárez y yo quiximos mandar a la entrega del premiu, al que nun pudimos asistir.
PALLABRES NA ENTREGA DE PREMIOS DEL
Ier CERTAME LLITERARIU ASTÚRICA
ESTORGA, LLEÓN, 1 DE MARZU DE 2014
Estimaes autoridaes del Conceyu d’Estorga, amigos de l’asociación Faceira, asistentes al actu:
En primer llugar quiero disculpar a Inaciu y Naomi porque nun pueden tar equí con vosotros nesti día nel que-yos facéis l’honor de da-yos esti premiu. Nun pudiendo tar fisicamente, prestába-yos tener unes pallabres d’agradecimientu y tar asina de dalguna manera, presentes nesti actu.
Inaciu pídeme que vos cuente lo siguiente:
Yá nel añu 2007 tuvi nesta guapa villa d’Estorga pa recoyer un premiu que foi de dalguna manera antecesor d’esti nuevu certame lliterariu Astúrica. Y güei vuelve a faceme la mesma, o más ilusión, recibir esti premiu, pol que tengo que felicitar a Faceira por impulsalu y convertir a Estorga nel esponente d’un movimientu bien importante y necesariu, que devuelva a asturianos, lleoneses y mirandeses la conciencia de que falen la mesma llingua.
Asturianu, lleonés, mirandés… distintos nomes pa designar una mesma realidá, como pasa con cásique toles llingües: “castellán y español”, “catalán, valencianu y mallorquín”, “holandés y flamencu”… Nun ye tan importante cómo llamalu sinón que la llingua siga viva y que sepamos que compartimos el mesmu patrimoniu llingüísticu, cultural, hestóricu…
Naomi y Naciu pídenme que vos tresllade tamién lo que va darréu:
Sentímonos arguyosos de dicir que falamos lleonés, el lleonés d’Asturies, como esperamos que vos podáis sentir arguyosos de falar l’asturianu de Lleón, o asturlleonés… danos igual, lo que queremos ye qu’esta llingua de nueso, que compartimos y que vive situaciones tan complicaes en tolos territorios, puxe y que puxemos por ella xuntos. Porque los enemigos del lleonés nun tán n’Asturies, y los enemigos del asturianu nun tán en Lleón. Porque’l Cordal, los montes que tán pel mediu, nun son una muria que mos dixebre, son una ponte que mos xune, la columna vertebral d’una comundiá llingüística que tien de recuperar l’arguyu pola so llingua.
Por eso fácémosvos un llamáu a trabayar xuntos pol futuru del idioma, y felicitámosvos por esti concursu y por toles actividaes entamaes a favor de la nuesa llingua, porque tais construyendo pontes ente estos dos pueblos qu’un día fueron un mesmu reinu. Sabéi que n’Asturies tenéis amigos y aliaos nesti llabor y que podéis cuntar con nós, como cuntamos con vosotros nos nuesos problemes y retos comunes.
Norabona por siguir nesti camín pol idioma y munches gracies. Esperamos poder tar pronto n’Estorga y davos les gracies en persona. Un abrazu de:
Inaciu Galán y González
&
Naomi Suárez González