Cola llingua asturiana a la Universidá d’Oxford

L’asturianu va sentise esta selmana na prestixosa universidá inglesa
small_oxford

Esti xueves voi dar una conferencia na Universidá d’Oxford, n’Inglaterra. Sedrá dientro del marcu del XVI Forum for Iberian Studies. Embaxo’l títulu “L’asturianu: l’anomalía d’una llingua non oficial nun estáu plurillingüe”, voi facer por esplicar a los presentes, alumnos y profesoráu de la Faculty of Medieval and Modern Languages de la Universidá d’Oxford, asina como a espertos en llingües ibériques del mundu enteru, la situación llegal del asturianu, como llingua ensin reconocimientu del estatus d’oficialidá, apurriendo casos de discriminación y un repás a la hestoria de la situación llegal del asturianu, sobre manera nos trenta años últimos.

La conferencia, a la que voi dar llectura n’asturianu na Taylor Institution, va cuntar con una torna en papel al inglés pa les persones que nun seyan a siguila nesti idioma. Ente los conferenciantes presentes nel XVI Forum for Iberian Studies que se celebra nesta prestixosa universidá fundada nel añu 1096, tarán espertos d’universidaes europees y d’otros países pa falar de la hestoria, la situación y les característiques de les llingües que se falen na Península Ibérica.

Pa min ye un honor poder llevar a la nuesa llingua a esti congresu y facer que se siente y se conoza la so situación nun espaciu como la Universidá d’Oxford. Si tais pela zona. ¡vémonos!

 Programa completu del congresu.

Espublizáu por

Máster en Sociedá de la Información y el Conocimientu na UOC, Grau en Periodismu pola UDIMA, Especialista n'asturianu nel Máster de Profesoráu, Diplomáu en Turismu y Especialista en Xestión Cultural pola Universidá d’Uviéu. Anguaño preparo la mio tesis doctoral. Tengo trabayao en medios como la Cadena Ser, Onda Peñes, Asturnews... Dende 2007 presento programes na TPA, como Xente de casa y el recién Territoriu Sidreru. Los llunes en Noche tras noche, falo na RPA. En 2012 escoyéronme pa presidir Iniciativa pol Asturianu, lo que compaxino cola direición de la revista Formientu, el trabayu como profesor en dellos cursos, xestor cultural, amás d'otres xeres profesionales, culturales y reivindicatives. Dende 2016 exerzo como profesor de llingua asturiana y lliteratura n'institutos.

Dexar un comentariu

La to cuenta de corréu nun va espublizase.