Conocí a Nené n’ochobre de 2007, cuando-y entregamos, dientro de los actos de l’Arribada, en Xixón, el Premiu Timón por tola so carrera lliteraria. Recuerdo recibila a la so llegada y como cola so cariñosa personalidá consiguía ganase a toles persones que diba presentándo-y.
Yera una muyer allegre y una poeta maraviyosa, que tenía la importante habilidá de ser una perbona recitadora de la so poesía. Prestaba pola vida vela y sentila recitar de memoria versos y versos. La calidá de la so lliteratura pero sobre too esta facilidá pa facer llegar la poesía a la xente na so propia voz fizo que se convirtiera nuna poeta mui querida y reconocida nos sos años últimos.
Nené entamó a escribir escondiendo la so poesía, namás pa los de casa, y vivió tola vida escondiendo la so propia llingua. Y ye qu’anque defendió en público la oficialidá y escribió gran parte de la so obra n’asturianu, Nené solía espresase en castellán nos actos públicos y nos medios, nun siendo cuando recitaba les sos poesíes. A Nené robáron-y la so propia llingua como llingua d’usu públicu, y anque na so poesía, volvía a sacala de casa, nunca pudo recuperala del too.
Agora que’l Gobiernu d’Asturies celebra esta Selmana de les Lletres Asturianes dedicada a la so figura, ye un bon momentu pa recordala y homenaxeala, anque nesta ocasión, podemos tar tranquilos, en vida recibió per parte de munchos asturianos el reconocimientu pola so obra. Agora, el meyor homenaxe póstumu ye siguir dándo-y vida al asturianu, y nel casu de los poderes, reconocer l’estatus d’oficialidá a la llingua de Nené Losada.