Imágenes

Esti vienres 30 de mayu a les 20 hores, el salón d’actos del Centru Valey de Piedrasblancas, en Castrillón, va acoyer una edición más del festival poéticu «Pallabra nel mundu» nel que collaboramos dende Iniciativa pol Asturianu. Per segundu añu consecutivu voi presentar l’actu asturianu d’esti festival que se celebra al mesmu tiempu en numberoses ciudaes del mundu y que tien a la paz como lema d’esti añu.

L’eventu tendrá por llingua vehicular l’asturianu y cunta con poetes que recitarán n’asturianu, amás de n’otres llingües.

L’asturianu sedrá tamién la llingua d’intervención de la conceyala de Cultura, María Esther García López, arriendes de tar presente nos folletos informativos y tola imaxe corporativa del festival, que se celebra alredor del mundu enteru y al que se sumen ciudaes en 56 países dende va cuasi una década.

Yá pue sentise un nuevu programa d’Iniciativa pol Asturianu nes ondes, amás de na cadena d’emisores a lo llargo de toa Asturies, na nuesa canal n’Ivoox, onde puedes descargar el podcast. Nesta ocasión facemos el nuesu programa radio dende l’IES Universidá Llaboral de Xixón.

Nesti especial afondaremos na situación de l’asignatura de llingua asturiana nes escueles. Ye un programa mui especial pa min, yá que se fizo demientres les mios práutiques del Máster de Profesoráu de Secundaria, Bachilleratu y FP, que toi faciendo na especialidá d’asturianu.

Na charra podréis sentimos con cola profesora d’asturianu Beatriz Martín y colos trabayos y opiniones de les diez estupendes alumnes de segundu de Bachilleratu d’esti institutu xixonés a les que me tocó deprender asturianu estos meses.

Sentir el programa: http://podcastcdn-11.ivoox.com/audio/7/9/7/4/especiallasturianunesescuelesiesla-iniciativapolasturianu-ivoox3054797.mp3

Iniciativa pol Asturianu, en collaboración col Conceyu Universitariu pol Asturianu (CUPA) abre’l plazu p’apuntase a la cuarta edición de los Cursos d’Asturianu en Xixón, una esperiencia formativa qu’entama en collaboración cola Academia de la Llingua Asturiana y el Conseyu de Mocedá de Xixón.

Los cursos que se van facer na sede del Conseyu de la Mocedá de Xixón (Avda. Manuel Llaneza, 68), van entamar a partir del 12 de mayu, cuntando con 36 hores llectives cada nivel.
El cursu va celebrase los martes y xueves, de 19 a 21 hores nel casu del nivel inicial, y de 17 a 19 hores pal nivel II, acabando a finales de xunu.

El nivel inicial ta empobináu a persones ensin conocimientos d’asturianu o con nivel baxu de conocencia ya inclúi, pa les persones que lu superen, un diploma de l’Academia de la Llingua Asturiana, entidá reconocida pola Conseyería d’Educación pa la formación del profesoráu.

El nivel II ta empobináu a persones con una conocencia más fonda del idioma, que yá ficieren dalgún cursu enantes.

El preciu de la inscripción ye de 60 euros (50 pa los socios d’Iniciativa pol Asturianu), incluyendo los materiales necesarios pa llevar alantre’l cursu.

Les inscripciones pueden facese nel corréu lletrónicu conceyuasturianu@gmail.com o nel teléfonu 615 982 816, yá seya llamando o al traviés de Whatsapp o Telegram, hasta’l 11 de mayu.

Dende Iniciativa pol Asturianu animen a participar nesti cursu que va sirvir pa dar una conocencia básica y adaptada al nivel del alumnáu de la llingua asturiana, deprendiendo les normes ortográfiques, vocabulariu y otres cuestiones, con una clases amenes que van apoyase n’elementos audiovisuales, trabayando tamién cuestiones rellacionaes cola sociollingüística y la cultura d’Asturies.

Esti vienres 18 d’abril nel Café Trisquel de Xixón vamos facer una presentación informal de Formientu y una timba poética con micro abiertu qu’organiza Andrés Astur Treceño, que tamién va pone-y un toque musical al actu.

Anímovos a venos per ellí y compartir la vuesa lliteratura. Sedrá a les 20 hores.