Esti xueves 7, a les nueva la mañana, Inaciu Galán, periodista que prepara la so tesis sobre la situación del asturianu nel Franquismu, va facer una introducción al tema dientro de los actos del XVI Congresu Internacional de Xóvenes Investigadores d’Hestoriografía y Hestoria de la Llingua Española que se celebra dende’l miércoles en La Llaboral de Xixón.

 

Nel paraninfu de La Llaboral, embaxo’l títulu “Una güeyada a los discursos llingüísticos na Asturies del Franquismu” y dientro del ciclu de comunicaciones dedicaes a la sociollingüística nel Congresu, Galán va facer la única de les comunicaciones que va presentase n’asturianu nesti eventu internacional qu’axunta en Xixón a investigadores mozos de dellos países.

 

A lo llargo de la comunicación, d’una media hora de duración, ta previsto que s’amuesen delles idees alredor de la situación que vivió la llingua asturiana na so convivencia col castellán nes distintes etapes del Franquismu. Dende les prohibiciones que vivieron toles llingües distintes del castellán, y cómo esto influyó a la llingua asturiana, hasta les discusiones internes ente partidarios y detractores del asturianu del propiu réxime franquista.

Inaciu Galán y González (Xixón, 1986) Máster en Sociedá de la Información y el Conocimientu na Universitat Oberta de Catalunya (UOC), Graduáu en Periodismu pola Universidá a Distancia de Madrid (UDIMA), Diplomáu en Turismu y Especialista en Xestión Cultural pola Universidá d’Uviéu. Ta formáu como profesor na especialidá d’asturianu col Máster de Formación del Profesoráu. Anguaño prepara la so tesis doctoral sobre la situación de la llingua asturiana nel Franquismu. Ye periodista de profesión, pero la investigación siempres-y prestó pola vida, autor de dellos libros, ente los que destaca’l primer diccionariu asturianu-inglés/inglés-asturianu, investigó y publicó artículos alredor de la llingua asturiana nel campu de la hestoria, la lliteratura, la toponimia o los medios de comunicación. Participó en numberosos congresos y xornaes alrededor de les llingües minorizaes d’Europa, n’universidaes como la de Barcelona, Aveiro o Oxford.

Tán acabante asoleyame un artículu robláu con Javier Cubero y tituláu “Nueves aportaciones sobre la figura del Padre Galo: poemes inéditos, reflexones sociollingüístiques y noticies de La Regalina” na Revista de Filoloxía Asturiana, númberu 15. L’artículu recueye interesantes novedaes sobre’l pensamientu de Fernán Coronas alredor de la llingua asturiana.

Puedes lleer l’artículu equí: 06RFA15_InaciuCubero_padre galo

Tán acabante asoleyame l’artículu Adautación del enseñu d’asturianu al Marcu común européu de referencia pa llingües (MCER) dientro de la revista CURS (Coneixements, usos i representacions socials de la llengua catalana)

Nel artículu faigo un repás al nuevu espaciu xeneráu dende l’añu 2001 cola puesta en marcha del Marcu común européu de referencia pal deprendizaxe, enseñu y evaluación de llingües (MCER), apurriendo exemplos d’ámbitos llingüísticos averaos al del asturianu. L’artículu conviértese asina nun analís fondu a la situación del asturianu nel ámbitu de la formación llingüística p’adultos, xenerando una propuesta d’aición pa la puesta en marcha d’un procesu d’homologación col MCER pa la llingua asturiana.

Podéis lleelu equí: Adautación asturianu MCER_82014-galan o na páxina de la revista CURS.

Iniciativa pol Asturianu abre una nueva edición de cursos en dellos conceyos y a distancia. Los cursos duren 36 hores y cunten con un diploma d’aprovechamientu otorgáu pola Academia de la Llingua Asturiana pa l’alumnáu que supere’l cursu. Con dos niveles, dependiendo del conceyu, estos cursos van entamar el 7 de marzu y van durar hasta’l mes de mayu, dependiendo de los díes festivos de cada conceyu y de les circunstancies de cada cursu.

Puedes matriculate nos cursos d’asturianu siguientes:

Nivel 1
-A distancia (Al traviés de la nuesa plataforma Moodle de cursos en llinia, n’horariu llibre)
-Ribeseya (Polideportivu de Ribeseya) Llunes y miércoles de 19 a 21 hores.
-Les Arriondes (Llugar por confirmar) Martes y miércoles, 17 a 19 hores.
-Avilés (IES Carreño Miranda) Llunes y miércoles de 19 a 21 hores.

Nivel 2
-Xixón (Conseyu de la Mocedá de Xixón) Llunes y miércoles de 19 a 21 hores.
-Uviéu (Conseyu de la Mocedá del Principáu d’Asturies) Llunes y miércoles de 19 a 21 hores.
-Sotrondio (Casa de la Mocedá de Sotrondio) (SRA) Martes y xueves de 18:30 a 20:30 hores.

La matrícula ye 60 euros (50 euros pa socios d’Iniciativa pol Asturianu) incluyendo los materiales del cursu.

Puedes matriculate nesti formulariu en pocos minutos.

El wikireporteru Juan Sebastian Quintero Santacruz entrevistóme como presidente d’Iniciativa pol Asturianu pa les páxines d’información Wikinoticias (versión en castellán) y Vikinovaĵoj (versión n’esperantu) con motivu del Día Internacional de la Llingua Materna.

La entrevista trata d’averar a los llectores a la situación del asturianu, el trabayu d’Iniciativa pol Asturianu y la importancia de los proyectos Wiki pa les llingües minorizaes, ente otres cuestiones.

Entrevista n’esperantu

Entrevista en castellán

[youtube https://www.youtube.com/watch?v=hRxqU8t1yEA]

Esti miércoles 20 de xineru, de magar les 19 hores, entamen les xornaes que la Oihaneder Euskararen Etxea de Vitoria-Gasteiz va dedicar al asturianu, dientro del ciclu dedicáu a llingües minorizaes que tienen en marcha nesti espaciu de difusión de la cultura n’euskera, abiertu a la presencia d’otres cultures y llingües, como l’asturiana nesti casu.

Inaciu Galán, periodista y presidente d’Iniciativa pol Asturianu, va ufrir una charra sobre’l trabayu de la organización, la situación del asturianu y otres cuestiones venceyaes al tema. Amás, van participar con delles charres más, Ánxel del Río, representante de la Xunta pola Defensa de la Llingua Asturiana, y Xulio Viejo, como filólogu y profesor de la Universidá d’Uviéu.

Xuntos, van responder a les entrugues del públicu alredor del momentu que vive l’asturianu, y van intentar facer un averamientu básicu a la llingua asturiana, con un cursín exprés. Al otru día, el xueves 21, el grupu folk asturianu Corzobeyos, va dar un conciertu nel mesmu espaciu y como pieslle d’estes xornaes dedicaes a la llingua asturiana.

Pa Iniciativa pol Asturianu ye un honor poder participar d’estes xornaes y llevar la situación del asturianu al País Vascu, onde pese a la cercanía xeográfica nun ye mui conocida la situación sociollingüística d’Asturies. Los actos son abiertos al públicu y convidamos a toles persones interesaes na cuestión a averase per esti espaciu na tarde del miércoles y el xueves.

 

Información na páxina de la entidá organizadora: http://oihanedereuskararenetxea.eus/es/hitz-adina-mintzon-asturiera-gertutik/

 

L’ésitu d’El Quixote n’asturianu quedó en segundu llugar a menos d’un puntu

 

XIXÓN, 18/01/2015. La votación llevada alantre n’internet nes primeres selmanes del añu, dio como “Meyor Noticia del Añu pal asturianu 2015” al anunciu de que l’asturianu va ponese a prueba como llingua vehicular en delles asignatures nun programa pilotu que quier poner en marcha la Conseyería d’Educación y Cultura. Esta noticia, que dio a conocer Inaciu Galán, periodista y presidente d’Iniciativa pol Asturianu nel programa “Noche tras noche” de la RPA la nueche del llunes “supondría un importante pasu na normalización del asturianu y sobre manera, na tresmisión del idioma ente les nueves xeneraciones”, valoróse como la más importante del añu con un 38,1% de los votos. L’anunciu d’esti proyectu facíalu va unos meses el conseyeru Genaro Alonso y abre la espectativa d’una vieya reivindicación, la de que l’asturianu seya una llingua normal dientro del sistema educativu, de la que se faiga usu de forma tresversal.

En segundu llugar y a menos d’un puntu porcentual (37,7%) de diferencia, los internautes escoyeron la salida a les llibreríes de la torna al asturianu d’El Quixote, que salía a la lluz en 2015 gracies al trabayu de Pablo Suárez García, autor de la versión n’asturianu, y la editorial Laria. El llibru foi amás una doble noticia bona, yá que foi la obra más vendida n’Asturies nel Día del Llibru 2015, siendo asina la primer obra n’asturianu qu’algama esti ésitu.

En tercer llugar, con un 22,2% de los votos, escoyeron la noticia que facía referencia a la respuesta que se dio na sociedá, nos medios de comunicación y nes redes sociales dempués de qu’una alumna de la Universidá d’Uviéu sufriera un ataque verbal por lleer un poema n’asturianu na Cátedra Alarcos.

El xuramentu o promesa del cargu n’asturianu de dellos alcaldes y diputaos y d’un importante númberu de conceyales, escoyéronla los votantes como cuarta meyor noticia del añu, col 21,6% de los votos. En quintu llugar, col 19,3% de los votos, tuvo la llegar al Comité de Drechos Humanos de la Organización de les Naciones Xuníes, demientres una sesión de control al Gobiernu d’España, de la situación del asturianu. Una sesión na que tuvieron representantes d’Iniciativa pol Asturianu esplicando los casos de discriminación que se dan n’Asturies por usar esti idioma.

La sesión d’apertura de la Xunta Xeneral, que se fizo per primer vegada n’asturianu, al toca-y la presidencia a un diputáu de Podemos, por ser el más mozu, tuvo nel sestu llugar, col 18% de los votos. En séptimu llugar, col 16,7%, tuvo retresmisión n’asturianu de dellos partíos de fútbol que tuvo llugar na RPA y que podría ser el niciu d’una programación deportiva más continuada na nuesa llingua.

La nueva composición de la Xunta Xeneral, con 17 de 45 diputaos en partíos que lleven la oficialidá del asturianu nel so programa, foi la octava noticia del añu col 15% de los votos. Na anterior ocasión con más diputaos pola oficialidá, en 1995, había namás 7, tando davezu ente 3 y 5 favoratibles a la oficialidá de forma esplícita, lo que supón un saltu perimportante.

Nel novenu llugar (11,8%) tuvo esti añu una noticia llocal, l’anunciu de la puesta en marcha d’un Serviciu de Normalización Llingüística n’Uviéu y la recuperación del proceso d’oficialización de la toponimia del conceyu. Nel décimu puestu (11,1%) tuvo la participación de numberosos equipos deportivos asturianos na campaña institucional de promoción del asturianu #nelmesmuequipu.

Zarren esti llistáu, yá fuera de los diez primeros, el puxu de la reivindicación de la #Oficialidá, que xeneró más de 1.600.000 impactos en Twitter nel Día de les Lletres Asturianes, col 9,8% de los votos; la presencia del asturianu nuna manifestación estatal contra la violencia machista, xunto al restu de llingües oficiales (6,9%), los 25 años de la revista Cultures (5,9%) y la robla un conveniu de collaboración col portugués Conceyu de Miranda del Douro, que comparte llingua con Asturies y Lleón per parte de l’Academia de la Llingua Asturiana, col 3,9% de los votos.

La votación organizóla Inaciu Galán cola collaboración d’Iniciativa pol Asturianu y el programa Noche tras noche de la RPA, y ye la tercer ocasión na que se pon en marcha. En 2014 la noticia del añu foi la emisión del programa “Los bolechas” n’asturianu, mientres qu’en 2013 foi l’ésitu d’Astérix n’asturianu nes llibreríes lo que convenció a los votantes.

Hasta’l llunes que vien, 18 de xineru, pue votase pa escoyer la “Meyor noticia del añu pal asturianu” de 2015. Esta votación que vien entamando dende l’añu 2013 na RPA, Inaciu Galán, tien por oxetivu conocer les noticies del añu que los internautes consideren meyores pal futuru de la llingua asturiana. El llistáu fízose teniendo en cuenta les propuestes de los asociaos y asociaes d’Iniciativa pol Asturianu, entidá que collabora con esta votación, que busca reflexonar sobre los pasos alantre daos na situación del asturianu nel añu caberu.

 

Pa la votación escoyéronse diecisiete noticies de tolos ámbitos de la vida social, cultural y política d’Asturies, con un noyu común, ser noticies positives pal asturianu que se dieron nel añu 2015. En 2013 l’ésitu d’Asterix n’asturianu y en 2014 “Los bolechas”, programa infantil na nuesa llingua en TPA, fueron les noticies escoyíes na votación popular d’esta iniciativa.

 

El resultáu de la votación popular va desvelase’l resultáu dientro del programa “Noche tras noche”, de RPA, el viniente llunes, 18 de xineru, a partir de les 23 hores.

 

Puede votase hasta cinco candidatos na páxina web d’Iniciativa pol Asturianu y hasta’l llunes a les 14 hores.

 

Enllaz pa la votación: https://docs.google.com/forms/d/1qoveXtUMfcHiFvxVRUsByGoCjEj2fly2GLhqoQO47Rs/viewform