Avilés, 25 d’agostu de 2014

 Mui bones, amigues y amigos del Carbayedo:

Préstame abondo tar equí güei con vós nesta entrega de premios.

En primer llugar dar les gracies al xuráu, ye un honor que vieran valir a la mio obra. Y más cuando hai xente como l’escritor avilesín Miguel Solís Santos, que sacó a la novela asturiana del escaezu nos años ochenta, y colos trabayadores de normalización llingüística, que con tantes dificultaes faen el trabayu de da-y visibilidá a la llingua del pueblu, como son Arancha Prado, Hugo Cortina y Montserrat Machicado, que nesti casu fáilo equí, n’avilés, al cargu de la Estaya de la Llingua.

Pero les gracies tengo que vos les dar especialmente a los vecinos d’esta Asociación l’Horru del Carbayedo por presta-y atención a la llingua asturiana nes vueses actividaes, con esti Día d’asturianía, cola convocatoria d’esti concursu que va yá camín de la primer década en funcionamientu y que tien munches coses positives, porque saca a la lliteratura a les cais d’avilés con esa esposición de les obres que se presenten que facéis cada añu na plaza.

Continue reading «Pallabres y testu ganador del Premiu L’Horru del Carbayedo 2014»

El salón d’actos de l’Asociación de vecinos El Hórreo, asitiáu nel 16 de la cai Dr. Marañón, n’Avilés, va acoyer esti llunes 25, alredor de les 19:30 hores, la entrega de los gallardones del VIII Concursu de micro-rellatos n’asturianu “L’Horru del Carbayedo”, qu’esti añu tienen por ganador a Inaciu Galán, col rellatu tituláu «8:43» y por segundu clasificáu a Luis Manuel Suárez con «Soledá de luxe».

Continue reading «Entrega del premiu L’Horru del Carbayedo n’Avilés»

Iniciativa pol Asturianu va participar el viniente 16 d’agostu nel Ancontro Blogueiros de l Praino, na comarca portuguesa de Miranda dl Douro, que comparte llingua con Asturies. Pela parte asturiana vamos dir dende Iniciativa pol Asturianu. Yo mesmu daré llectura a la conferencia «¿Qué podemos facer xuntos pola nuesa llingua?», echando’l pieslle a les charres.Nestos actos participen represenantes d’entidaes de tol dominiu llingüísticu: Faceira de Lleón, Furmientu de Zamora, la entidá asturlleonesa El Teixu y l’Associçón de Lhéngua i Cultura Mirandesa. 

Los actos van entamar a les 9 la mañana cola presentación del pendón del llugar, visita al llugar y llectura de versos en toles variedaes del dominiu llingüísticu.

Darréu de la xinta, celebráse una rolda d’intervenciones que va abrir Amadeu Ferreira, de l’Associaçon de Lhéngua i Cultura Mirandesa. De siguío,  Fernando Álvarez-Balbuena, d’El Teixu va falar «De Llenguas y Fronteiras», «Mirandeses y llioneses: Dous Puebros Vecinos y Hermanos» sedrá la charra de Ricardo Chao, de Faceira.

Remataráse la xornada con una llectura de versos y unes actividaes festives tradicionales nel pueblu.

Esti xueves pasáu, 7 d’agostu, convidáronme a participar nel xuráu d’unu de los premios más prestixosos de la lliteratura asturiana, el Premiu Fernán Coronas de poesía. Tuvi en Cadavéu xunto a Carmen Guardado, Mar Madera y Félix Ferreiro pa tomar el determín de quién ganaba esti añu. 

L’uviedín afincáu en Vaḷḷouta, Miguel Ángel Gómez García, resultó ganador del que ye’l XXI Premiu de Poesía ‘Fernán Coronas’ Padre Galo, cola obra ‘Nun me preguntes cómo pasa’l tiempu’.

Nesti 7 d’agostu celebrábase l’aniverariu del ñacimientu del Padre Fernán Coronas, y esti añu tamién, el 75 aniversariu de la so muerte, en 1939. Un aniversariu que coincide col del primer llibru n’asturianu, 175 nesti casu. Unos aniversarios que les autoridaes culturales asturianes van escaecer de xuru.

La suerte nesti casu, ye cuntar con un pueblu como’l de Cadavéu, que sigue recordando al so escritor y vecín, y la so obra. Darréu del aconceyamientu del xuráu, y xunto a una bona representación del pueblu, fuimos a la tumba del Padre Galo, onde recitamos unos poemes y onde’l coru’l pueblu cantó una añada del propiu Fernán Coronas. Un día bien guapu y soleyeru nel perguapu llugarín de Cadavéu.

Noticia n’Asturies.com