El llunes 25 d’agostu van entregame’l primer premiu del Concursu de micro-rellatos n’asturianu “L’Horru del Carbayedo”, entamáu pola asociación de vecinos d’esti barriu avilesín. Convídovos a participar nel actu, nel qu’habrá enantes una obra de teatru. Aprovecho p’agradecer al xuráu esti premiu y felicitar a Luis Manuel Suárez Fernández, pol segundu premiu.
ACTA DEL XURÁU
VIII Concursu de micro-rellatos n’asturianu “L’Horru del Carbayedo”
Aconceyáu’l xuráu del VIII Concursu de micro-rellatos n’asturianu “L’Horru del Carbayedo” (al marxen dafechu de l’Asociación de Vecinos El Hórreo, entidá que lu entama), y formáu por D. MIGUEL SOLIS SANTOS (biólogu, dibuxante, escritor y miembru de L’Academia de la Llingua Asturiana), Dª ARÁNZAZU PRADO GARCÍA-JOVE (escritora, especialista en llingua asturiana y responsable del Serviciu de Normalización del Cabu Peñes) y D. HUGO CORTINA FANJUL (filólogu, especialista en llingua asturiana y responsable del Serviciu de Normalización del Conceyu de Samartín), actuando como secretaria con voz, pero ensin votu Dª Montserrat Machicado Compañy (filóloga, especialista en llingua asturiana, especialista en xestión cultural y responsable de la Estaya de la Llingua d’Avilés), alcordó axudicar los premios relacionaos darréu:
– Primer Premiu (400 € y trofeu):
“8:43” (presentáu col nomatu “Xuan Miyar”)
– Segundu Premiu (200 € y placa):
“Soledá de luxe” (presentáu col nomatu “Lot”)
Namás recibir l’acta, la A. VV El Hórreo (entidá organizadora) despeslló les pliques, resultando ser los autores Inaciu Galán y González, de Xixón (primer premiu) y Luis Manuel Suárez Fernández, de Avilés (2º premiu).
Tolos rellatos, premiaos y no premiaos, presentaránse al públicu nuna esposición al aire llibre nel parque’l Carbayedo (Fiestes de San Roque, del 21 al 25 d’Agostu). L’actu d’entrega premios, xunto cola lletura de los cuentos premiaos, fairáse’l llunes, 25 (“llunes d’asturianía”), n’el Salón de la A. VV. El Hórreo (C/Dr. Marañón, 16, baxu- Avilés), alredor de les 19:30 hores, (n’acabando la obra “De filandón”, qu’entama a les 18:o0 h., nel mesmu llugar, el grupu de teatru asturianu “Garapiellu”).