Esti xueves pasáu, 7 d’agostu, convidáronme a participar nel xuráu d’unu de los premios más prestixosos de la lliteratura asturiana, el Premiu Fernán Coronas de poesía. Tuvi en Cadavéu xunto a Carmen Guardado, Mar Madera y Félix Ferreiro pa tomar el determín de quién ganaba esti añu.
L’uviedín afincáu en Vaḷḷouta, Miguel Ángel Gómez García, resultó ganador del que ye’l XXI Premiu de Poesía ‘Fernán Coronas’ Padre Galo, cola obra ‘Nun me preguntes cómo pasa’l tiempu’.
Nesti 7 d’agostu celebrábase l’aniverariu del ñacimientu del Padre Fernán Coronas, y esti añu tamién, el 75 aniversariu de la so muerte, en 1939. Un aniversariu que coincide col del primer llibru n’asturianu, 175 nesti casu. Unos aniversarios que les autoridaes culturales asturianes van escaecer de xuru.
La suerte nesti casu, ye cuntar con un pueblu como’l de Cadavéu, que sigue recordando al so escritor y vecín, y la so obra. Darréu del aconceyamientu del xuráu, y xunto a una bona representación del pueblu, fuimos a la tumba del Padre Galo, onde recitamos unos poemes y onde’l coru’l pueblu cantó una añada del propiu Fernán Coronas. Un día bien guapu y soleyeru nel perguapu llugarín de Cadavéu.