INAUGURACIóN DE LES XXXIV XORNAES INTERNACIONALES D’ESTUDIU
El martes, 3 de payares, a les 16:00 hores nel salón d’actos de la Facultá de Filosofía y Lletres de la Universidá d’Uviéu tendrá llugar la inauguración de les XXXIV XORNAES INTERNACIONALES D’ESTUDIU cola intervención de la Vicerrectora d’Investigación y Campus d’Escelencia Internacional de la Universidá d’Uviéu, Dª. Mª Paz
Suárez Rendueles; la Decana de la Facultá de Filosofía y Lletres, Dª. Carmen Alfonso García y la Presidenta de l’Academia de la Llingua Asturiana, Dª. Ana Mª Cano González.
Les Xornaes celebraránse’l martes, miércoles y xueves de la próxima selmana y nelles participarán un bon númberu de profesores ya investigadores asturianos xunto con otros de distintes universidaes españoles y europees.
La sesión entamará coles presentaciones de la edición dixital del númberu 113 de la revista _Lletres Asturianes_ y del númberu 5 de la revista _Ciencies. Cartafueyos Asturianos de Ciencia y Teunoloxía_. La conferencia inaugural tará a cargu de la profesora Cristina Valdés Rodríguez (Universidá d’Uviéu & ALLA) que falará sobre _Un enfoque polisistémicu a la traducción n’asturianu: normes y estratexes_.
Darréu entamarán les comunicaciones del académicu Xuan Xosé Sánchez Vicente y de los profesores Armando Murias, Pablo Rodríguez Medina ya Inaciu Galán.
L’actu pesllaráse cola ponencia _Otros horizontes: la aparición de la lengua asturiana en las cartas privadas de los emigrantes de principios del XX_ de la profesora Laura Martínez Martín (Universidá de Lisboa).
