Discursu d’Inaciu Galán na recoyida del Premiu de poesía Fernán CoronasCadavéu, La Regalina 28 d’agostu de 2016
Vecinos ya vecinas de Cadavéu, asturianos, asturianas ya tódolos amantes d’Asturies que mos xuntamos aiquí güei:
Préstame muito poder falavos ya compartir l’al.legría de ser premiáu con esti reconocimientu que l.leva’l nome del home que mos xuntó a toos aiquí, Fernán Coronas, el Padre Galo. Un home qu’amaba esti pueblu ya la sua l.lingua, qu’amaba Asturies ya sabía que yía importante da-y futuru al nuesu idioma, pa da-y futuru a esti país.
Foi él, el tan queríu aiquí, el nuesu Padre Galo, yá en 1926, el primeiru en pidir que l’asturianu tuviera nas escuelas ya los más mozos tuvieran la oportunidá de siguir falándolu no futuru como una l.lingua viva, y foi él quien mos dixo: “Tenemos de vivir na nuesa l.lingua, tenemos de dignificala”.
Yía guapo faer acorzanda del Padre Galo nesti día ya faer homenaxe a la Regalina. Pero ascuitemos tamién el mensaxe que’l Padre Galo mos dio sobre la l.lingua asturiana ya faigamos homenaxe a la sua obra tódolos días, trasmitiendo esti vieyu idioma a los fiyos ya a los ñetos, falándolu en tódolos l.lugares ya en tódolos momentos.
Díxolo’l Padre Galo va yá noventa años: “Yía tiempu d’entamar una reacción ya de que las autoridaes s’esmolezan de protexer lo meyor que mos queda de la fala d’enantes”. Ya noventa años dempués siguimos esperando ya trabayando pa faelo realidá ya que la nuesa l.lingua nun cuerra peligru nunca más.
Préstame muito Cadavéu ya la xente d’esti pueblu. Nun séi cómo agradecevos esti premiu ya esti día que nun vou escaecer enxamás. Siéntome parte de vós ya tendréis siempres en min un embaxador d’esti guapu pueblu del conceyu de Valdés, ya como dixo’l Padre Galo, diré-y a tol mundu:
“Veníi a ver cousas non vistas
xunta a l’armitina nueva
ya plasmái cula surrisa
de la Santina de Riegla
que puede que vos convide
pa qu’inda vólvades vela”
Muitas gracias Cadavéu.
¡Puxa la Regalina, Puxa Cadavéu, Puxa Asturies!
