BÚSCOLU, 5 DE XINERU DE 2013.
El premiu reconoz la trayectoria de persones que trabayen a favor del asturianu en distintes estayes y vien entregándose dende l·añu 1986. Dende entós recibiéronlu persones como Mª Josefa Canellada, Xosé Lluis García Arias, Roberto González-Quevedo, Jesús Neira, Nené Losada, Lluis Xabel Álvarez “Texuca”, Ramón d·Andrés, Ana Cano, Próspero Morán, Mánfer de la Llera, Xuan Bello o Berta Piñán, ente otros, y l·Academia de la Llingua Asturiana y Ediciones Trabe.
Con esti gallardón, el Centru Asturianu de Madrid reconoz el llabor d·Inaciu Galán y González (Xixón, 1986), Máster en Sociedá de la Información y el Conocimientu na Universitat Oberta de Catalunya (UOC), Diplomáu en Turismu y Especialista en Xestión Cultural pola Universidá d·Uviéu. Anguaño remata los estudios de Periodismu
na Universidá a Distancia de Madrid (UDIMA) y entama cola preparación de la so tesis de Doctoráu.
Dedicáu al periodismu, siempres n·asturianu, dende l·añu 2003 pasó pela Cadena Ser, TeleXixón, la TPA, onde foi ún de los primeros presentadores de programes n·asturianu, o·l diariu Asturnews, ente otros medios. En 2005 recibió·l Premiu “Enriqueta González Rubín” de Periodismu, otorgáu pol Gobiernu d·Asturies y en 2010, el Premiu Moscones en Xixón de Periodismu.
Escritor n·asturianu en cásique tolos xéneros, ye autor de dellos llibros de monólogos, y pa neños, amás de collaborar d·una llarga riestra de revistes lliteraries, apaeciendo en delles antoloxíes y faciéndose con más d·una docena de premios nesti campu. Nel campu de la difusión, fundó en 2006 y dirixó dende entós, la revista de lliteratura p·autores mozos, Formientu, que va yá pel númberu 11.
Profesor d·asturianu p·adultos en cursos de l·Academia de la Llingua Asturiana ye autor del Diccionariu básicu asturianu-inglés / inglés-asturianu y de la Terminoloxía del Turismu, asoleyada por TermAst va pocos díes, amás d·una montonera d·ensayos sobre distintos temes venceyaos a la hestoria del asturianu, la lliteratura, toponimia y el
periodismu nesta llingua, participando en dellos congresos n·Asturies y fuera de les nueses fronteres y asoleyando estos artículos en dalgunes revistes como Lletres Asturianes o N·ast.
Activista a favor de la llingua asturiana dende va una década, participó d·asociaciones como L·Arribada, de la que foi·l primer presidente, Periodistes pol Asturianu, Atenéu Cultural Xuan María Acebal, La brisa del Xapón o·l Conceyu Universitariu pol Asturianu (CUPA), pol que llegó a ser escoyíu como miembru del Claustru de la Universidá d·Uviéu, y miembru de la Comisión de Normalización Llingüística de la
Universidá d·Uviéu. En 2011 impulsa la fundación d·Iniciativa pol Asturianu, convirtiéndose nel Ier Congresu de la organización, en febreru de 2012, nel so primer presidente y desenrrollando dende entós un intensu llabor de reivindicación.
Galán esplicó como al conocer la noticia emocionóse, “tovía nun puedo creelo, toi mui agradecíu al Centru Asturianu de Madrid por esti reconocimientu ” , esplicó. El periodista y activista xixonés comentó tar “mui contentu y al mesmu tiempu sorprendíu, ye un premiu al qu·unu nun se presenta, sinón que vien solu y que suel dase a xente con
trayectories muncho más dilataes”. Y ye que la media d·edá de los ganadores d·esti gallardón, que s·entregó hasta agora en ventiocho ocasiones, ta al rodiu los 60 años y Galán cumplió en xunu pasáu los 26.
“Apaecer nun llistáu de premiaos del altor de los que ganaron el Premiu Urogallo y facelo tan mozu, ye una responsabilidá estra, a la que tendré de responder con tol esfuerciu que pueda nel mio trabayu pol idioma y por Asturies”, esplicó Galán. “Esti premiu supon pa min un poco más de fuercia pa siguir col llabor pol idioma dende tolos
ámbitos posibles, un puxu que nun ta nunca de más nun llabor nel que dacuando s·atopen munches dificultaes”, esplica.
Amás, pa Galán, esta ye “una nueva oportunidá pa da-y voz al nuesu mensaxe, el d·Iniciatica pol Asturianu a la sociedá: necesitamos que la xente s·implique con ganes nel procesu de recuperación del idioma, ye cosa de toos, de los que saben falar asturianu y de los que non, y tol mundu pue facer coses pola nuesa llingua nel so día a día, con
muncha más repercusión de la que piensen”. Galán tien claro que “necesitamos la oficialidá del asturianu, pero sobre too necesitamos a los asturianos trabayando pol futuru del idioma, usándolu nel día a día, deprendiéndolu, tresmitiéndolu a los sos fíos y nietos”.
Más información biográfica d·Inaciu Galán:
http://inaciugalan.wordpress.com/inaciu-galan_bio/
Llistáu completu de los ganadores del Premiu
1986 Mª Josefa Canellada
1987 Xosé Lluis García Arias
1988 Jesús Neira
1989 Llorienzu Novo Mier
1990 Xosé Álvarez
1991 Luis Aurelio Álvarez
1992 Julián Burgos
1993 Florina Alías
1994 Roberto González-Quevedo
1995 Lluis Xabel Álvarez “Texuca”
1996 Ediciones Trabe
1997 Albino Suárez
1998 Mánfer de la Llera
1999 Ramón d·Andrés
2000 Nené Losada Rico
2001 Academia de la Llingua Asturiana
2002 Dolores Sánchez “La Galana”
2003 Ana María Cano González
2004 Pablo Xuan Manzano
2005 Milio·l del Nido
2006 Mª Esther García López
2007 Berta Piñán
2008 Xuan Bello
2009 Mariluz Pontón y José Sariego
2010 Miguel Solís Santos
2011 Próspero Morán López
2012 Inaciu Galán y González
Fonte: Búscolu