TermAst yá cuenta cola so novena propuesta, nesta ocasión nel ámbitu del Turismu. Inaciu Galán y González ye’l responsable d’esta terminoloxía compuesta por cerca de 900 entraes cola so correspondiente definición.

‘Abellugu de monte’, esto ye, un “edificiu construyíu en monte altu pa que los escursionistes puedan facer nueche en casu de necesidá” ye la primer definición que s’atopa nesti llistáu estensu ellaboráu por Galán, diplomáu en Turismu pola Universidá d’Uviéu. Tres esti términu siguen otros 900 que tán rellacionaos colos viaxes, hoteles, profesiones o instalaciones del sector, ente otros. Asina, apaecen nesti trabayu términos como ‘portaequipaxes’, ‘ficha d’equipaxes’, ‘declaración d’aduanes’, ‘tresbordu’, ‘indemnización por embarcu denegáu’, ‘númberu de cuartu’, ‘pasaxeru’ o ‘zoolóxicu’. Caúna d’ellas vien acompañada, amás de cola so definición, cola so torna en castellanu o inglés, según el casu.

TermAst trátase d’una iniciativa conxunta de l’Academia de la Llingua Asturiana (ALLA), el Colexu Oficial d’Inxenieros n’Informática del Principáu d’Asturies y el coleutivu Softastur, qu’espubliza propuestes terminolóxiques feches por especialistes col oxetivu de dar solución a los problemes qu’atopa l’asturianu n’estayes del ámbitu científicu o de les nueves teunoloxíes, ente otros. D’esta forma, los usuarios pueden familiarizase con este pallabres y aceptales o refugales pal so usu. De momento, yá tan espublizaes propuestes sobre términos básicos d’Economía y Empresa, Xurídicos y Alministrativos, Matemáticos, Médicos, Postales, Físicos, Educativos y de Teoría de la Lliteratura, a los que se sumen agora los de Terminoloxía de Turismu de Galán.

Fontes: Asturies.com