Iniciativa pol Asturianu denuncia en Uesca la situación de peligru de la llingua asturiana y reclama la oficialidá

Inaciu Galán, presidente d'Iniciativa pol Asturianu, mientres la so intervención nel XXIV Congresu de Llingües y Cultures Europees Amenazaes celebráu en Uesca.

Inaciu Galán, presidente d’Iniciativa pol Asturianu, faló esti vienres énte los más de setenta delegaos d’organizaciones en defensa de llingües d’Europa dientro del XXIV Congresu de Llingües y Cultures Europees Amenazaes, en Uesca. Galán esplicó la situación del idioma en distintos ámbitos nos que les alministraciones son responsables de la situación de peligru de desapaición del asturianu, talos como los medios de comunicación públicos, el procesu de recuperación de la toponimia, el sistema educativu y sobre too, la falta d’un estatus llegal pal idioma qu’otorgue la plena igualdá xurídica a los falantes d’asturianu, gallego-asturianu y castellán, que como esplicó “ha pasar pola reconocencia de la oficialidá nel Estatutu d’Autonomía”.

Alredor de la presencia de la llingua nel sistema educativu, Iniciativa pol Asturianu denunció los recortes en Bachilleratu, onde l’asignatura pasará de cuatro hores a una selmanal esti cursu próximu, asina como la falta d’aiciones pa consiguir un sistema educativu que garantice la tresmisión xeneracional de la llingua asturiana lo qu’en pallabres d’Inaciu Galán “pasa per un sistema onde l’asturianu seya una llingua más del currículu, pa tolos alumnos y cola posibilidá de tener parte de les materies col asturianu como llingua vehicular”.

Tamién reclamó que l’asturianu tenga una meyor presencia na radiotelevisión autonómica, onde Galán comentó como “falten programes n’asturianu en cuestiones clave, como la programación infantil, los informativos, el deporte y el doblaxe de ficción” recordando que proyectos como Alderiques d’Asturies, entamaos col puxu d’Iniciativa pol Asturianu “demuestren que ye posible facer una televisión n’asturianu con toa triba de conteníos”.

Iniciativa pol Asturianu faló tamién de la participación d’esta organización na sesión de control a España del Altu Comisionáu de Drechos Humanos de la ONX, que va sirvir pa tomar aiciones y solicitar sanciones al gobiernu d’España y al d’Asturies polos incumplientos llexislativos en materia llingüística que se dan n’Asturies. La presencia del asturianu xeneró bien d’interés nos representantes internacionales mesmo na conferencia d’Inaciu Galán, que nel puestu informativu y d’esposición de llibros y otros productos culturales n’asturianu que pudo vese a lo llargo del congresu.

L’alcuentru entamáronlu’l Consello d’a Fabla Aragonesa y ALCEM (Asociación poles Llingües y Cultures Europees Amenazaes) a los qu’Iniciativa pol Asturianu quier felicitar pola bona organización y pola repercusión que tán teniendo en medios de toa Europa les reivindicaciones de les llingües minorizaes.

Espublizáu por

Máster en Sociedá de la Información y el Conocimientu na UOC, Grau en Periodismu pola UDIMA, Especialista n'asturianu nel Máster de Profesoráu, Diplomáu en Turismu y Especialista en Xestión Cultural pola Universidá d’Uviéu. Anguaño preparo la mio tesis doctoral. Tengo trabayao en medios como la Cadena Ser, Onda Peñes, Asturnews... Dende 2007 presento programes na TPA, como Xente de casa y el recién Territoriu Sidreru. Los llunes en Noche tras noche, falo na RPA. En 2012 escoyéronme pa presidir Iniciativa pol Asturianu, lo que compaxino cola direición de la revista Formientu, el trabayu como profesor en dellos cursos, xestor cultural, amás d'otres xeres profesionales, culturales y reivindicatives. Dende 2016 exerzo como profesor de llingua asturiana y lliteratura n'institutos.

Dexar un comentariu

La to cuenta de corréu nun va espublizase.