La revista d’autores mozos diz adiós a dellos de los más “vieyos” pa garantizar la so mocedá cuando cumple 5 años nel mercáu lliterariu
Xareos! Xestión Cultural espubliza un númberu nuevu de la revista de lliteratura “mui” moza, Formientu, que cumplió 5 años apocayá, con dos númberos añales saliendo al mercáu lliterariu. Y dempués de cinco años llegaba’l momentu de dicir adiós a dalgunos de los sos collaboradores, qu’entamaron siendo bien mozos y que tienen yá encadarmada una carrera lliteraria, con premios y volúmenes propios nel mercáu en munchos casos. La renovación xeneracional ye imprescindible nuna publicación d’estes característiques, pues ye la so esencia mesma la que cuerre peligru si nun tamos atentos a l’anovación de los autores. Por ello dende’l númberu viniente, el 10, namás van poder espublizar testos los autores ñacíos dende 1980 n’adelantre, tarazando cinco años la edá máxima permitida pa la publicación nesta revista “mui moza”.
Nesti númberu apurrimos otra novedá al llector. Estrénase a la fin la estaya de crítica. Costó, pero por fin, dalgún autor mozu animóse a abrir camín nesta abegosa xera de la crítica y equí ta’l resultáu qu’esperemos que tenga continuidá en númberos próximos.
A lo llargo d’esti añu Xareos! Xestión Cultural va organizar dellos actos pa celebrar los primeros cinco años d’esistencia de Formientu, que la convierten na revista lliteraria fecha dende la iniciativa privada con más años al llombu d’ente les que s’asoleyen n’asturianu con regularidá.
Nesti númberu apaecen poemes de Pablo Rodríguez Medina, Xurde Fernández, Ricardo Candás y Héctor Pérez Iglesias. Testos narrativos d’Abel Martínez, Jorge Fernández García, Pablo A. Quiroga Prendes, Rubén Rey Menéndez ya Inacio Rodríguez-Solar. Amás de dos crítiques de llibros, feches por Iván Cuevas y José Ángel Gayol sobre «Les últimes pallabres» y «Pequeñu álbum de familia».
Formientu ta dirixida por Inaciu Galán y el so Conseyu de Redacción ta formáu pol escritor Benxa Pérez y el director, coordinaos pola escritora y filóloga Laura Marcos. Formientu cunta con una ayuda de la Conseyería de Cultura d’Asturies.