Noticia: Na Mar de la lliteratura

El Comercio, 17 d’ochobre de 2006

————————————————————-

MAYTE GONZÁLEZ COBOS

Ente los díes 23 y 29 d’esti mes la villa de Xixón va acoyer un congresu d’escritores, col nome d’Arribada 2006, que va desarrollar les sos actividaes na Sala de Conferencies del Centru de Cultura Antiguu Institutu, na Escuela d’Hostelería y Turismu y na Sala Albéniz. Esti foru quier perfacese como un alcuentru abiertu, dinámicu y modernu, onde les palabres allugarán na mar xeneroso de la lliteratura asturiana. Pelo llargo de siete díes escritores, investigadores y editores van afondar nes circunstancies qu’arrodien a les nuestres lletres, nos sos problemes d’espardimintu y na so evolución.

reportaxe_061017.jpg

Esti alcuentru ta organizáu y coordináu pola Secretaría Téunica de l’Arribada, que formen miembros del Conceyu d’Escritores Asturianos y representantes del mundu cultural y social de Xixón. Coorganízalu la Oficina de Política Llingüística del Principáu. Sofítenlu la Fundación Municipal de Cultura, Educación y Universidá Popular de Xixón y la Oficina Municipal de la Llingua, amás del Ayuntamientu xixonés. Collaboren nel so entamu l’Ayuntamientu d’A Veiga, el Centru Asturianu de Madrid, el Círculu Astur, l’Atenéu Obreru de Xixón, l’Asociación Cultural Poegía, la Tertulia Cultural El Garrapiellu, l’asociación H.a Xareos y les editoriales Ámbitu, Trabe y VTP.

L’Arribada 2006 nun se va averar al panorama lliterariu actual d’una manera xeneral, sinón qu’ufierta un programa dixebráu n’estayes temátiques sobro les que xiren conferencies y meses redondes. Estes estayes, conocíes col encabezamientu de ‘Nuevos rumbos de la lliteratura asturiana’ son: los viaxes, l’erotismu, la gastronomía, el cine, la mar, l’ensayu y la creatividá.

Demientres estes xornaes atoparemos varios ponentes. El llunes 23 l’escritor Xuan Santori lleerá la ponencia ‘Ulises en casa’. El día siguiente dictará’l profesor d’Economía y narrador David Rivas Infante ‘El ratu y l’asturcón’. Hasier Etxeberria y Diego de Jorge, escritores del País Vascu, fadrán el miércoles una intervención centrada na gastronomía y los mitos lliterarios. Ramón Lluis Bande, escritor, cineasta y director del periódicu ‘Les Noticies’, falará’l xueves sobro la relación ente la lliteratura asturiana y la creación cinematográfica, per aciu la so ponencia ‘La palabra filmada’. Xuan Xosé Sánchez Vicente introducirá’l vienres un nuevu tema cola ponencia ‘Mar, costes y homes na lliteratura asturiana’, y el sábadu los escritores Inaciu Iglesias y Berta Piñán comunicarán les sos ponencies ‘El nacionalismu, esi gran enemigu’ y ‘Notes sobre creatividá: Inspiración y imitación’, respectivamente.
Meses y tertulies

Nes meses redondes contaráse con integrantes como Ismael María González Arias, Xosé Nel Riesgo, Milio Rodríguez Cueto, Humberto González, Xosé María Vega, Frichu Yustas, Lluis Nel Estrada, Serxu Solares, José Braña, Rubén Cienfuegos, José Luis Ruiz, Ignaciu Llope, Xandru Martino, Xurde Morán, José María González, Roberto González, Lluis Portal Hevia, María Esther García, Pablo Rodríguez Medina y Xulio Vixil. Nes meses de tertulia afayaremos a Helena Trejo Fombella, L.luis Fernández, Aurora García Rivas, Inaciu Galán, Pablo Xuan Manzano, David Guardado y Francisco Álvarez. Tamién se cellebrarán presentaciones del concursu de cuentos de El Garrapiellu con Tino Lozano, o de la coleición lliteraria Tiempu de Cristal del Atenéu Obreru con Vicente García Oliva, Paz Fonticiella, Antón García y Lourdes Álvarez. Un recital poéticu contará colos versos de Carmen Rueda, Eli Felgueroso, Armando Vega o Ricardo Candás, acompañaos de la violoncelista Rebeca Gonzalo. El sábadu, de parte nueche, podremos asistir al II Certame de Monólogu Modernu con Cellero, Lluis Antón González, Benxa Pérez o Delitu Rural. Igualmente presentaránse novedaes editoriales d’Ámbitu, Trabe y VTP, ansí como l’antoloxía de poetes del Occidente asturianu ‘Na boca de todos’, editada pol conceyu d’A Veiga; o la revista ‘Formientu’, editada por H.a Xareos y cola presencia de Vanessa Gutiérrez, Diego Aldebarán, Nicolás Bardio o Vítor Suárez. El domingu sedrá’l día de les conclusiones y la clausura.

Espublizáu por

Máster en Sociedá de la Información y el Conocimientu na UOC, Grau en Periodismu pola UDIMA, Especialista n'asturianu nel Máster de Profesoráu, Diplomáu en Turismu y Especialista en Xestión Cultural pola Universidá d’Uviéu. Anguaño preparo la mio tesis doctoral. Tengo trabayao en medios como la Cadena Ser, Onda Peñes, Asturnews... Dende 2007 presento programes na TPA, como Xente de casa y el recién Territoriu Sidreru. Los llunes en Noche tras noche, falo na RPA. En 2012 escoyéronme pa presidir Iniciativa pol Asturianu, lo que compaxino cola direición de la revista Formientu, el trabayu como profesor en dellos cursos, xestor cultural, amás d'otres xeres profesionales, culturales y reivindicatives. Dende 2016 exerzo como profesor de llingua asturiana y lliteratura n'institutos.

Dexar un comentariu

La to cuenta de corréu nun va espublizase.