[youtube https://www.youtube.com/watch?v=lq-xCSE6bZg]
La Universidá d’Uviéu y l’Academia de la Llingua Asturiana tienen abiertu’l plazu pa matriculase nel cursu Xestión cultural n’Asturies: creando cultura a traviés de los medios, que va celebrase en Cangas del Narcea del 10 al 14 d’agostu, dientro de la Universidá Asturiana de Branu (UABRA)
L’oxetivu d’esti cursu, empobináu pola profesora de la Universidá d’Uviéu, Isabel Hevia Artime, ye afondar na conocencia de la teoría y les ferramientes práutiques de la xestión cultural venceyaes n’especial a los campos de la xestión de la política llingüística y la cultura n’Asturies, averándonos a la conocencia de la situación de la estaya y apurriendo ferramientes básiques pal trabayu nel campu de la xestión cultural n’Asturies, dende un puntu de vista teóricu y práuticu.
Nel programa formativu tamién participen como profesores Cristóbal Ruitiña, conocíu periodista de la TPA ya investigador y profesor universitariu, María Xosé Rodríguez, que foi a lo llargo de diez años responsable de la Oficina de Normalización Llingüística de Xixón ya Inaciu Galán y González, especialista en Xestión Cultural, periodista y presidente d’Iniciativa pol Asturianu.
El cursu, que va celebrase en Cangas del Narcea en réxime d’internáu, va entamar el 10 d’agostu, dura una selmana, y tien un costu de 190 euros, lo qu’inclúi matrícula, agospiu en réxime de pensión completa y materiales.
Les inscripciones han facese nel llar de l’Academia de la Llingua Asturiana, na cai L’Águila d’Uviéu, Monesteriu de les Pelayes. Pa más información pueden ponese en contautu nel corréu alla@academiadelallingua.com o nel teléfonu 985 211 837.