Güei cúmplense diez años del primer premiu lliterariu que recibí por un testu n’asturianu. Yera 24 de payares y llamábenme del periódicu anguaño yá despaecíu La Voz de Asturias. Quedare en segundu puestu con “La viesca n’ochobre” nel II Concursu de Microrrellatos Minimorum. Recuerdo que naquella entrega conocí al ganador del primer premiu con “Ente’l Carrión”, Rafa R. Valdés.
Aquello sirvióme como primer impulsu p’animame a siguir escribiendo. Güei, xusto 10 años y 24 premios más tarde, toi satisfechu del camín andáu y agradecíu a toles instituciones, entidaes y persones que m’otorgaron estos premios en tantos llugares y colos que tuvi siempres guapes esperiencies nes entregues y dempués, conociendo a xente escepcional y esmolecío pola cultura y la llingua d’Asturies, en Xixón, Siero, Piloña, Uviéu, Estorga, Madrid, Ayer, Avilés, Grau… Gracies a toos.
Prestábame recordar esta fecha y celebrala de dalguna manera regalándovos aquel microrrellatu ganador:
La viesca n’ochobre
Segundu premiu nel II Concursu Microrrellatos ‘MINIMORIUM’ de LA VOZ DE ASTURIAS.
El ruxir de les escopetes que me siguíen a toa mecha, retumbaba nos mios oyíos. Na fuxida desesperada adientréme nuna viesca, un llugar qu’ochobre enllenare de fueya seco y l’odiu, de sangre inocente. Los cadabres diben acumulándose y escondíme tres d’un gruesu carbayu intentando evitar aquel murniosu destín. Ellí, entruguéme qué facía detrás d’aquel carbayu, por qué lluchaba contra iguales, qué me llevare a aquello. Los tiros siguíen ruxendo una y otra vegada, ¡bum! ¡bum! ¡bum!, aquel ruíu dexábame sordu y aquel odiu, ciegu. N’Asturies, los ríos de sangre arrastraren con ellos la dignidá de la xente, el valor de la vida… Y los tiros pararon, el sangre dexó de correr, caún enterró los sos muertos, y toos –los que quedamos– tornamos a sobrevivir.