Artículu espublizáu nel diariu Asturnews. (lleer nel llugar orixinal)
Podemos considerar a Telón de Fondo como’l grupu de teatru que más fizo pola normalización del teatru contemporanéu n’asturianu. El llabor de les persones que formen esti grupu, ente les que destaquen Lluis Antón González y Xulio Vigil, supunxo nes décades últimes un referente pa otros grupos y una riqueza pa la cultura asturiana.
El grupu punxo n’escena adaptaciones de testos d’autores asturianos clásicos como Antón de Marirreguera, xunto con otros autores de prestixu internacional, de la talla de Dario Fo, Jaime Salom o Antón Chéjov. Precisamente agora, el grupu ta estrenando per dellos conceyos del país una obra d’esti últimu autor y el xueves pasáu los xixoneses tuvimos la suerte de poder ver una función nel Atenéu de La Calzada.
«El xuegu de Yalta» ye l’adaptación del cuentu d’Antón Chéhov «La dama del perrín», fecha pol autor irlandés Brian Friel, que cunta pa esta ocasión con una versión n’asturianu, mui bien iguada, de Lluis Antón González.
El trabayu escénicu de la obra ye cenciellu pero mui visual, trabayando con audiovisuales y xugando coles lluces ya imáxenes de fondu, de tal manera que l’escenariu camuda a cada momentu ensin necesidá de telón nin corte dalu. La calidá del diálogu métete dafechu nes realidaes con namás dos actores y poco más que cuatro sielles sobre l’escenariu.
El trabayu de Marilú Casas, como Ana Sergeyevna y de Lluis Antón González como Dmtry Gurov, ye mui correctu (y eso tando namás na so segunda puesta n’escena). A la primera nun la viere nunca sobre un escenariu, fízolo bien, y eso que tenía xunto a ella a un actor énte’l que ye difícil quedar bien. Lluis Antón González nunca nun dexa de sorprendeme, echando monólogos, con un drama, adáptase a too. Nel papel de Dmtry ye quien a amosar esa seriedá cola qu’ún nun pue parar de rir y unes tables nes que rescampla la so llarga esperiencia sobre l’escenariu y delantre de les cámares.
En cuantes a la hestoria, meyor nun cuntar nada y estropiar les sorpreses de la trama, pero encamentavos, eso sí, a que vaigais a vela nos pases que se faigan nel futuru, qu’a la vista del llenu cuasi completu que consiguió Telón de fondo el xueves pasáu, sedrán munchos.