Artículu espublizáu nel diariu Asturnews
Anunciénlo los periódicos: L’alta velocidá vuelve a retrasar la so llegada a Asturies. Y retrásese pola incapacidá de los nuesos políticos pa mirar acullá de los intereses del so partíu. Los intereses estratéxicos del PSOE lleven les inversiones n’infraestructures a otres comunidaes autonómes que, gobernaes pol PSOE o’l PP, miren polos sos intereses y peleen polos fondos necesarios. ¿Dalguién pue imaxinar un túnel d’un montonera de millones d’euros percorriendo una ciudá, termináu, y ensin víes nin tren per munchos años? Esto namás pue pasar n’Asturies, y el que nun lo crea que venga a Xixón y conoza’l nuesu Metrotren inacabáu, llamáu a convertise nuna auténtia atracción turística en forma de monumentu n’homenaxe a la incompetencia na xestión política de les infrastructures.
Y namás n’Asturies les obres tarden cada vegada más y van quedando en menos según pasen los años. Unu de los globos sonda unviaos pol PSOE dende va tiempu ye que l’AVE termine’l so viaxe en La Pola L.lena y vayamos hasta ellí, dende Xixón, Uviéu o cualesquier otru llugar, nun tren de vapor o en burru si ye necesario, porque ¡total, namás s’aforren venti minutos! Y claro, eses perres son muncho más útiles nuna comunidá autónoma onde los ciudadanos (y la oposición) nun callen. Porque los ciudadanos de Valencia, Sevilla, Huesca, Toledo, Cuenca, Albacete, Girona, Lleida… tienen derechu a que l’AVE llegue al centru de les sos ciudaes, pero nós, al paecer non. ¿Por qué nun lu parar en Lleón, o yá que tamos, por qué nun siguimos diendo a Madrid (y al restu del mundu) nel ALSA?
Porque la oposición, ye dicir, el PP (anque Izquierda Xunida xuegue a selo, tán nel Gobiernu), nun esiste. El PP namás protesta cuando nun ta presente en tal o cual comisión, hai dellos exemplos bien conocíos de cómo dempués de colocar a los de so n’elles, callen. Los populares tán más esmolecíos por facese con esos puestionos que por ser una verdadera alternativa a un Gobiernu al que podíen poner coloráu con facilidá, pero sal ensin más consecuencies de cada mala decisión que toma. Y ye que namás n’Asturies vi a la oposición llevar una propuesta al Parllamentu y sumase a la negativa del Gobiernu sobre la marcha, escenificando lo que dalgunos llamaron, con aciertu, una llamentable “zarzuela”. (http://www.asturnews.com/index2008.php?idn=8397)
Pero lo más grave nesti país, nun ye que nun se reclamen les inversiones prometíes (como les del AVE a Madrid) sinón que se refuguen les que s’ufren, como ocurrió col casu de la necesaria llinia d’alta velocidá que mos conecte directamente colos más importantes noyos de desenrrollu europeos al traviés de la cornisa cantábrica. Galicia quería, Cantabria quería y el País Vascu queríala tamién. Namás n’Asturies el Gobiernu pue refugar conectase col restu d’Europa col mediu de tresporte más llimpiu, cómodu y rápidu al mesmu tiempu.
Y ye que n’Asturies namás interesa conectase con Madrid, pa poder sacar tolos años a miles de rapazos al esiliu llaboral (porque equí daríen datos de paru esaxeraos) y pa si se da’l casu y llamen del partíu a dalgunu, salir corriendo pa garrar el puestín. Porque, nun mos engañemos, a la mayor parte d’ellos esta provincia quéda-yos pequeña, esti gobiernín sábe-yos a poco, y nun ye más que’l trampolín pa les sos verdaderes aspiraciones.