Espublizada na revista Lliteratu, ochobre 2007
——————————————————–
3 Escritores, 3 Llectures
26 d’ochobre de 2007
Inaciu Galán y González
Venti entrugues
– Una frase pa definise.
– Unu va faciéndose cada día. Ye como’l ríu ‘naide se baña dos vegaes nel mesmu’, vas pasando y camudando coles vivencies, anque les idees básiques siguen ehí, como nel fondu del ríu siguen les piedres, que l’augua va dando forma col pasar.
– ¿Qué ye Asturies?
– El mio país. El llugar onde me presta facer vida, pero sobremanera, la xente cola que me presta vivir. Si llucho porque sobreviva lo que ye esti país ye porque me presta esta xente, colo bono y lo malo. Nun soporto’l discursu típicu “vaya xentecaya que tenemos nesti país”. Un discursu que pue sorprender, pero ye típicamente asturianista.
– Una razón pa escribir
– Tantes… por unu mesmu, pol idioma de nueso, por salú dacuando…
– Un llugar nel que se perder
– La Collá, en Siero, una parroquia na que la hestoria percuerre cada camín y onde cada prau guarda alcordances de mio infancia. Un llugar nel qu’echase en suelu y comer zreces directamente del árbol.
– ¿Una llingua pa escribir o escribir pa una llingua? – Vivir nuna llingua, escribir na llingua que vives, esto nun ye’l club d’esperantu, anque dacuando, paezlo.
– ¿Escribir ye una necesidá?
– Munches vegaes ye un abellugu, una manera de facer inventariu.
– ¿Piensa en dalguién al escribir? – Nel llector, cuasi siempres.
– ¿A mano o a máquina? – Soi fíu de la era tecnolóxica. En mio casa siempres hebo ordenador. Ye lo que tien ser del fin de sieglu. Sicasí, a vegaes nun queda otra qu’usar les manes, pero la mayor parte les vegaes pa trabayar testos yá impresos. Correxir coses tovía me cuesta na pantalla.
– ¿Dexa en dalgún momentu de ser escritor?
– Más que de ser escritor, que nun sé si lo soi, nun pueo dexar de ser observador.
– ¿El tiempu pasáu siempres foi meyor? – Na alcordanza sentimental sí, na alcordanza racional unu va viendo como s’atopa a sí mesmu.
– ¿Dalgún vezu pa ponese a escribir? – Que seya de nueche.
– ¿Gustaría-y paecese a dalguién?
– Al yo que quiero ser.
– Echando la vista atrás, ¿volvería a escribir?
– Poco pue echar la vista atrás unu a estos años. Pero sí.
– ¿Cree nes utopíes?
– Non. Creo nel trabayu, que consigue coses más difíciles.
– De lo que tien fecho, ¿de qué se siente más arguyosu?
– D’aquello que llegue a la xente más. ¿El qué, nun sé? Quiciabes hasta agora, de la organización de l’Arribada, pero seguramente ta por llegar.
– ¿Cambiaría dalgo?
– Nun me presta la hestoria ficción.
– ¿Rellee lo escrito dempués d’espublizao?
– Siempres y de contino faigo cambios, nueves versiones, ampliaciones… sobremanera col ensayu.
– ¿Tien fronteres la so obra?
– Habría que la sacar pa sabelo.
– ¿Qué falta na lliteratura asturiana?
– Afalala nes escueles, nos medios de comunicación, nes instituciones… vamos, la oficialidá del idioma na que s’escribe la lliteratura asturiana: l’asturianu.
– ¿Y qué sobra?
– El vivir mirando unos pa otros y d’espaldes a la sociedá asturiana.