Pa llevar alantre Iniciativa pol Asturianu, tamién son necesarios fondos, poro, amás de la implicación personal, agradecemos el sofitu económicu. Nesti casu, Xareos! Xestión Cultural ta organizando dellos actos de presentación de la so revista Formientu por mor del so quintu aniversariu y va despidir l’añu y, a dellos de los sos autores más vieyos, nun actu que se va celebrar nel chigre L’Ayalga, de Xixón, esti xueves 29 d’avientu de magar les 8 la tarde.
Esti actu va servir tamién pa recaldar fondos pa l’asociación Iniciativa pol Asturianu, pues tolos ingresos pola venta de revistes que se faigan esi día van tar destinaos al llabor de la organización, que collabora tamién cola organización del actu.
Dende Iniciativa pol Asturianu, queremos poner en valir la lliteratura asturiana y collaborar con esta revista ye un bon preséu pa ello.
Nesti númberu apaecen poemes de Pablo Rodríguez Medina, Xurde Fernández, Ricardo Candás y Héctor Pérez Iglesias. Testos narrativos d’Abel Martínez, Jorge Fernández García, Pablo A. Quiroga Prendes, Rubén Rey Menéndez ya Inacio Rodríguez-Solar. Amás de dos crítiques de llibros, feches por Iván Cuevas y José Ángel Gayol sobre «Les últimes pallabres» y «Pequeñu álbum de familia».