El númberu 110 del boletín de l’Academia de la Llingua Asturiana, “Lletres Asturianes”, asoleyáu apocayá, inclúi un artículu de mio, col títulu L’asturianu y les nueves teunoloxíes: datos d’una encuesta d’usos llingüísticos.
Nesti trabayu recuéyense y analícense los resultaos d’una encuesta fecha al traviés de la rede y ente la comunidá usuaria de la llingua asturiana, a la gueta de datos sobre los usos llingüísticos de los falantes d’asturianu acordies col contestu dixital nel que tean, usu de ferramientes llingüístiques en llinia y otres cuestiones venceyaes a les nueves teunoloxíes.
El trabayu pue lleese na versión en papel o equí na versión dixital.
Amás, nesti númberu apaez una reseña qu’escribí sobre’l llibru La Unió Europea, un mosaic lingüístic, de Jaume Corbera. Puedes lleela equí, na páxina 244.
Nesti númberu apaecen otros interesantes artículos como’l que dedica Xosé Bolado a los autores más mozos de la lliteratura asturiana o’l d’Hector Gil sobre l’adaptación de topónimos penínsulares al asturianu. Paga la pena lleer la revista entera. Descárgala equí de baldre.