Entrevista n’El Comercio:

ENTREVISTES
20 d’abril de 2013

Inaciu Galán Director de la revista ‘Formientu’. El númberu 11 de la espublización ve la lluz estos díes con aires renovaos y apostando polos autores mozos

«Tamos perdiendo falantes del asturianu ensin parar»

ENRIQUE CARBALLEIRA

La revista de lliteratura ‘Formientu’ abre una nueva etapa onde, magar de dellos cambios, va siguir apostando pola promoción de los autores más mozos. Falamos col so director, Inaciu Galán.

–¿Cómo nació Formientu?

–Formientu apaeció nel añu 2006 porque como escritor mozu dábame cuenta de que los de la mio xeneración nun teníen un espaciu específicu pa dar a conocer la so obra y pensé que sedría una bona iniciativa’l xuntalos nuna revista que pudiera dir dando a conocer a nueves promeses de la lliteratura asturiana.

–¿Qué conteníos podemos destacar d’esti númberu 11?

–Esti númberu ye’l primeru d’una nueva etapa. Venimos de celebrar el quintu aniversariu de la revista. Agora vamos publicar un númberu al añu en llugar de dos, pero con un formatu más curiosu, con más páxines que-y dan cuerpu y espaciu pa publicar testos más llargos. Podemos dedicar más espaciu a les fotografíes, yá que mos presta qu’en cada númberu un artista mozu ilustre les páxines. Nesti casu ye’l llangreanu Alex Ordiales. El so trabayu y la maquetación y diseñu d’Andrés Alonso Moutas crearon un númberu mui atractivu. Amás, incluyimos una sección nueva dedicada a recuperar testos d’autores clásicos y contemporanéos.

–¿Ta llogrando promoción de nuevos autores?

–Nesti tiempu más d’ochenta autores pasaron peles páxines de los 11 númberos qu’asoleyamos, y munchos d’ellos diéronse a conocer y publicaron los sos primeros llibros gracies a esti escaparate que ye Formientu frente a les editoriales y la crítica. En xeneral toi satisfechu del resultáu.

–¿Tán teniendo problemes a la hora de llograr una bona distribución?

–La distribución ye mui complicada, nós a partir d’esti númberu cuntamos con dos puntos de venta, la Llibrería Paradiso en Xixón y Ojanguren n’Uviéu, que tamién vende per internet y lleva les soscripciones. La idea ye tener dos llugares de referencia onde puedan atopase tamién los númberos anteriores, anque mos prestaría poder tenela en más sitios fuera de les ciudaes del centru d’Asturies y tamos abiertos a ello.

–¿Qué papel ta xugando la revista nel sector editorial?

–Esta revista ye lo que ye, faise de manera desinteresada y con un oxetivu de promoción de la lliteratura y la llingua asturiana ente la xente más mozo. El sector editorial asturianu, por embargu, ye un sector profesional, un negociu que crea empleu y riqueza económica y cultural na sociedá, y asina tien que ser. L’alministración asturiana nun fai una política activa de promoción del llibru n’asturianu. Dan unes ayudes pa la publicación y olvídense. Nun hai más que ver la entrega de los premios lliterarios n’asturianu de la Conseyería de Cultura, onde nun apaez nunca’l presidente d’Asturies y con suerte va la conseyera de Cultura.

La so presencia y l’apoyu en xeneral a la lliteratura y al asturianu fadríen más que toles ayudes que puedan dar. Como en cuasi toles coses n’Asturies, el Gobiernu nun tira polo nueso, y la sociedá nun acaba d’implicase lo suficiente.

Lo positivo, hai una bona producción de calidá, que ta reconcida en tol mundu y cada vegada más xente que sal de les escueles lleendo n’asturianu ensin dificultaes.

–¿Qué planes tienen pal futuru de ‘Formientu’?

–Sobrevivir (rises). Sacar alantre cada númberu lleva munchu trabayu, la verdá, anque presta ver el resultáu. La idea ye siguir alantre, moviéndola tolo posible y atopando nuevos autores mozos que vaigan dando continuidá al proyectu. Nos próximos meses vamos presentala en Corvera, Bimenes, Coluga y nel Centru Asturianu de Madrid.

–Usté tamién ye presidente de la organización Iniciativa pol Asturianu. ¿Por qué decidieron crear la plataforma?

–Iniciativa pol Asturianu naz en 2011 del descontentu cola situación qu’atraviesa la llingua asturiana. Un grupu de persones que pensamos que podemos aportar coses nueves, una forma distinta de facer reivindicación llingüística, creámosla pa venir a sumanos al trabayu mui meritoriu que yá veníen faciendo otres organizaciones, anque d’otra forma, con otres idees complementaries, otres estratexes.

L’oxetivu principal ye concienciar a la sociedá asturiana de la necesidá de que tol mundu s’implique, porque esto nun ye cosa nin solo de los políticos nin solo del asturianismu, tenemos que da-y futuru al asturianu implicándonos toos.

–¿Ye tan grave como paez la situación de la llingua?

–La situación del asturianu ye mala, eso ye obvio, perdemos falantes ensin parar, los que queremos usar esta llingua siguimos ensin ver reconocíos los nuesos derechos. Por embargu, nun comparto’l pesimismu, creo que ser pesimistes lleva namás al inmovilismu. L’asturianu precisa de munchu trabayu.

 

Entrevista n’El Comercio equí.

Espublizáu por

Máster en Sociedá de la Información y el Conocimientu na UOC, Grau en Periodismu pola UDIMA, Especialista n'asturianu nel Máster de Profesoráu, Diplomáu en Turismu y Especialista en Xestión Cultural pola Universidá d’Uviéu. Anguaño preparo la mio tesis doctoral. Tengo trabayao en medios como la Cadena Ser, Onda Peñes, Asturnews... Dende 2007 presento programes na TPA, como Xente de casa y el recién Territoriu Sidreru. Los llunes en Noche tras noche, falo na RPA. En 2012 escoyéronme pa presidir Iniciativa pol Asturianu, lo que compaxino cola direición de la revista Formientu, el trabayu como profesor en dellos cursos, xestor cultural, amás d'otres xeres profesionales, culturales y reivindicatives. Dende 2016 exerzo como profesor de llingua asturiana y lliteratura n'institutos.

Dexar un comentariu

La to cuenta de corréu nun va espublizase.