Nel actu van entregase los gallardones del I Certame de Microrrellatos “Formientu” y va facese un recital.
La revista Formientu, asoleyada por Xareos! Xestión Cultural y la editorial La Cruz de Grau, va presentar el númberu 6 de la so trayectoría, qu’entamó en 2007 y que busca espublizar la obra de los autores más mozos de la lliteratura asturiana y dala a conocer. L’actu va celebrase nel palaciu Villa Madalena d’Uviéu, el martes, 12 de xineru, y a partir de les 19:30 hores cola presencia de los autores qu’apaecen nesti númberu, la dirección y l’editor de la mesma.
Nesti númberu seis apaecen autores avezaos de la revista, amás de delles novedaes, como ye’l casu d’Abel Martínez, Daniel Estrada, Llucía Di Salvo León, fía d’emigrantes asturianos en Bonos Aires, y Manuel Fernández García, qu’escribe a comuña col so hermanu Jorge, habitual de Formientu. Amás de Javier Cayado Valdés, Benxa Pérez, Héctor Pérez Iglesias, Fran Melero «Frantxu» y Ricardo Candás.
Nesti númberu espublizamos tamién los rellatos ganadores del I Certame de Microrrellatos Mozos «FORMIENTU», que convocamos esti añu dende Xareos! y la editorial La Cruz de Grau col envís d’afalar la creación lliteraria y ayudalos a afondar nes sos posibilidaes creatives. A los rellatos que llevaron premiu o accésit, súmense los escoyíos pol xuráu pa la so espublización.
Los ganadores van recibir un premiu y diploma acreitativu nun actu que va celebrase al empar d’esta presentación del númberu 6, en Villa Madalena. Nel mesmu va facese un recital, a partir de les 20 hores, nel que van participar: Pablo X. Suárez, Alejandra Sirvent, Abel Martínez, Frantxu Melero, Rubén Rey y Jorge Fernández García.
Formientu ta dirixida por Inaciu Galán y el so Conseyu de Redacción ta formáu pol escritor Benxa Pérez y l’editor César García, coordinaos pola escritora y filóloga Laura Marcos. Formientu cunta con una ayuda de la Conseyería de Cultura d’Asturies.
Miércoles 13: Conferencia d’Inaciu Galán, Director de Formientu
Dientro de los mesmos actos de la Xunta d’Escritores 2010, el director de Formientu, l’escritor y periodista Inaciu Galán y González va falar del “Periodismu nuna llingua minorizada” a les 18,30 hores del miércoles 13.
Inaciu Galán y González anguaño ye redactor de los periódicos dixitales Asturnews.com y Lliteratu.com, presenta’l programa de televisión ‘Al aldu: Xente de casa’ na TPA y dellos espacios na cadena SER. Ente 2003 y 2005 dirixe dellos programes n’Onda Peñes, recibiendo nel añu 2005 el Premiu “Enriqueta González Rubín” de Periodismu, otorgáu pol Principáu d’Asturies.