El recital que va celebrase va cuntar con dellos autores de la revista
Domingu 11, 18 hores, Feria del Llibru n’Asturianu nel Centru Niemeyer d’Avilés. Presentación del númberu 12 de la revista Formientu y recital.
La revista, dirixida por Inaciu Galán dende la so fundación en 2006, sigue apostando por ser cantera de nuevos autores en llingua asturiana, dándolos a conocer y apurriendo un espaciu pa los sos testos. El viniente domingu 11 de mayu va presentase nel Centru Niemeyes d’Avilés (edificiu de recepción) de magar les 18 hores y cola presencia d’autores, que darán llectura a los testos de la revista.
Nesti númberu apaecen testos d’Alberto Cla, Andrés Astur Treceño, Laura García Calvo, Cristina Menéndez Martín, Fonsu Suárez, David Carrasco Díaz, Naomi Suárez González, Ismael Carmona García, Nayar Crespo Sánchez, Jaime Martínez Menéndez, Pablo M. Testa, Alba Llaneza Pulido, María García Díaz, Blanca Fernández Quintana y Xurde Álvarez Antón. Amás, ta ilustráu pol xoven fotógrafu y cineasta Pablo Casanueva. Toos ellos tienen menos de trenta años y asoleyen la so obra n’asturianu.
Na sección “Cuando… yera autor mozu” apaez nesti casu un testu de Pachín de Melás. Na sección búscase dar a conocer la obra escrita por autores clásicos o contemporáneos, escrita demientres la so mocedá. El poema asoleyáu nesta ocasión espublizólu l’autor xixonés con 22 años.