L’Academia de la Llingua entregó los premios de los sos Concursos 2009

d’asturies.com
Xunu 5, 2009 por E.P. / Redacción
Un trabayu sobre’l dramaturgu asturianu Pachín de Melás y otru sobre la presencia del llobu na tradición oral asturiana fueron dalgunos de los premiaos nos concursos de l’Academia de la Llingua sobre investigación y creación lliteraria, na so edición 2009.

‘El teatru de Pachín de Melás y la crítica del so tiempu’, del que ye autor Xosé Lluis Campal Fernández, ye’l ganador de la modalidá d’investigación sobre lliteratura asturiana. Mientres, ‘El llobu na tradición oral asturiana’, ellaboráu por Alberto Álvarez Peña, recibió l’áccesit na categoría de recoyida de material oral lliterario.

Nel apartáu de recoyida d’información toponímica, recibió’l premiu’l trabayu sobre los topónimos de les parroquies de les parroquies de Zarréu y Degaña, por Francisco Javier Redondas Maseda. Tamién recibieron áccesit los de les parroquies de Llatores (Uviéu), por Gabino Arcadio Alonso; Felgueras (L.lena) de la que son autores Verónica y Raúl Fueyo Alcedo; y La Marea (Piloña), del que ye autora María Aurina González Nieda.

Nel concursu de recoyida de material lliterario escrito ‘Premiu Federico G.-Fierro Botas’, diose un accésit de 300 € al trabayu tituláu ‘Poesíes asturianes de Carlos de la Concha’, del que ye autor Rafael Rodríguez Valdés, amás d’otros dos a los trabayos titulaos ‘Testos asturianos en prosa’, del que son autores José Luis Campal y Aurora Sánchez, y al trabayu ‘Amuesa de publicidá en llingua asturiana’, d’Inaciu Galán.

Dientro de los trabayos d’investigación quedó ermu’l de la categoría de recoyida oral de material léxico y d’investigación llingüística.

CREACIÓN

Lluis Portal Hevia foi’l ganador del Concursu de Llectures pa Rapazos, por trabayu tituláu ‘Pelegrinos del abismu’. Mientres, el poemariu tituláu ‘Cuando’l mundu debala’, del que ye autor Berto García García, ganó’l premiu ‘Llorienzu Novo Mier’. Nel apartáu de teatru, ganó la obra titulada ‘La fuxida’, de la que ye autor Xaviel Vilareyo. A lo último, quedó tamién erma la categoría de cómics y curtios cinematográficos n’asturianu.

Espublizáu por

Máster en Sociedá de la Información y el Conocimientu na UOC, Grau en Periodismu pola UDIMA, Especialista n'asturianu nel Máster de Profesoráu, Diplomáu en Turismu y Especialista en Xestión Cultural pola Universidá d’Uviéu. Anguaño preparo la mio tesis doctoral. Tengo trabayao en medios como la Cadena Ser, Onda Peñes, Asturnews... Dende 2007 presento programes na TPA, como Xente de casa y el recién Territoriu Sidreru. Los llunes en Noche tras noche, falo na RPA. En 2012 escoyéronme pa presidir Iniciativa pol Asturianu, lo que compaxino cola direición de la revista Formientu, el trabayu como profesor en dellos cursos, xestor cultural, amás d'otres xeres profesionales, culturales y reivindicatives. Dende 2016 exerzo como profesor de llingua asturiana y lliteratura n'institutos.

Dexar un comentariu

La to cuenta de corréu nun va espublizase.