L’Arribada, “vagamar lliteraria en Xixón”, entama esti vienres, 14 de setiembre

Noticia apaecida en Les Noticies el 10 de setiembre de 2007

——————————————————————-
cartelu2007 L’Arribada, la “vagamar lliteraria en Xixón”, entama esti vienres 14 con una multitú d’ectos que se van desenvolver, día a día, hasta’l 22 de setiembre. Recitales, exposiciones, presentaciones de llibros van vertebrar unes xornaes intenses organizaes cola ambición de visibilizar los productos culturales asturianos y atopar “los nuevos rumbos de la lliteratura asturiana”.

El vienres 14, a les 12:00 hores, entamarán los actos cola apertura, nel Centru Cultural del Antiguu Institutu de Xixón, del “Espaciu editorial”; a esa mesma hora, nel patiu de la mesma institución, va presentase “Vagamar”, periódicu de l’Arribada, y va producise l’apertura d’una exposición pictórica, “Palabres pa la llibertá”, nel vestíbulu de la 2ª planta del mesmu edificiu.

A les 17:00 arribarán, en barcu, los congresistes al puertu deportivu de Xixón, que d’ehí enfilarán a sentir los sos propios textos en boca de destacaos políticos del ámbitu municipal xixonés y asturianu. Esi actu de llectura de textos lliterarios de los grupos políticos del Conceyu de Xixón va celebrase nel Salón d’Actos del Centru Cultural Antiguu Institutu y ta previsto, hasta’l momentu, que llean les siguientes personalidaes: de parte del PP, Pilar Fernández Pardo, Manuel Pecharromán, Dorinda García, Pablo González, Gabriel Díaz, María Teresa Menñendez; de parte del PSOE, Justo Vilabrille, José Manuel Sariego, José Ramón Tuero y Dulce Gallego; de parte d’IX-Bloque por Asturies, el diputáu, ex conseyeru de xusticia, Francisco Javier Valledor.

A les 19:30 va ser la inauguración de la exposición “Palabres pa la llibertá” a les 20:00 hores, nel patiu del edificiu históricu, va poder sentise’l conciertu “Ayalga Sinfónica”.

Con esta xornada entama un congresu nel que, hasta’l día 22 de setiembre, van celebrase mui bien d’actos lliterarios. Humberto Gonzali, Xaviel Vilareyo, Xosé Lluís Campal, Xosé Nel Riesgo o Inaciu Galán –señalamos namás una parte mínima de los participantes– expondrán énte los xixoneses la evolución d’una lliteratura que cada vez tien más voces.

Espublizáu por

Máster en Sociedá de la Información y el Conocimientu na UOC, Grau en Periodismu pola UDIMA, Especialista n'asturianu nel Máster de Profesoráu, Diplomáu en Turismu y Especialista en Xestión Cultural pola Universidá d’Uviéu. Anguaño preparo la mio tesis doctoral. Tengo trabayao en medios como la Cadena Ser, Onda Peñes, Asturnews... Dende 2007 presento programes na TPA, como Xente de casa y el recién Territoriu Sidreru. Los llunes en Noche tras noche, falo na RPA. En 2012 escoyéronme pa presidir Iniciativa pol Asturianu, lo que compaxino cola direición de la revista Formientu, el trabayu como profesor en dellos cursos, xestor cultural, amás d'otres xeres profesionales, culturales y reivindicatives. Dende 2016 exerzo como profesor de llingua asturiana y lliteratura n'institutos.

Dexar un comentariu

La to cuenta de corréu nun va espublizase.