Xixón acoyerá´l primer club de la comedia n´asturianu, febreru 2005

Noticia espublizada en La Voz de Asturias por mor del Ier Certame de Monólogu Modernu, el 10 de febreru de 2005
——————————————————————–

COMEDIA CERTAME
Xixón acoyerá´l primer club de la comedia n´asturianu
Los monologuistes van ser Caamaño, Antón González y Benxa Pérez

10/02/2005 PAULA SUAREZ

benxa_inaciu

Inaciu Galán y Benxa Pérez.
Foto:DANIEL MORA
Los monólogos n´asturianu tuvieron siempre normalizaos, pero nestos tiempos quiciabes el so conteníu nun seya tan actual. Así piensen Inaciu Galán y González y Benxa Pérez, que tán organizando´l I Certame de Monólogu Modernu n´asturianu. Esti certame va ser el 3 de marzu na sala Albéniz de Xixón y tien como enfotu modernizar esta estaya de la cultura asturiana. A xuiciu d´Inaciu Galán, el problema qu´esiste nestos momentos ye que los monólogos nun son mui actuales, sinón que tan arrequexaos nuna temática rural y nada estética de “boina y cayáu” que nun resulta mui atrayente pa la mocedá d´anguaño. La intención d´estos dos estudiantes, que montaron la empresa H.a. Xareos, ye que la guerra d´Irak, el teléfonu eróticu o incluso una parodia de los propios asturianos protagonicen estes interpretaciones en tonu d´humor. “Hai tradiciones que pa mantenese tienen qu´actualizase”, diz Galán.

Viendo´l punxo que los monólogos taben teniendo en castellán y contando colo enraigonaos que taben n´Asturies, estos dos mozos camentaron que ya yera hora de qu´esta parte de les artes escéniques siguiese faciéndose nel sieglu XXI y pudiere ser un referente na vida cultural de los asturianos, con unes formes y una temática renovaes.

Asina montaron esti Club de la Comedia n´asturianu, que va contar cola interpretación de los actores Toño Caamaño, Lluis Antón González y el propiu Benxa Pérez. Dellos de los testos tán escritos polos mesmos monologuistes y otros fízolos l´escritor Chechu García. Pesie a que los monólogos tán enraigonaos n´Asturies, ente la xente más moza nun hai muncha costume de representalos y menos de facelo en público, como va pasar na Sala Albéniz. Galán y González ye de los que piensen qu´esti espectáculu pue valir pa qu´otra xente vaya animándose y pa dir renovando los actores.

Enantes de les actuaciones de Caamaño, González y Pérez, va a haber una “prefolixa” y dempués va tocar Tarañu. Los monólogos presentarálos Inaciu Galán, que tamién collabora con Tele Xixón, la cadena que grabará l´actu. H.A Xareos tien como fin organizar tou tipu d´actos culturales y d´ociu col enfotu de normalizar la llingua asturiana.

Xixón acoyerá´l primer club de la comedia n´asturianu ( La Voz de Asturias – 10/02/2005 )

Espublizáu por

Máster en Sociedá de la Información y el Conocimientu na UOC, Grau en Periodismu pola UDIMA, Especialista n'asturianu nel Máster de Profesoráu, Diplomáu en Turismu y Especialista en Xestión Cultural pola Universidá d’Uviéu. Anguaño preparo la mio tesis doctoral. Tengo trabayao en medios como la Cadena Ser, Onda Peñes, Asturnews... Dende 2007 presento programes na TPA, como Xente de casa y el recién Territoriu Sidreru. Los llunes en Noche tras noche, falo na RPA. En 2012 escoyéronme pa presidir Iniciativa pol Asturianu, lo que compaxino cola direición de la revista Formientu, el trabayu como profesor en dellos cursos, xestor cultural, amás d'otres xeres profesionales, culturales y reivindicatives. Dende 2016 exerzo como profesor de llingua asturiana y lliteratura n'institutos.

Dexar un comentariu

La to cuenta de corréu nun va espublizase.